Юрий Баишев мунньах саҕаланыытыгар Ыччат парламена Ил Түмэн үлэлиир болдьохторугар сөп түбэһэн үлэлиирин быһыытынан, ааспыт ыҥырыыга үлэлээбит Ыччат парламена үлэтин отчуоттаан, боломуочуйатын тохтотуохтааҕын, салгыы саҥа састаап талыллан үлэлиэхтээҕин бэлиэтээн эттэ. “Ыччат правительствота уонна Ыччат парламена үлэлииллэрэ наадалаах. Итини таһынан республика Президенигэр Ыччат политикатын Сэбиэтэ тэриллэн үлэлиэхтээх. Республика салалтата бэлиэтээбитинэн, Ыччат парламена уонна Ыччат правительствота кыайан бииргэ үлэлээбэтилэр, ыкса сибээһи тутуспатылар. Инникитин СР Президенигэр Ыччат политикатын Сэбиэтэ кинилэр бииргэ үлэлииллэрин сүрүннүүр буолуо. Сэбиэт ылыммыт дьаһалларын Ыччат политикатыгар министерство, Ыччат парламена, Ыччат правительствота олоххо киллэриигэ үлэлиэхтэрэ. V ыҥырыыга үлэлиэхтээх Ыччат парламенын саҥа састааба Ыччат правительствотын кытта дуогабар түһэрсэннэр, ыччат политикатын соруктарын олоххо киллэриигэ бииргэ үлэлиэхтээхтэр,” -- диэтэ депутат.

 

IV ыҥырыылаах Ыччат парламена талыллыбыт болдьоҕун устатыгар туох үлэни ыыппытын туһунан отчуоту бу тэрилтэ председателэ Николай Фомин оҥордо. Кини Ыччат парламена 2008 сыллаахха от ыйын 22 күнүгэр Ил Түмэн 193 №-дээх уурааҕынан аан бастаан тэриллибитин ахтан туран, эдэр парламентарийдар республика ыччатын политикатын эйгэтигэр ыыппыт үлэлэрин иһитиннэрдэ. Ыччат парламенын састаабыгар 70 чилиэн үлэлээбит: 36 чилиэн – улуустартан, 16 чилиэн – общественнай холбоһуктартан,  10 чилиэн – үөрэх кыһаларын, 8 чилиэн -- партиялартан бэрэстэбиитэллэр. 2008 сыллаахха ахсынньыга Ыччат парламенын IV ыҥырыытын састааба талыллан, 7 сис кэмитиэт таҥыллан, үлэтин сүрүн хайысхалара быһаарыллыбыт.

 

Отчуоттанар кэм устатыгар барыта 137 араас ис хоһоонноох тэрээһиннэр, 12 уопсай мунньахтар ыытыллыбыттар, 14 улууска Ыччат парламенын салаалара тэриллибиттэр, федеральнай уонна республикатааҕы суолталаах 18 сокуону көҕүлээһин бэлэмнэммит.

 

“Олортон ааттыыр буоллахха, “РФ-ҕа ыччат государственнай политикатын төрүттэрин туһунан” федеральнай сокуон барылыгар этиилэрбитин 2009 сыл кулун тутарыгар Госдума көрүүтүгэр ыытан турабыт. Салгыы “СР хотугу уонна арктическай оройуоннарыгар үлэҕэ ыытыллар медицинскэй үлэһиттэргэ, эдэр специалистарга социальнай мэктиэлэр тустарынан”, “СР-гар ыччат государственнай политикатын туһунан” республика сокуоннарын барылларыгар көннөрүүлэри, “1941-1945 с.с. сэбиэскэй норуот Аҕа дойду Улуу сэриитигэр кыайыытын үйэтитии туһунан” федеральнай сокуоҥҥа уларытыылары киллэриигэ үлэлээбиппит”, -- диэн туран, Ыччат парламенын лидерэ ити кэм устатыгар эдэр парламентарийдар ыыппыт чаҕылхай уонна суолталаах бырайыактарын, саҕалааһыннарын туһунан кэпсээтэ.

 

Ити кэнниттэн Ыччат парламенын чилиэннэрэ IV ыҥырыыга үлэлээбит бэлиэ түгэннэрин ахтан-санаан тураннар, саҥа талыллыахтаах састаапка бэйэлэрин баҕа санааларын тиэртилэр. Ол курдук Сунтаар улууһун Элгээйи нэһилиэгин баһылыга Гаврил Яковлев, Ыччат парламенын эппиэттиир секретара Лиза Эверстова, Ыччат парламенын бастакы председателэ Михаил Кудрин, чилиэннэр Владимир Аммосов, Савва Михайлов, Раиса Контоева уонна да атыттар тыл этэн кытыннылар. Кинилэри кытта ыкса үлэлээбит IV ыҥырыылаах Ил Түмэн депуттаттара Александр Подголов, Сергей Сюльскай Ыччат парламенын бастакы хардыыларын, ситиһиилэрин бэлиэтээтилэр. Республика араас улуустарыттан Ыччат парламеныгар түмсэн үлэлээбит эдэр дьон Ил Түмэн иһигэр бииргэ алтыһаннар, доҕордоһоннор, сокуону оҥорор үлэҕэ улахан уопуту ылбыттара ахтылынна.

 

Бу күн Ыччат парламенын ааспыт ыҥырыытыгар көхтөөхтүк үлэлээбит Михаил Кудриҥҥа, Николай Фомиҥҥа республика вице-президенин Махтал суруга, Владимир Аммосовка СР Дьиэ кэргэҥҥэ, ыччат политикатыгар министерствотын Махтал суруга, Ыччат парламенын бочуоттаах грамоталара Александр Подголовка, Сергей Сюльскайга, Галина Кондаковаҕа, Евгений Самсоновка уо.д.а. атыттарга туттарылыннылар. Юрий Баишев Ыччат парламенын актыбыыстарыгар туһаайан: “Ыччат парламеныгар үлэлээҥҥит олох оскуолатын ааһыыгыт эһиэхэ тугунан да кэмнэммэт сыаналаах уопутунан буолар. Инникитин да ити уопут эһиэхэ күүс-көмө буолуоҕа”, -- диэн эттэ.

 

Ыччат парламенын мунньаҕа салгыы “СР Ыччат парламенын туһунан” республика сокуонун барылын итиэннэ IV ыҥырыылаах Ил Түмэҥҥэ үлэлээбит Ыччат парламена боломуочуйата тохтуурун туһунан быһаарыылары ылынна.