Республика Төрүт Сокуонугар Президент туһунан ыстатыйаҕа бу дуоһунаһы сахалыы уларытыыга общественность бэрэстэбиитэллэрин кытта Ил Түмэн депутаттарын көҕүлүүр бөлөҕө үлэлээтэ. Республика үрдүкү дуоһунастаах салайааччытын сахалыы ааттаныытын дьүүллэһиигэ норуот депутаттара Елена Голомарева, Зоя Корнилова, Оксана Винокурова, республика Общественнай палататын бэрэссэдээтэлэ Василий Иванов, палата чилиэнэ Иван Шамаев, «Биир ньыгыл Россия» партия аграрнай салаатын салайааччыта Василий Эляков, «Кут-сүр» общественнай тэрилтэ салайааччыта Акулина Васильева «Бичик» кинигэ кыһатын кылаабынай редактора Валерий Луковцев, Ыччат парламенын чилиэннэрэ уонна да атыттар кыттаннар, субъект салайааччытын сахалыы аатыгар үрдүкү салайар дуоһунаһы көрдөрөр элбэх араас санаалары эттилэр.

 

Көҕүлүүр бөлөх бу ааттар төрүт суолталарын, атын омуктар саҥарыыларыгар төһө хомоҕойдук иһиллэрин, саха омугун историческай үгэһигэр төһө сөп түбэһэрин сиһилии бары өттүттэн ырытта. Кэпсэтиилэр түмүктэригэр сүнньүнэн икки этиини, «Ил Дархан» уонна «Дархан» диэн ааттар ордуктарын, бэлиэтээтилэр. «Ил» диэн тыл түүр тылыгар норуот биир государствоҕа түмүллүүтүн, или-эйэни, сөбүлэһиини бэлиэтиир тыл буоларынан государственность өйдөбүлүгэр сөп түбэһэр. Түүр тылыттан силис-мутук тардар «дархан» диэн тылбыт үрдүкү, бас-көс, сис дьону, солону бэлиэтиир суолталаах.

 

Оттон ветераннар Сэбиэттэрин дьүүллэһиитин Анатолий Гольдман иилээн-саҕалаан ыытта. Манна кэпсэтиилэргэ кыттыбыт Дмитрий Пухов, Федор Федоров, Николай Шарин, Кирилл Павлов, Петр Одорусов республика Президенин дуоһунаһын государственнай солону көрдөрөр сахалыы аакка уларытыыга баар этиилэри ырыттылар уонна Конституционнай хамыыһыйа быһаарыытын өйөөтүлэр. Онон кинилэр республика үрдүкү дуоһунастаах салайааччыта нууччалыы «глава», сахалыы «баһылык» диэн буолуохтааҕын ордордулар.