Портка ыалдьыттары Ил Түмэн бэрэссэдээтэлин солбуйааччы Ольга Макиенко, олохтоох салайыныы боппуруостарыгар сис кэмитиэт бэрэссэдээтэлэ Василий Местников, ону сэргэ Дьокуускай куорат Думатын депутаттара көрүстүлэр.

Бу тэрээһиннэринэн баай нэдиэлэҕэ саҥа кэлбит ыалдьыттар да, олохтоох парламентарийдар да олохтоох салайыныы боппуруостарыгар болҕомтону уурарга суоттаналлар. Ол курдук олохтоох салайыныыга ханнык темалар таарыллыахтарын туһунан ыйытыыга Степан Михайлович Киричук маннык хоруйдаата: «Бу теманы Россия Президенэ Владимир Путин көтөхпүтэ, уопсай тылынан эттэххэ, олохтоох салайыныы систематын тупсарыы дэнэр. Ол курдук, муниципалитеттарга бэриллибит боломуочуйалар үбүнэн уонна тэрээһин ресурсаларынан хааччыллыбаттар. Харчы суох буолуоҕа, онон судаарыстыбаннай былаас уонна олохтоох салайыныы икки ардыларыгар тыырсыыны боруобалаан көрүөххэ наада, ол эбэтэр сөптөөх быһаарыы булуллуохтаах. Москваҕа олорон, ону хайдах оҥорору суруйар табыллыбат, тоҕо диэтэргит, дойдубут улахан уонна ханна да хатыламмат.

 

Ылан көрүҥ, Кавказ аулларын, Саха сирин улуустарын, Россия орто балаһатыгар дэриэбинэлэрин уонна бөһүөлэктэрин, 1,5 мөлүйүөн киһилээх уонна 20-30 тыһыынча нэһилиэнньэлээх куораттары, кинилэр бары араас кыахтаахтар. Онон биһиги Саха сиригэр, бу араас культуралаах, үгэстээх бэртээхэй дьон олорор сүүнэ киэҥ сиргэ-уокка судаарыстыбаннай былаас, олохтоох салайыныы хардарыта бииргэ үлэлэһиннэрин тиһигин үлэтин тупсарар алгоритмы оҥоро сатаары уонна бу үлэҕэ олохтоохтору бэйэлэрин кытыннараары кэллибит. Ол аата биһиги манна эһиги специалистаргытын, сокуону оҥорооччуларгытын, муниципальнай тэриллиилэр баһылыктарын, экспердэри кытта олохтоох салайыныыны хайдах тупсарар туһунан сүбэлэһиэхпитин баҕарабыт».