Саха Республикатын народнай депутата, Государственнай Мунньах (Ил Түмэн) бүддьүөккэ, үпкэ, түһээн уонна сыана бэлиитикэтигэр, бас билии уонна приватизация боппуруостарыгар сис кэмитиэтин бэрэссэдээтэлэ Александр Уаров олунньу 1 күнүттэн 11 күнүгэр диэри Бүлүү, Ньурба уонна Сунтаар улуустарыгар үлэлиирэ былааннанар.
 
Депутат сырыытын сүрүн сыала-соруга – Ил Түмэн уонна салайар кэмитиэтин ааспыт сыллаах үлэтин-хамнаһын отчуоттааһын буолар. Маны таһынан Александр Уаров нэһилиэк баһылыктарын, улуус активын уонна быыбардааччылары кытта көрсөрө былааннанар.
 
Көрсүһүүлэргэ кини дойду уонна республика президеннэрин анал этиилэрин, маны тэҥэ премьер-министр бүтэһик ыстатыйаларын туһунан киэҥ хабааннаах кэпсэтиини ыытыаҕа.
 
Бастаан Александр Уаров Бүлүү улууһугар тиийэр. Ол курдук, олунньу 1 күнүгэр Хампаҕа уонна Таҕаһарга, олунньу 2 күнүгэр – Чинэкэҕэ уонна Бөтүҥҥэ сылдьара былааннанар.
 
Бээтинсэ күн, олунньу 3 күнүгэр, депутат Бүлүү куоратыгар үлэлиир, онно «Кэскил» култуура дьиэтигэр үөрэх, култуура уонна доруобуйа харыстабылын үлэһиттэрин кытта көрсөр, маны таһынан олохтоох телевидениеҕэ уонна радиоҕа аһаҕас эфиргэ тахсан көрөөччүлэр ыйытыктарыгар хоруйдуура былааннанар.
 
Бүлүүгэ сылдьан баран Александр Уаров салгыы Ньурба уонна Сунтаар олохтоохторун кытта көрсөр.
 
Ил Түмэн пресс-сулууспата