Дьокуускайга ыытыллыбыт Дальнай Восток сокуону оҥорууга үлэлиир парламентарийдарын көрсүһүүлэригэр сүрүн болҕомто суола-ииһэ суох, ыраах сытар сэлиэнньэлэргэ медицинскэй тэрилтэлэр кыһалҕаларыгар уурулунна. Кэлбит парламентарийдар бу боппуруоска республика депутаттарын өйөөтүлэр уонна РФ правительствотын председателигэр Дмитрий Медведевкэ, Федерация Сэбиэтин председателигэр Валентина Матвиенкоҕа, Государственнай Дума председателигэр Сергей Нарышкиҥҥа туһаайбыт ыҥырыы суруктарыгар ити сокуоҥҥа нэһилиэнньэ ахсаанын, бытанан олорор уратыларын учуоттуур, гражданнарга босхо медицинскэй көмөнү оҥорууну государство мэктиэлиир олохтоох программаларын оҥорууну көҕүлүүр уларытыылары киллэрэри туруорустулар. Ити ыҥырыыга этиллэринэн, федеральнай сокуон ирдиирин да үрдүнэ, ыраах сытар сэлиэнньэлэргэ доруобуйа харыстабылын тэрилтэлэрэ сабыллыбаттарын туһунан кэпсэтии барар.

 

Саха Республикатын Государственнай Мунньаҕа этэринэн, Уһук Хоту оройуоннарга уонна онно тэҥнэммит сирдэргэ стационар усулуобуйатыгар бастакы медицинскэй-санитарнай көмөнү оҥорор кыаҕы сокуонунан бигэргэтэр эрэйиллэр. Тоҕо диэтэххэ, 2011 сыл сэтинньи 21 күнүгэр ылыллыбыт 323 №-дээх “Российскай Федерация гражданнарын доруобуйаларын харыстааһын төрүттэрин туһунан” федеральнай сокуон оннук кыаҕы биэрбэт.

 

«Саха сиригэр нэһилиэнньэлээх пууннар аҥардара аҕыйах нэһилиэнньэлээхтэргэ киирсэллэр, оттон 44 бырыһыаннара – ыраах сытар, суола-ииһэ суохтарга киирэллэр, -- диир республика Государственнай Мунньаҕын спикерэ Александр Жирков. – Итинник сирдэр олохтоохторо стационарнай медицинскэй көмөҕө тиксэр кыахтара суох. Биһиги итиннэ көннөрүү киллэрэммит Российскай Федерацияҕа гражданнар ханна олороллоруттан тутулуга суох доруобуйа харыстабылыгар Конституциянан көрүллэр тэҥ быраабы олохтууру хааччыйабыт”.

 

Онон "Дальнай Восток уонна Забайкалье» Парламеннар ассоциацияларын чилиэннэрэ республика Ил Түмэнин этиилэрин өйөөтүлэр. Виктор Горчаков бэлиэтииринэн, парламеннар маннык биир санаанан сокуону көҕүлээһиннэрэ инникитин Государственнай Дума регионнар этиилэрин ылынарыгар улахан кэскиллээх. Онон Дальнай Востокка баар ыраах сытар, суола-ииһэ суох сэлиэнньэлэргэ бастакы медицинскэй көмөнү миэстэтигэр оҥоруу баар буоларыгар эрэбил улахан диэн Приморье кыраайын Сокуону оҥорор Мунньаҕын пресс-суолууспата иһитиннэрэр.