Альбина Поисеева Таатта улууһун салалтатын, нэһилиэнньэтин кытта көрсүһүүлэригэр, ордук чуолаан, тыа сиригэр олорооччулар коммунальнай өҥөлөрү төлөөһүҥҥэ көрүллэр субсидияны хайдах туһанан олороллорун, онно тустаах докумуоннары оҥоруу, туттарыы туһунан кэпсэттэ.
 
Депутат бу боппуруоска биир уустугунан тыа сирин дьонун баһыйар өттө чааһынай мас дьиэҕэ олороллоро, оттуктарын, иһэр ууларын маһынан-мууһунан хааччылаллара буоларын, онно коммунальнай өҥөҕө оҥоһуллар субсидияны ылар уустуктардааҕын, инникитин ол судургутуйуохтааҕын бэлиэтээтэ.
 
Альбина Поисеева: «Ол инниттэн Ил Түмэн үс кэмитиэтэ – Дмитрий Наумов бэрэссэдээтэллээх аграрнай политикаҕа уонна тыа сиригэр сис кэмитиэтин кытта Николай Костромин бэрэссэдээтэллээх тутууга уонна дьиэҕэ-уокка, коммунальнай хаһаайыстыбаҕа сис кэмитиэтэ уонна доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтэ - буолан кэлэр олунньу ый диэки бу боппуруоһу эбии билсиһэ, үөрэтэ уонна туһааннаах өттүгэр тустаах нормативнай правовой докумуоннары оҥорон ылынарга туһаайан Дьиэ-уот-коммунальнай хаһаайыстыба министиэристибэтин «Субсидия агенствота» кыттыылаах парламеннааҕы истиилэри ыытыахтаахпыт», диэтэ.
 
Альбина Поисеева Чурапчы улууһугар нэһилиэнньэни, салалтаны кытта көрсүһүүтүгэр социальнай боппуруостары дьүүллэһии туһунан кэпсииригэр Аҕа Дойду улуу сэриитин кэмигэр чурапчылары көһөрүү быйыл 70 сылыгар анаан улахан мунньаҕы ыыппытын кэпсээтэ. Кини Саха сиригэр быйыл сомоҕолоһуу уонна норуоттар доҕордоһууларын сыла уонна Россия үрдүнэн государство историятын сыла биллэриллибиттэринэн сибээстээн дьүүллэһиллибит боппуруостар суолталара улаханын бэлиэтээтэ. Бу мунньахха Саха Республикатын правительствотын бэрэссэдээтэлин солбуйааччыта Феодосия Габышева, культура уонна духуобунай сайдыы миниистирэ Андрей Борисов кыттыбыттара тэрээһини кэҥэппитин эттэ. Бу мунньахха көһөрүүгэ ыытылла сылдьыбыттар, бэтэрээннэр кыттыбыттар, тыл эппиттэр, кэккэ боппуруостары туруорсубуттар. Ол туруорсууларга көһөрүүлээхтэри Дьокуускайдааҕы гериатрическэй кииҥҥэ, профилакторийдарга эмтэтэ, доруобуйаларын көннөрүнэ, чэбдигирдэ ыытарга, итиэннэ аны сайын көһөрүллэн олорбут Булуҥ, Эдьигээн, Кэбээйи улуустарын нэһилиэктэригэр баран кэлэллэрин тэрийиигэ, ол улуустартан хардары онно хаалбыт, олохсуйбут көһөрүүллүүлээхтэр оҕолорун-ыччаттарын Чурапчыга аҕалан сынньалаҥ лааҕырга сырытыннарыыга, Физкультурнай институкка үөрэххэ киирэллэригэр көмөлөһөргө уонна көһөрүллүүлээхтэр пенсияларын эбии көрөргө этии киллэрбиттэр. Маны кэккэ, мунньах кыттыылаахтара көһөрүллүүлээхтэргэ анаан Чурапчыга 32 квартиралаах олорор дьиэ тутулла турарын этэн туран, оннук иккис дьиэни тутууну түргэтэтэргэ туруорустулар.
 
Түмүгэр, Альбина Поисеева суруйааччы Баһылай Харысхал Москваҕа РФ кылаабынай архыыбыгар үлэлии сылдьан булан ылбыт чурапчылары көһөрүүгэ сыһыаннаах кистэлэҥ докумуон копиятын Чурапчытааҕы көһөрүллүү музейыгар туттарбытын көһөрүллүү кыттыылаахтара улаханнык долгуйан туран ылыннылар диэн эттэ. 
 
Депутат Тааттаҕа уонна Чурапчыга нэһилиэнньэни, салалтаны кытта көрсүһүүлэригэр дьүүллэһиллибит боппуруостар Ил Түмэн тустаах кэмитиэттэринэн көрүллүөхтэрэ диэн өссө биирдэ бэлиэтээтэ.
 
Ил Түмэн пресс-сулууспата