Бу дьыл балаҕан ыйын бүтүүтүгэр, “Бичик” кинигэ кыһатыгар кыргыз омук улуу айымньыта, төрүт эпоһа, кыргыз омугу түмэ туппут Манаас бухатыыр туһунан улахан айымньы сахалыы тылбаастанан, ааҕааччы киэҥ араҥатыгар тахсыахтаах. От ыйын 31 күнүгэр (Ил Түмэн) Государственнай мунньаҕын спикера Александр Жирков салайыытынан айымньыны тылбаастыыр бөлөх үлэ хаамыытын ырытта.

 

Сүбэ мунньахха профессор, филологическай наука доктора Василий Илларионов, педагогическай наука кандидата Тамара Петрова, «Күрүлгэн» литературнай публицистическай альманах редактора Афанасий Гуринов-Арчылан, Самаганова Анна, ХИФУ Олоҥхо научнай-чинчийэр институтун директорын солбуйааччы Сергей Васильев уонна “Бичик” кинигэ кы´атын редактора Мария Илларионова кыттыыны ыллылар.

 

Кыргыз омук Манаас бухатыырын туһунан төрүт айымньыта аан дойдуга биир сүдү историческай айымньыннан биллэр. Кини кээмэйэ, эриирдээх-бутуурдаах ис хоһооно, тылын баайа айымньыны ааҕарга ылсыбыты эрэ сөхтөрөр. Ол иһин ааспыт үйэ 20-с сылларыттан саҕалаан кыргызтар бэйэлэрэ айымньыны ааҕымтыа буоллун диэн хаста да төхтүрүйэн, норуот эпоһын ис өйдөбүлүн хаалларан туран, судургутутан тураллар. 2002-2005 сылларга кыргызтар ытыктанар суруйааччылара, драматург, профессор Бексултан Жакиев айымньыны өссө кылгатан таһаарбыттаах. Сахалыы тылбаас бу кинигэҕэ олоҕурар.

 

Александр Жирков иһитиннэрбитинэн тылбаас хара үлэтэ бүппүт. Билигин тылбааһы чочуйуу, көннөрүү үлэтэ бара турар. “Бу балай эмэ кэми ылыыһык”, - диэн Александр Николаевич эттэ. “Биһиги, сүрүн болҕомтобутун айымньы саха ааҕааччытыгар өйдөнүмтүө, дэбигис ааҕымтыа буоларыгар ууруохтаахпыт”, - диэн мунньах салайааччыта тоһоҕолоото.

 

Кыргыз омугун “Манааһа” саха сиригэр тахсыахтаах “Эпические памятники народов мира” диэн кинигэ тиһигэр бастакы тылбаастаммыт айымньыннан буолуохтаах. Ил Түмэн председателэ Александр Жирков: “Кэнэҕэскитин тылбааска анал научнай – редакторскай сэбиэт тэрийэн, араас омук эпическэй айымньыларын сахалыы тылбаастыырга үлэлэһиэхпит”, - диэн тыл эттэ. “Оччотугар атын омуктар эпическай баайдарын түмэн илдьэ сылдьааччы саха омуга буолуо этэ”, - диэтэ спикер. “Манаас” сахалыы тылбаастанан тахсыыта Кыргызста²²а “Дьулуруйар Ньургун Боотур” кыргызтыы тылынан тахсыахтаах. “Бу биһиги бэйэбит олоҥхобутун атын омук тылларыгар тарҕатарбытыгар күүс-көмө буолуо этэ”, - диэн мунньах салайааччыта иһитиннэрдэ. Номнуо алтай, башкир омуктарын “Маадай-Кара”, “Урал-Батыр” уонна “Дьулуруйар Ньургун Боотуру” хардарыта тылбаастыыр туһунан кэпсэтии барбыт. “Дириҥ ис хоһоонноох кинигэ тиһигин маҥнайгы хараҥаччыта -  “Манаас” бухатыыр туһунан сүдү айымньы төһө табыллыбытын сотору кэминэн саха ааҕааччыта бэйэтэ сыаналыа”, - диэн (Ил Түмэн) Государственнай мунньаҕын председателэ Александр Жирков мунньаҕы түмүктээтэ.