Республика парламена былаас ыытар үлэтин хаачыстыбатын, эбээһинэстэрин уонна эппиэтинэһин толоруутун норуот өттүттэн хонтуруоллааһыны көрөр “Общественнай хонтуруол туһунан” сокуону бастакы ааҕыыга дьүүллэһиитэ суруналыыстар болҕомтолорун тарта. Спикер бэлиэтииринэн, билиҥҥи кэмҥэ былаас үлэтин хонтуруоллааһыҥҥа нэһилиэнньэ кыттыыта улаатан иһиитэ сокуон өттүнэн өйөбүлү эрэйэр. Республика Президенэ дьон-сэргэ  былаас үлэтин хаачыстыбатын тупсарыыга, кыһалҕалаах боппуруостар быһаарыллыыларыгар бииргэ үлэлиир дьулуурун өйүүр. Республика бу боппуруоска федеральнай сокуон ылылларын кэтэһэн олорбокко, бэйэтин сокуонун ылынар үлэҕэ сир ыла турар инниттэн сокуон барылын нэһилиэнньэ дьүүлүгэр таһааран, үлэни саҕалыы турара ордук буолуо. Спикер бүгүҥҥү күҥҥэ Госдума бастайааннай төрүккэ үлэлиирин быһыытынан “Общественнай хонтуруол туһунан” федеральнай сокуону ылыныытыгар ыытар үлэтэ балачча тэтимнээҕин бэлиэтээтэ.

 

“Саха” радиотын корреспондена Зоя Дьячковская Президент Егор Борисов олунньу 4 күнүгэр Ил Түмэҥҥэ Анал этиитин ис хоһоонун туһунан спикер тус санаатын ыйыталаста. Александр Жирков СР Президенэ Е.А.Борисов Ил Түмэҥҥэ быйылгы Анал этиитин сүрүн тутула уонна туруорар соруктара чуолкайдарын бэлиэтээтэ. Анал этиигэ республиканы түөрт сүрүн региоҥҥа арааран, промышленнай, тыа хаһаайыстыбатын оройуоннара, киин куорат уонна Арктика улуустарыгар инники сайдыыларыгар туспа хайысхалары туруортаан, Анал этиитигэр киллэрбитэ сөптөөх. Итинник этэн туран, спикер Ил Түмэн Анал этиини олоххо киллэриигэ үлэлии үөрүйэҕин, Анал этии сүрүн соруктарын олоххо киллэриигэ хайдах үлэлиэхтээҕин торумнаан, үлэлииргэ бэлэмнэнэрин туһунан иһитиннэрдэ.

Пленарнай мунньахха ааспыт сайын уу суолунан Индигиир бөлөх хотугу улуустарга таһаҕаһы таһыыга тахсыбыт быһыы-майгы төрүөттэрин ирдэһиигэ Виктор Федоров председателлээх Ил Түмэн депутаттарын хамыыһыйата ыыппыт үлэтин түмүктэрэ көрүллүбүтэ. Мунньахха кэккэ депутаттар Индигиир бөлөх улуустарга уу суолунан таһаҕаһы тиэрдиигэ айылҕа оҥорбут уустук усулуобуйата эрэ буруйдаах буолбатаҕын бэлиэтээбиттэрэ. Депутаттар республикаҕа уонна хотугу улуустар олохтоохторугар улахан хоромньу оҥоһуллубутугар таһаҕаһы тиэрдиигэ сыһыаннаах тэрилтэлэр салайааччыларын эппиэккэ тардар сөптөөҕүн, республика сокуону дуу, уураахтары дуу ылына сатыан оннугар уу суолун дириҥэтиигэ туһаныллар, саатар, биир земснаряды булара улахан суолталааҕын, депутаттар хонтуруоллуур хамыыһыйалара таһаарбыт түмүктэрин сонуннары киэҥник тарҕатар средстволарга нэһилиэнньэ киэҥ истиитигэр таһаарар наадатын,  СР Счетнай палатата Индигиир бөлөх улуустарыгар таһаҕаһы тиэрдии тохтуутун содулугар тахсыбыт хоромньуну ааҕан баран, суукка үҥсүү киллэрэрэ сөптөөҕүн ыйбыттара. Манан сибээстээн, суруналыыстар спикертэн таһаҕаһы тиэрдиигэ эппиэттээх салайааччылары, тэрилтэлэри кэмитиэт тоҕо ыҥырбатаҕын туһунан ыйыттылар. Александр Жирков Ил Түмэн депутаттарын хамыыһыыйата таһаҕаһы тиэрдиигэ үлэлээбит туһааннаах тэрилтэлэр салайааччыларын ыҥырыахтаах этэ диэн тус санаатын биллэрдэ.

 

“Саха” НКИК корреспондена Александра Охлопкова “АЛРОСА” АК республика бас билиитигэр баар акцияларын сорҕотун атыылааһын туһунан СР Президенэ Егор Борисов пленарнай мунньахха оҥорбут иһитиннэриитин туһунан ыйытыытыгар спикер чопчу хоруйу биэрдэ. Президент депутаттарга  аҥардас “АЛРОСА” акциятын атыылааһын эрэ туһунан буолбакка, республика баайын-дуолун үпкэ-харчыга таһааран сатаан туһаныы туһунан көрүүлэрин иһитиннэрбитэ. “Баайы-дуолу республика сайдыытыгар, нэһилиэнньэ олоҕун таһымын тупсарыыга туһаҕа туруорууга ыытыллар үлэни депутаттар уонна нэһилиэнньэ үчүгэйдик өйдөөн, ылынан олороллор. Ил Түмэн сокуон ылынан республика баайын-дуолун атыылааһынтан киирбит үбү ханнык хайысхаларга ороскуоттаныахтааҕын туһунан эрдэ, приватизация  оҥоһуллуон иннинэ, быһаарбыта. Ол быһыытынан акция атыытыттан киирбит үп ханнык хайысхаларга ороскуоттаныаҕа быһаарыллан, тыырыллан турар”, -- диэтэ спикер.  

 

Салгыы суруналыыстар спикертэн федеральнай таһымҥа республика көҕүлүүр сокуоннарын ылыныыга Ил Түмэн инникитин хайдах былааннаахтык үлэлиэҕин туһунан ыйыттылар. Госдумаҕа ааспыт сылларга Ил Түмэн уонунан көҕүлээһиннэри киллэрбититтэн бэрт ахсааннааҕа ылыллыбыта. Ол иһин республика парламена урут олохтоммуттан арыый да атын суоллары тобулара ордук көдьүүстээх буолуон сөп. Оннук толкуйунан салайтаран Ил Түмэн үрдүкү салалтата бу ааспыт кэмнэргэ Федерация Сэбиэтигэр, Госдумаҕа хаста да төхтүрүйэн сүбэлэһиилэри ыытта. Онно ситиһиллибит кэпсэтии быһыытынан Ил Түмэн уонна Госдума, Ил Түмэн уонна Федерация Сэбиэтэ холбоһуктаах көҕүлээһиннэри оҥороллорун ситистэххэ, Саха сирэ туруорсар сокуоннара арыый да көхтөөхтүк көрүллэр кыахтаныахтара. Спикер этэринэн, бу кэмнэргэ республика биир сокуонун Федерация Сэбиэтин аҕыс чилиэннэрин, ол иһигэр Вячеслав Штыровы уонна Александр Акимовы кытта, сүбэлэһэн киллэрбиттэр.

 

Ити курдук Ил Түмэн Председателэ Александр Жирков республика сонуннары киэҥник тарҕатар средстволарын корреспонденнарын ыйытыыларыгар сиһилии хоруйдары биэрдэ. Парламент аныгыскы пленарнай мунньаҕа кулун тутарга буолуоҕа.