Норуот депутата Александр Уаров Госдумаҕа икки күннээх командировкатыгар республика Тыатын хаһаайыстыбатын уонна аска-үөлгэ политикатын министерствотын иһинэн үлэлиир Консультационнай-методическай киин директора, Ил Түмэн I уонна IV ыҥырыытын депутата Афанасий Софронеевы кытта бииргэ сылдьан, консультационнай өҥөлөргө республикаҕа Россияттан харчы кэлиитин туруорустулар.

 

Депутат этэринэн, киин үлэтигэр Россия 60 бырыһыан хос үбүлээһини көрүөхтээҕэ хас да сылтан бэттэх кэлбэт буолбут. Аҥардас республика бюджетыттан эрэ сыл аайы 18 мөлүйүөн солкуобай көрүллэр. Онон тиийбэт тирбэҕэ, тарпат тараһа кырыымчык үбүлээһининэн үлэлээн кэллэ. Оттон Россия бюджетыттан бу сыалга көрүллэр 23 мөлүйүөн солкуобайдаах үбүлэһини оҥоһуллубат.

 

“Мин билэрдии Госдума Бюджекка уонна нолуокка кэмитиэтин салалтатыгар сылдьан, федеральнай киинтэн консультационнай өҥөлөргө республикаҕа Россияттан үбүлээһин барбатын туһунан кэпсэттибит. Кэмитиэт бэрэссэдээтэлэ Андрей Михайлович Макаров биһигини болҕойон истэн баран, биир дойдулааххыт көмөлөһүөҕэ диэн бастакы солбуйааччытыгар Глеб Яковлевич Хорга сорудахтаата. Глеб Хор Дьокуускай куоракка оскуоланы бүтэрбитэ, кини Госдума үһүс ыҥырыытыгар Бюджет уонна нолуок кэмитиэтин бэрэссэдээтэлин бастакы солбуйааччы үлэтин таһынан, Крымҥа эппиэттээх киһинэн ананан үлэлиир. Телефонунан болдьоһоммут, Г.Я.Хор бэрт начаас кэлэн, биһигини кытта  көрсөн кэпсэтэн барда. Глеб Яковлевич кэмитиэтин аппараатыгар туһааннаах дьаһаллары биэрэн, РФ Тыатын хаһаайыстыбатын министригэр Николай Васильевич Федоровка сурук ыыттарда. Өйөммүт дьон быһыытынан РФ Тыатын хаһаайыстыбатын министерствотыгар сырыттыбыт. Бэйэбит өттүбүтүттэн тыа хаһаайыстыбатын боппуруостарынан дьарыктанар СР Правительствотын Бэрэссэдээтэлин солбуйааччы Петр Николаевич Алексеев итиэннэ Ил Түмэнтэн Хонтуруоллуур кэмитиэт бэрэссэдээтэлэ илии баттааһыннаах суруктары министр Николай Федоровка туттардыбыт. Николай Васильевич биһигини субсидиянан быһаччы дьарыктанар департамент салайааччытыгар Юрий Николаевич Егоровка киллэрэн, аны сайын министр от ыйыгар Саха сиригэр кэлэригэр тыа хаһаайыстыбатын боппуруостарыгар РФ Тыатын хаһаайыстыбатын уонна аска-үөлгэ политикатын министерствотын көһө сылдьар коллегиятын ыыта кэлэригэр ити үбүлээһини быһаарарын курдук, туруорсар докумуоннарбытын онно эмиэ туттардыбыт”, -- диэн Александр Уаров Ил Түмэн пресс-сулууспатыгар иһитиннэрдэ.

 

Кэпсэтии быһыытынан, туруорсуллар боппуруос, Россия субъектарыгар Консультационнай-методологическай кииннэри өйөөһүҥҥэ 60 бырыһыаннаах федеральнай үбүлээһини көрүү, сотору Госдумаҕа РФ бюджетын корректировкатын дьүүллэһии кэмигэр Правительство этиитин быһыытынан киириэхтээх. Онуоха тирэх докумуоннарынан 2014 сылга ыам ыйын 1 күнүгэр В.В.Путин илии баттааһыннаах сорудахтар кэрискэлэрэ бааллар. Муус устар 21 күнүгэр В.В.Путин РФ Президенигэр тыа сирин сайыннарыыга, нэһилиэнньэ олоҕун таһымын үрдэтиигэ Сэбиэт мунньаҕар ылыммыт быһаччы дьаһалыгар олоҕуран, тыа сиригэр үлэлиир кыра уонна орто предпринимательствоҕа баан өҥөлөрүн оҥорууга, субсидиялары ылыыга, бизнес-былааннары оҥорууга, дьиэ кэргэнинэн бааһынай хаһаайыстыбаларын, тэрээһиннээх хаһаайыстыбалары тэриниигэ тыа сирин дьонугар-сэргэтигэр көмөнү оҥоруу, күүстээх сырдатар үлэни ыытыы өйөнүөхтээх. Улуустарга информационнай-консультационнай кииннэр баар буолуохтаахтар.

 

“Госдумаҕа тиийэн, итинник кэпсэтэн араҕыстыбыт. Онон ситиһиилээх командировка буолла дии саныыбын. Федеральнай бюджекка корректировканы оҥоруу кэмигэр ити этэр 23 мөлүйүөн солкуобайдаах федеральнай үбүлээһини туруорсуубут быһаарылларыгар эрэллээхпит”, -- диэн кэпсээтэ Александр Уаров.