Республика сүүмэрдэммит хамаандатын састаабыгар Уус-Алдантан 13 эдэр спортсмен киирбит: Виктория, Надя Гороховалар, Анжела Черноградская, Валерия Сигаева, Дарияна Потапова, Дария, Сандра Карамзиналар, Петр Павлов, Афанасий Вензель (көҥүл тустуу), Айан Аманатов (бокс), Ульяна Румянцева (чэпчэки атлетика) уонна саахыматчыттар Айсен Прокопьев, Василий Васильев.

 

Көрсүһүүгэ Уус-Алдан улууһун баһылыга Валериан Троев, кини солбуйааччыта Лена Заболоцкая, улуус дьаһалтатын эппиэттээх үлэһиттэрэ, хамаанда салайааччыта Федот Мигалкин уо.д.а. кытыннылар.

 

Тэрээһин саҕаланыытыгар бастаан алгыс этилиннэ, арчы сиэрэ-туома ыытылынна. Ол кэннэ эдэр спортсменнарга туһаайыллыбыт сүбэлэр, баҕа санаадар этилиннилэр.

 

«Биһиги республикабытыгар буолуохтаах «Азия оҕолоро» споривнай оонньууларга Аан дойду араас дойдуларыттан ыалдьыттар, спортсменнар кэлэн кытталлар. Тустууктар айаннаан иһэллэр, боксердар кэлэн куустээхтик бэлэмнэнэ сылдьаллар, саахыматчыттар эмиэ… Бу оҕолор – эһиги саастыылаахтаргыт, кинилэри бука барыларын кыайыылаах-хотуулаах, түөскүтүгэр мэтээллээх, наҕараадалаах кэлээрин диэн алҕаан, арчылаан ыыталлар. Онон бу улахан дойдулартан талыллан кэлбит оҕолору кытта утарыта көрсөр, кыайар сүрдээх уустук буолуо. Тустууга буоллун, боксаҕа буоллун, сүүрүүгэ буоллун, саахымакка буоллун – куоһанан аҕай, тэриллэн аҕай, тыбыыран аҕай иһэллэр. Кыайыыга туруулаһыылара улахан буолуохтаах. Онно дьэ түһэн биэримэҥ, кытаатан кыаххытын ыһыктымаҥ, бэйэҕитигэр эрэлгитин умнумаҥ. Кыайыыга дьулуур наада, хайаан да күрэстэһээччибиттэн ордукпун диэн санаалаах кириэхтээххит. Көрүҥүн, дьүһүнүн, туттарын-хаптарын көрөн саллымаҥ. Мин кыайыахтаахпын диэн санаа баар буолуохтаах, оннук санаалаах буоллаххытына, оччоҕуна кыайыыны ситиһиэххит», - диэн сүбэлээтэ Ил Түмэн вице-спикерэ Александр Жирков.

 

Депутат оҕолорго үтүө холобур быһыытынан Лондон куоракка буолуохтаах Олимпиадаҕа кыттар быраабы ситиспит саха кыыһын Кристина Тимофееваны аҕалла.

 

«Горнай улууһун кыыһа оҕунан ытыыга Россия спортивнай чиэһин көмүскүөҕэ. Туох да улахан айдаана суох бу быраабы ситистэ. Кини билигин 18 саастаах, оттон эһиги 10-15 саастааххыт, анны 3-4 сылынан дьарыккытын бырахпакка сырыттаххытына, Аан дойдуга аатырыаххыт», - диэтэ Александр Жирков.

 

Парламент вице-спикерэ эппитинэн, Дьокуускайга бу күннэргэ улахан ыалдьыттар кэлэн, биһиги күрэхтэһиибитин көрө, хайдах тутуулардаахпытын, олохпутун- дьаһахпытын көрүөхтэрэ, билсиэхтэрэ. «Бу күрэхтэһиигэ республикабыт ыччата спортка сыһыаннааҕын, дьулуурдааҕын дакаастыахтаах, биһиги спорду сэҥээрэр норуот буоларбытын көрдөрүөхтээхпит. Чэ, кытаатыҥ, эрчиллиҥ, тренергит, үөрэнэр оскуолаҕыт, улуускут, республикаҕыт аатын түһэн биэримэҥ! Ситиһиилэри!», - диэн бэйэтин этиитин түмүктээтэ депутат.