Бары нэһилиэнньэлээх пууннарга Александр Уаров быыбардааччыларын кытта көрсөн, V ыҥырыылаах Ил Түмэн үлэтин сиһилии билиһиннэрдэ. Ити көрсүһүүлэргэ нэһилиэнньэ өттүттэн тыа хаһаайыстыбатын сайыннарыы хайысхатынан ордук элбэх ыйытыылар киирдилэр: үүт сыанатын үрдэтии, туттарыллыбыт үүт иһин төлөбүрү кэмигэр төлөөһүн уо.д.а. Ону таһынан нэһилиэнньэ «сэрии тулаайахтара» диэн саҥа социальнай чэпчэтиилэри көрүүнү туруорсар. Ону тэҥэ, 1935 -- 1945 сылларга төрөөбүт дьон «сэрии оҕолоро» саҥа категорияны олохтуур туһунан ыйыталаһаллар. Дьон-сэргэ эдэр специалистары олохсутар сыалтан – врачтарга, учууталларга – олорор дьиэлэри тутар туһунан эттэ.

 

«Сунтаар улууһугар олорор дьиэлэри электричествонан ититиигэ холбооһун салгыы ыытыллар, билигин 2 800 ыал холбонно. Российскай Федерация Бүтүн аан дойдутааҕы тэрилтэҕэ киирбитин кэннэ айылҕа гааһын сыаната 2 – 2,5 төгүл үрдээтэ. Ол иһин Бүлүү бөлөх сорох улуустарын олохтоохторо гаастан аккаастанар туһунан этэллэр. Оттон Сунтаар улууһугар электричествонан ититиигэ холбонуу күргүөмнээхтик бара турар. Оннооҕор -50°С тымныыга бу холбоммут ыаллар ортотунан иккилии тыһыынча солкуобайы төлөөбүттэрэ, ону таһынан кинилэргэ дотация үбэ төлөммүтэ. Ити барыта Сунтаарга саҥа подстанция тутуллуутун түмүгэр ситиһилиннэ. Саҥа подстанциялар ситимнэрин тутуу Сунтаар улууһун олохтоохторун дьиэлэрин электричествонан ититиигэ толору көһөрөр кыаҕы биэриэҕэ. Онон айылҕа гааһыгар сыана үрдүү турарын учуоттаатахха, итинник ититиигэ көһүү быдан ордуга көстөр”, -- диир Александр Уаров.

 

Норуот депутатын Сунтаарга сырыытын кэмигэр улуус саамай ыраах сытар кырыы нэһилиэгэр Бүлүүчээҥҥэ диэри суол тутуутун боппуруоһа дьүүлгэ турда. «Өскөтүн Бүлүүчээҥҥэ диэри суол оҥоһулуннаҕына, Сунтаар улууһун 26 нэһилиэгэ сылы төгүрүччү сылдьар суолунан хааччыллыаҕа», - диэтэ Хонтуруоллуур кэмитиэт председателэ. Итини таһынан, кини бэлитииринэн, улууска толору хааччыллыылаах чааһынай дьиэлэри туттар буолан эрэллэринэн Уус-Алдан улууһун 16 нэһилиэгиттэн баһылыктар кэлэн уопут атастаһан барбыттар. Рабочай сырыытын кэмигэр норуот депутата сааскы халаан уутугар ылларбыт уон дьиэ кэргэҥҥэ сылдьыбыт.

 

Александр Сергеевич бу сырыытыгар муус устар 11 күнүгэр 13 №-дээх Сунтаардааҕы быыбардыыр уокурукка парламеҥҥа болдьоҕун иннинэ ыытыллыахтаах быыбарга “Биир ньыгыл Россия” партия кандидаты талар праймериһыгар кыттар ААО «Стерх» региональнай страховой компания генеральнай директора, IV ыҥырыылаах Ил Түмэн депутата Семен Березины өйүүр үлэни ыытта. Александр Уаров этэринэн, праймеризка үс кандидат кыттыбыт, онуоха Семён Березин барыларыттан элбэх куолаһы ылан кыайыыны ситиспит. Ил Түмэн Хонтуруоллуур кэмитиэтин председателэ барыллаан куоластааһын кэмигэр биир дойдулаахтарын көхтөөх кыттыыларын бэлиэтээтэ. Ити куоластааһыҥҥа, норуот депутата этэринэн, быыбардааччылар 62 бырыһыаннара кыттыбыт.

 

«Барыллаан куоластаабыттартан 93%-на Семен Березин кандидатуратын өйөөтө. Аҕытаассыйалыыр үлэни ыыппыт нэһилиэнньэлээх пууннарбар 95% өйөөтүлэр, оттон төрөөбүт нэһилиэкпэр, Бордоҥҥо, нэһилиэнньэ кинини 100% өйөөтө», - диэн эттэ Александр Уаров. Онон 2014 сыл балаҕан ыйыгар 13 №-дээх Сунтаардааҕы быыбардыыр уокурукка парламеҥҥа болдьоҕун иннинэ ыытыллыахтаах быыбарга «Биир ньыгыл Россия» Семен Березины кандидатынан туруорар буолла.

 

Александр Уаров Сунтаар улууһугар сырыытын кэмигэр быйыл кулун тутарга саҥа талыллыбыт Сунтаар бөһүөлэгин баһылыга Эдуарда Филиппов дуоһунаһын тутар сиэригэр-туомугар кыттына. Манна даҕатан эттэххэ, Александр Уаров парламеҥҥа үлэлээбитэ 20 сылын туолуутунан сибээстээн, биир дойдулаахтара анаан-минээн чиэстээтилэр, элбэх эҕэрдэ, барҕа махтал тылларын эттилэр.

 

Ил Түмэн депутата улууска ыыппыт приемугар 26 киһи кэлбит. «Уон сайабылыанньаҕа тута быһаарыы ылылынна, 16 – үлэҕэ сылдьар», - диэн Хонтуруоллуур кэмитиэт председателэ Александр Уаров рабочай сырыытын түмүктэрин туһунан иһитиннэрдэ.