Бүгүн, ахсынньы 12 күнүгэр, Былатыан Ойуунускай аатынан Саха академическай театрыгар сахалыы тылынан тахсар хаһыаттар холбоһуктаах дьоро киэһэлэрэ – сахалыы бэчээт 90 сылыгар аналлаах өрөгөйдөөх биэчэр буолан ааста.
Тэрээһиҥҥэ Саха Республикатын Государственнай Мунньаҕын вице-спикерэ Александр Жирков, парламент наукаҕа, үөрэхтээһиҥҥэ, культураҕа уонна сонуну киэҥник тарҕатар ситимнэргэ сис кэмитиэтин бэрэссэдээтэлэ Елена Голомарева кытыннылар, бэйэлэрин эҕэрдэлэрин эттилэр, Ил Түмэн наҕараадаларын туттардылар.
Бүгүн биһиги республикабытыгар тахсар сахалыы тыллаах хаґыаттар 1921 сыллаахха аан бастаан күн сирин көрбүт «Манчаарыттан» утум тардаллар. Бу хаһыат тахсарыгар саха чулуу уолаттара Платон Ойуунускай, Исидор Барахов, Анемподист Софронов уонна да атыттар улахан өҥөлөөхтөр. Саха республикатыгар сахалыы тылынан тахсар хаһыакка уруккуттан ураты болҕомто ууруллар.
Сахалыы тыллаах бэчээт 90 сыл устата уһулуччулаах суолу ааста, атаҕар туран, сайдан, баай историяланна, симэлийбэт дьылҕаланна. Сахалыы хаһыаттар республикаҕа буолар бары быһыы-майгы тыыннаах туоһута, быһаччы кыттааччыта буолаллар.
Бүгүҥҥү «Саха сирэ», «Кыым» уонна да атын сахалыы тыллаах хаһыаттар саҥа кэмҥэ сөп түбэһэн аныгылыы сэргэх сирэйдээхтэр, ол гынан баран үтүө үгэстэри өрө туталлар, салгыы сайыннараллар. Кинилэр саха дьонун санаатын былаас истиитигэр, былаас ыытар политикатын норуокка тиэрдэр трибунанан буолаллар. Сахалыы хаһыаттар саха дьонун-сэргэтин санаатын түмэргэ, бөҕөргөтөргө улаханнык үлэлэһэллэр.
Александр Жирков уонна Елена Голомарева республика парламенын наҕараадаларын сахалыы суруйар чаҕылхай суруналыыстарга туттардылар. Ил Түмэн Бочуоттаах грамотата Нина Герасимоваҕа, Татьяна Марковаҕа, Раиса Сибиряковаҕа, Петр Павловка туттарылынна, парламент бэрэссэдээтэлин Махтала Данил Макеевка, Саргылана Даниловаҕа, Татьяна Захароваҕа, Михаил Семеновка биллэрилиннэ.
Ил Түмэн пресс-сулууспата
Спасибо!