Ил Түмэн делегациятын састаабыгар бюджекка, үпкэ, туһээн уонна сыана политикатыгар, бас билии уонна приватизация боппуруостарыгар сис кэмитиэт бэрэссэдээтэлэ Александр Уаров, Хонтуруоллуур кэмитиэт бэрэссэдээтэлэ Семен Олесов, дьиэ кэргэн, оҕо аймах, ыччат дьыалаларыгар, физкультураҕа уонна спортка сис кэмитиэт бэрэссэдээтэлэ Сергей Сюльскай, республика народнай депутата Андрей Илларионов, парламент аппаратын специалистара киирдилэр.

 

Маны таһынан көһө сылдьар мунньахха ДьУоКХ уонна энергетика министрин бастакы солбуйааччыта Владимир Тихонов, үп министрин солбуйааччыта Павел Багынанов, экономика уонна промышленнай политика министрин солбуйааччыта Наталья Дягилева, норуоттар дьыалаларыгар департамент салайааччыта Алексей Сергучев, «СР ДьУоКХ» ГУП кылаабынай инженерин солбуйааччыта Владимир Забуга уонна да атыттар сырыттылар.

 

Кэпсэтии Муома оройуонун 2012 сыллаах инвестиционнай тосхолун тула барда. Депутаттары таһынан кэпсэтиигэ муниципальнай тэриллии дьаһалтатын актыыба, бары нэһилиэктэр баһылыктара, үөрэх уонна доруобуйа харыстабылын, дьиэ-уот, коммунальнай хаһаайыстыба үлэһиттэрэ кытыннылар.

 

Сүрүн дакылааты экономика уонна промышленнай политика министрин солбуйааччыта Наталья Дягилева оҥордо, онно эбии иһитиннэриини – Муома улууһун баһылыга Петр Черемкин. Ил Түмэн депутаттара Александр Уаров, Семен Олесов, Сергей Сюльскай, Андрей Илларионов тыл эттилэр.

 

Санаа үллэстиитин кэнниттэн кэмитиэт чилиэннэрэ быһаарыы ылыннылар. Чуолаан, республика 2012 сыллаах бюджетыгар уларытыылары киллэриигэ уонна 2013 сыллаах бюджеты таҥааһыҥҥа муомалар киллэрбит этиилэрин учуоттуох буоллулар. Мунньах бүтүүтүгэр депутаттар уонна министерстволар бэрэстэбиитэллэрэ Муома нэһилиэктэрин баһылыктарын ыйытыыларыгар хоруйдаатылар, табаһыттары наҕараадалааһын буолла.

 

Улууска парламентарийдар «Көһө сылдьар ыал» республикатааҕы конкурска, хотугу норуоттар культураларын фестивалыгар, табаһыттар күрэхтэригэр сырыттылар. Маны таһынан Александр Уаров, Семен Олесов, Сергей Сюльскай, Андрей Илларионов «Саха сирин үтүөкэн дьоно» серияҕа тахсыбыт Гаврил Слепцов-I туһунан кинигэ сүрэхтэниитигэр уонна «Муома улууһугар табаны иитии проблемалара уонна кэскилэ» диэн төгүрүк остуолга кытыннылар.

 

Төгүрүк остуол Муома бастыҥ табаһыттара, Ленин орденын кавалера, герой ийэ Д.Д.Корякина уонна Саха Республикатын тыатын хаһаайыстыбатын үтүөлээх үлэһитэ Г.П.Слепцов 100 саастарыгар анаммыт. Манна сүрүн дакылааты улуус тыа хаһаайыстыбатыгар управлениетын начальнига Павел Мараказов оҥордо. Дакылаакка бэлиэтэммитинэн, кэнники кэмҥэ Муомаҕа таба ахсаана биллэ аччаабыт, бу сыл тохсунньутун 1 күнүнээҕи туругунан 15 580 таба баар эбит. Салаа сүрүн проблемалара – таба өлүүтэ элбэх, тугут төрөөһүнэ аҕыйах. 2011 сыллаахха табаны иитиини өйөөһүҥҥэ республикатааҕы уонна федеральнай бюджеттартан 35 мөл 190 тыһ. солкуобай бэриллибит. Бу үп толору туттуллубут. Санаа үллэстиитин түмүгэр мэктиэлэри ылыннылар.