Ил Түмэн спикерин бастакы солбуйааччы, норуот депутата, Россия уонна Саха сирин спордун маастара, өрөспүүбүлүкэ атах оонньууларыгар Федерациятын президенэ, атах оонньууларыгар бэйэтин кэмигэр кимиэхэ да иннин биэрбэтэх спортсмен Анатолий Добрянцев бэс ыйын 21 күнүгэр Олоҥхо ыһыаҕар ыытыллыбыт атах оонньууларын кыайыылааҕар, Хаҥалас улууһун кынаттаах кылыыһытыгар, улуус биир кэрэ сиринэн аатырыан аатырар Сиинэттэн, дьаамсыктартан төрүттээх Егор Филипповка “Уаз-Охотник” массыына күлүүһүн туттарда.
“Үс төгүл сэттэ” диэн өбүгэ саҕаттан кэлбит атах оонньууларыгар кыайар туһугар 9 быһый кииристэ: Хаҥаластан Егор Филиппов, Иван Пестряков, Филипп Федоров, Амматтан Альберт Никитин, Мэҥэ-Хаҥаластан Георгий Жирков, өрөспүүбүлүкэ спордун маастара Виктор Тихонов, Еремей Ильин, Ньурбаттан Россия, өрөспүүбүлүкэ спордун маастара, “Манчаары оонньууларын” үс төгүллээх чемпиона Виталий Васильев, Бүлүүттэн Леонид Григорьев. Хас бииридии көрүҥҥэ көрдөрүүнү муҥутуурдук тупсарар иһин кынаттаах кылыыһыттар түөртүү төгүл ыстаннылар.
Ити тоҕус чулуу быһыйдартан Хаҥалас улууһун Сиинэ нэһилиэгиттэн төрүттээх быһый Егор Филиппов саамай муҥутуур үчүгэй көрдөрүүнү -- 80 м 64 см – ситистэ. Онон Егор Филиппов ”Анаабыр алмаастара” генеральнай директора Матвей Евсеев “УАЗ” массыынатынан наҕарааданар чиэскэ тигистэ. Иккис бочуоттаах миэстэҕэ 76 м 32 см ыстаммыт Уус-Алдан быһыйа Иван Пестряков таҕыста, үһүс бочуоттаах миэстэҕэ Мэҥэ-Хаҥаластан сылдьар Виктор Тихонов 73 м 75 см ыстанан, үчүгэй көрдөрүүнү ситиһэн, тигистэ.
Онон өрөспүүбүлүкэ атах оонньууларыгар Федерациятын президенэ, Ил Түмэн спикерин бастакы солбуйааччы Анатолий Добрянцев Олоҥхо ыһыаҕын киэргэлинэн буолбут атах оонньууларын кыайыылаахтарыгар сыаналаах бириистэри, наҕараадалары бар дьон биһирэбилин ортотугар үөрүүлээх быһыыга-майгыга туттарда.
Ил Түмэн пресс-сулууспата
Опубликовано: 23 июня, 2014 - 16:56
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!