Республика биллиилээх государственнай, политическай уонна общественнай деятелэ, Саха АССР Үрдүкү Сэбиэтин Бэрэссэдээтэлэ, РСФСР Үрдүкү Сэбиэтин Президиумун Бэрэссэдээтэлин солбуйааччы төрөөбүтэ 100 сылын бэлиэтиир тэрээһиннэр ааспыт сылтан саҕалаан ыытылла тураллар. Ол курдук олунньу 6 күнүгэр киэһэ 5 чаастан Саха драматическай театрыгар Александра Овчинниковаҕа аналлаах общественность үөрүүлээх мунньаҕа буолаары турар.

Ааспыт күһүн, 2014 сыл алтынньы 17 күнүгэр, киин куоракка Массыына суолун өрөспүүбүлүкэтээҕи бырабылыанньатын дьиэтигэр (Автодорожнай уулусса 10/2) А.Я.Овчинникова аатынан республика суолун хаһаайыстыбатын Музейа аһыллыбыта.  Ити дьоһун суолталаах сиэргэ-туомҥа Ил Түмэн Бэрэссэдээтэлэ Александр Жирков уонна спикери бастакы солбуйааччы Анатолий Добрянцев, сис кэмитиэттэр бэрэссэдээтэллэрэ Алексей Еремеев, Антонина Григорьева, Василий Местников, Юрий Николаев, Александр Корякин, Дмитрий Саввин, Владимир Прокопьев, САССР Үрдүкү Сэбиэтин ХI ыҥырыытыгар Президиум Бэрэссэдээтэлинэн үлэлээбит, Саха Өрөспүүбүлүкэтин кырдьаҕастарын Ытык сүбэтин салайааччыта Люлия Григорьева, Александра Овчинникова төрөппүт кыыһа үрдүк категориялаах учуутал, үлэ ветерана Елена Алексеевна Иванцова, СӨ Транспорга, суол хаһаайыстыбатыгар министрэ Семен Винокуров, Ньурба улууһун баһылыга Борис Попов, суол хаһаайыстыбатын бырабылыанньатын кэллэктиибэ, суол салаатын ветераннара, бочуоттаах ыалдьыттар кыттыбыттара.

 

Музейга А.Я.Овчинникова улахан портрета, витриналарга уонна саала эркиннэригэр Александра Овчинникова олоҕун уонна үлэтин, өрөспүүбүлүкэҕэ суол сайдыытын кэрэһилиир экспозициялар бааллар. Александра Яковлевна кэтэ сылдьыбыт ачыкылара, тута сылдьыбыт ридикуль-суумкалара, кини туһунан кинигэлэр, Саха сирин суолларын сайыннарыы салаатыгар сүүрбэччэ сыл айымньылаахтык үлэлээн, тугунан да кэмнэммэт улахан кылаатын киллэрбитин кэрэһилиир докумуоннар , суруктар, публикациялар уо.д.а. бэлиэтээтэ. Ити экспозициялартан А.Я.Овчинникова “Сунтаар-Ньурба, Сунтаар-Тойбохой”, “Сунтаар-Сиэйэ-Дьокуускай-Улахан Невер” итиэннэ Покровскай, Майа, Амма суолларын тутууга тахсыылаахтык үлэлэспитэ көстөр.

 

Александра Овчинникова эрдэ аҕата суох хаалбыта, атын дьиэ кэргэҥҥэ иитиллибитэ, ыалга хамначчыттаабыта. Ииппит аҕатын көмөтүнэн оскуолаҕа киирэн үөрэммитэ. Комсомол ыҥырыытынан Суол-тутуу техникумугар киирбитэ. 20 сааһыгар суол тутааччынан үлэтин биографиятын саҕалаабыта. Үлэтигэр бастыҥ көрдөрүүлэрин иһин 1945 сыллаахха “1941-1945 с.с. Аҕа дойду Улуу сэриитигэр килбиэннээх үлэтин иһин” мэтээлинэн, 1947 сыллаахха – “Үлэҕэ килбиэнин иһин” мэтээлинэн наҕараадаламмыта. 1948 сыллаахха киниэхэ "РСФСР бочуоттаах суолу тутааччыта” аат иҥэриллибитэ.

 

Техникуму бүтэрбитэ сүүрбэ сыл ааспытын кэннэ эрэ үрдүк үөрэх туһунан диплому 1945 сааһыгар ылбыта. Саха АССР Министрдэрин Сэбиэтигэр, ССКП Дьокуускай куораттааҕы кэмитиэтигэр эппиэттээх дуоһунастарга үлэлээбитэ. 1963 сыллаахха Саха АССР уонна РСФСР Үрдүкү Сэбиэттэригэр депутатынан тэҥинэн талыллыбыта. Саха АССР Үрдүкү Сэбиэтин бастакы сессиятыгар А.Я.Овчинникова Үрдүкү Сэбиэт Президиумун Председателинэн талыллыбыта. Ол кэмҥэ кини РСФСР Үрдүкү Сэбиэтин депутатынан, Президиумун чилиэнинэн уонна Президиум Председателин солбуйааччынан талыллыбыта.