Биллэрин курдук, бюджет сылы этэҥҥэ тахсар биир саамай сүрүн сокуоммутунан буолар. Төгүрүк тулаайах уонна төрөппүт көрүүтэ-истиитэ суох хаалбыт оҕолору бырааптарын толору толорор туһуттан сокуон барыла бэлэмнэммитин туһунан үп министрэ иһитиннэрдэ. Ол курдук, 2012 сылга 285 тулаайах оҕону 204 мөл. солк. суумалаах олорор дьиэнэн хааччыйар туһунан былаан баара. Ити былааннаммыт сууманы уларытар, элбэтэр туһуттан бюджекка уларытыы киирдэ. Ол курдук, бу сыалга-сорукка 699 мөл. солк. өрөспүүбүлүкэ, 105 мөл. солк. федеральнай бюджеттарыттан үп угуллуоҕа. Министр манна үп АЛРОСА хампаанньа дохуотуттан, акцияларын дивидениттэн угуллуоҕа диэн бэлиэтээтэ.

 

Өрөспүүбүлүкэ государственнай бюджетын дохуоттаах чааһа 2 240 345 тыһ. солк. улааппыт уонна сабаҕалаан көрдөрүү 116 117 404 тыһ. солк. тэҥнэспит. Оттон бюджет ороскуоттаах чааһа 126 713 640 тыһ. солк. тэҥнэспит.

 

Ааҕар-суоттуур палаата бэрэссэдээтэлэ Егор Марков этэринэн, бюджекка киллэриллэр уларытыылар сокуоҥҥа эппиэттииллэр диэн ыйда.

 

Ил Түмэн тустаах кэмитиэтин бэрэссэдээтэлэ Александр Уаров бу боппуруоска кэмитиэт киэҥ ыҥырыылаах мунньах ыыппытын, онно үгүс норуот депутаттара кыттыбыттарын туһунан эттэ. Кини бюджет кэмитиэтэ баһаарынай хамаанда курдук суһаллык үлэлииллэрин туһунан бэлиэтээтэ. Александр Сергеевич: өрөспүүбүлүкэ Президенин сокуоҥҥа көҕүлээһинин депутаттар өйүүллэригэр ыҥырда уонна бюджекка уочараттаах уларыйыы аны күһүн киириэ диэн бэлиэтээтэ. Кини Ааҕар-суоттуур палаата туһунан бэйэтин санаатын эттэ. Ол курдук, палаата Ил Түмэн уорган буоларын быһыытынан, депутаттар этиилэригэр болҕомтолоохтук сыһыаннаһыахтаах, түмүктэри, ырытыылары кылгас, чуолкай гына оҥоруохтаах диэн бэлиэтээтэ.

 

Депутат Ньургун Тимофеев ыам ыйыгар өрөспүүбүлүкэ инвестиционнай программатыгар уларытыылар киллэриллибиттэр дуо диэн ыйыталаста. Маныаха правительство бэрэссэдээтэлин бастакы солбуйааччы Алексей Стручков: «Сокуоҥҥа сөп түбэһиннэрэн, өрөспүүбүлүкэ инвестиционнай программатыгар уларытыылар муус устар ыйга киллэриллибиттэрэ», - диэн хоруйдаата. Ньургун Семенович мантан күһүн программаҕа өссө уларытыылар киириэхтэрэ дуо ыйытыытын өссө кэҥэтэн биэрдэ. Алексей Стручков: «Билиҥҥитэ итинник быһаарыныы суох», - диэн хардарда.

 

Депутат Дмитрий Наумов: «Обществоҕа биир саамай ыарыылаах, тулаайах оҕолору олорор дьиэнэн хааччыйыы туһунан боппуруоһу дьүүллэһэ олоробут. Биһиэхэ, депутаттарга, үөрэхтэрин бүтэрбит, ыал буолбут тулаайах ыччаттар приемҥа кэлэ сылдьааччылар. Кинилэри хаһан эрэ күн сирин көрбүт сирдэригэр олорор дьиэнэн хааччыйаллар. Үөрэхтэрин бүтэрбит дьон атын сиргэ үлэлиэхтэрин баҕараллара баар суол. Итини учуоттуохтаахпыт. Олорор дьиэ инниттэн үлэтэ суох хаалан хаалыахтара дии. Үөрэх министерствота манна анал хамыыһыйа тэрийиэхтэрин наада», - диэн олус туһалаах этиини оҥордо. Кини маны таһынан аһыыҥка туруутун боппуруоһун таарыйда.

 

Депутат Зоя Корнилова: «Үөрэх министерствота тулаайах уонна төрөппүт көрүүтэ-истиитэ суох хаалбыт оҕолор ханна дьиэ ылалларын испииһэктэрин толору оҥорон, хас биирдиилэрин хонтуруолга тутуохтаахпыт. Кинилэргэ анаан государство кырата суох үбү көрдө», - диэн эттэ. Кини тулаайах оҕолорго хаачыстыбата суох дьиэни туталларын туһунан эмиэ аҕынна. Ол курдук, Дьокуускай куорат Автодорожнай уулуссатыгар тулаайах оҕолорго анаан тутулла турар дьиэ хаачыстыбата мөлтөҕүн, ону хонтуруолга ылыахха диэн Зоя Афанасьевна этии киллэрдэ.