Приморье кыраайын Сокуону оҥорор Мунньаҕын депутаттарын ааттарыттан председатель Виктор Горчаков Ил Түмэн 20 сылынан эҕэрдэтигэр республика парламенын үбүлүөйэ охсуулаах үлэ үөһүгэр барбытын бэлиэтээтэ.«Россия Дальнай Востогу баһылааһыныгар уонна Чуумпу акыйаан диэки тахсыытыгар Саха сирин историческай оруолун бэлиэтээбэт буолар табыллыбат. Нуучча улуу экспедицияларын ситиһиилэрэ эһиги көмөҕүтүттэн уонна өйөбүлгүтүттэн улахан тутулуктааҕа. Бүгүҥҥү күҥҥэ республика үрдүк экономическай көрдөрүүлэрдээҕинэн, олоҕо бигэ туруктааҕынан уратылаах. Ону сэргэ эһиги норуот үгэстэрин итиэннэ национальнай культураҕытын чөл тутары ситиспиккит үчүгэй. Бу манна олохтоох дьону сомоҕолуур күүһүнэн уонна ыаллыы регионнарга үтүө холобурунан буолар. Саха сиригэр бары барыта баар, арай муостаҕыт суох, ол эрээри ити көтүтүү сотору кэминэн көнүөҕэ», -- диэтэ Виктор Горчаков.

 

Ил Түмэн 20 сылын бэлиэтиир тэрээһиннэр кэмнэригэр биллибитинэн, Приморье кыраайын парламенын спикерин ити баҕарыыта олоххо киирэр буолла.  Ол курдук «ВТБ Капитал» баһылыктаах консорциум Саха сиригэр Өлүөнэни туоруур муоста тутуутун куонкуруһугар кыайда. Онон кыайыылаах Өлүөнэ өрүһү туоруохтаах 21 км. усталаах муостаны, ол иһигэр онно 18 км. усталаах ирбэт тоҥ усулуобуйатыгар тардыллыахтаах суоллары, тутар эбээһинэһи ылынна. “Росавтодор” бу муостаны 2021 сылга тутан бүтэрэри былааннаабыт.

 

Оттон “Дальнай Восток уонна Забайкалье” Парламеннар Ассоциацияларын председателэ Виктор Чудов Ассоциация Саха сирин Государственнай Мунньаҕын көҕүлээһиннэригэр өрүү болҕомтотун уурарын бэлиэтээтэ: «Эһиги юридическай өттүнэн үчүгэй бэлэмнээххит уонна дьон олоҕун тупсарыы өттүн күүскэ тутаҕыт. Биһиги маннык суолталаах социальнай уонна экономическай көҕүлээһиннэри өйүүргэ өрүү бэлэммит».

 

Александр Жирков кинилэргэ харда тылыгар Саха сирин Государственнай Мунньаҕын 20 сыллаах историческай кэрдиис кэмэ республика саҥа государственноһын уонна инники сайдыытын сокуон өттүнэн хааччыйар кэминэн буолбутун бэлиэтээтэ. “Аан бастакы күннэриттэн ыла Государственнай Мунньах иннигэр улахан суолталаах сорук турбута – государственнай былааһы үлэлэтэр, киини кытта хардарыта бииргэ үлэлээһин саҥа көрүҥнэрин булар, республикаҕа парламентаризм сайдыытын саҥа таһымыгар тахсар туһугар Российскай Федерация биир кэлим политическай уонна экономическай правовой хонуутугар республика статуһун бигэргэтии”. Ити курдук Ил Түмэн үөрүүлээх түгэнинэн сибээстээн, Парламеннар Ассоциацияларын чилиэннэрин ааттарыттан элбэх үтүө тыл этилиннэ.