Саха Республикатын Государственнай Мунньаҕын (Ил Түмэн) бэрэссэдээтэлин солбуйааччы Александр Жирков «Саха КВН оскуолата» бастакы республикатааҕы кыһыҥҥы лааҕыр сабыллыытыгар сылдьан, республика араас улуустарыттан кэлбит оҕолордуун көрүстэ.
«Саха КВН лигата» кэнники сылларга туспа суоллаах-иистээх, сыаллаах-соруктаах общественнай түмсүү быһыытынан киэҥник биллэн эрэр. «Дьон КВН ыччаты иитиигэ төһүү күүс буоларын өйдөөн эрэр,» – диир лига президенэ Геннадий Охлопков. Дэлэҕэ даҕаны, Саха КВН быйылгы Ыччат баалыгар Ил Түмэн иһинэн үлэлиир Ыччат парламенын кытары тэҥҥэ республикатааҕы ыччат бастыҥ түмсүүлэрин ортолоругар ааттаныа дуо?
Саҥа дьыллааҕы сынньалаҥ кэннэ республика араас муннуктарыттан сүүстэн тахса оҕо «Бэс чагда» санаторийга «Саха КВН оскуолата» диэн бастакы республикатааҕы кыһыҥҥы лааҕырга муһунна. Тэрийээччилэринэн «Саха КВН лигата» общественнай түмсүү, общественнай оҕо холбоһуктарын сойууһа уонна үөрэх министерствота буолаллар.
Бу оскуола номнуо үһүс сылын үлэлиир. Ол эрэн, бу иннинэ эдэр КВН-щиктар сайын мусталлара. Быйылгы кыһыҥҥы оскуола сүрүн сыалынан оҕолор оонньуур маастырыстыбаларын үрдэтии, КВН теориятын баһылааһын, сцена кистэлэҥнэрин билии буолар. Маҥнайгы сезон үөрүүлээх сабыллыытыгыгар КВН-щиктар бу биэс күн тугу баһылаабыттарын көрдөрөр күрэх буолла. Ил Түмэн вице-спикерэ, «Саха КВН лигатын» бочуоттаах президенэ Александр Жирков: «Саха тылын баайын ыччакка төнүннэриигэ улахан болҕомто ууруллуохтаах. Хомойуох иһин, билигин ордук ыччат ортотугар тылы-өһү бутуйан туттуу түгэнэ наһаа үксээтэ. Ыччат сахалыы тылынан сатаан туттубат, куорат оҕолорун этэ да барбаккын. Туох-ханнык иннинэ оҕо бэйэтин төрөөбүт төрүт тылынан, Јксөкүлээх убайбыт этэринии, ийэтин үүтүн кытта эмсэхтэммит тылынан саҥарыахтаах. Олох эйгэтигэр бастаан төрөөбүт тылынан киирбит, саҥарбыт оҕо толору кыахтаах, бары өттүнэн сайдыылаах буолар диэн оннооҕор науканан дакаастанан турар. Саха киһитэ санаатын сахалыы сатаан сааһылаан этэр эрэ буоллаҕына, кини биллэр-көстөр, бас-көс киһи буолар. Оҕо бэйэтин тылынан сайаҕастык саҥара үөрэнэрэ, санаатын сааһылаан этэрэ бэйэтиттэн эрэ буолбакка, төрөппүттэриттэн уонна оскуолатыттан эмиэ тутулуктаах. «Саха КВН лигатын» үлэтэ онно туһуланар. КВН ис-иһигэр киирдэххэ аҥардас көр-күлүү эрэ буолбакка, оҕону түргэнник бэйэ санаатын этэригэр, тобуллаҕас өйдөөх буоларыгар, сатаан мөккүһэригэр көмө буолар. Мөккүһүүгэ киһи ыгыллар, түмүллэр, санаатын төһө кыалларынан түргэнник уонна хотоойутук этиэн баҕарар. Аны туран, КВН-щик көрөөччү өйдүүрүн, күлэрин туһугар кыһаллыахтаах. Онон, КВН нөҥүө киһи элбэххэ сайдар.Чуолаан, тыл өттүгэр. Уруокка олордон күүс өттүнэн, мөҕөн-этэн үөрэппэккэ, оҕо баҕарарынан, көр-күлүү быыһыгар даҕаны үөрэтиэххэ сөп», - диэн бэлиэтээтэ.
КВН тула мустар дьон өссө хаҥыырын, ыччат бэйэтин төрөөбүт тылынан ылбаҕайдык саҥарарын туһугар маннык «албас» төһө кыалларынан киэҥ араҥаны хабарыгар биһиги көмөлөһө сатыахпыт, диэн эрэннэрдэ Александр Жирков.
Оҕолор 10 хонук устата КВН ымпыгар-чымпыгар уһуйулуннулар, ааранан эмтэннилэр, саҥа доҕордоннулар. Барыахпытын олох баҕарбаппыт дииллэр.
 
Кеша Бугуев, 5-с этэрээт, «От сыта» хамаанда капитана:
- Бу аҕыйах хонук иһигэр да буоллар, биһиги хамаандабыт олуһун түмүлүннэ, доҕордостубут. Мин бастакыбын маннык лааҕырга кэллим. КВН-ан дьарыктаммытым соччо ыраата илик, онон манна уһуйуллубутум миэхэ олус туһалаах.
 
Люба Иванова, 4-с этэрээт, «Ытыс-пытыс» хамаанда оонньооччута:
- Мин Дьокуускай куорат 26-с №-дээх орто оскуолатын «Дьикти дьон» КВН хамаандатыгар оонньуубун. Лааҕырга наһаа элбэх доҕордоннум, сайынным. Инникитин даҕаны маннык лааҕырдар ыытылла турдуннар.
 
Айсена Федотова, баһаатай:
- Лааҕырбыт олус тэрээһиннээхтик ааста. Ол эрэн аҕыйах хонук буолбута биир өттүнэн хомолтолоох. Оҕолор манна үөрэммит билиилэрин оонньууга ситэ туһамматылар. Ол да буоллар, сайдыылаах, бэһиэлэй, наһаа үчүгэй оҕолор кэлбиттэрэ киһини үөрдэр. Биһиги «КВН», «фристайл», «сцена» уо.д.а. терминнэри быһааран, сценаҕа хайдах тутта-хапта сылдьыахтаахтарын туһунан кэпсээтибит, үөрэттибит.