Биллэрин курдук, ыам ыйын 2 күнүгэр Россия урукку президенэ Дмитрий Медведев Российскай Федерация субъектарын саамай үрдүкү дуоһунастаах сирэйдэрин быыбардааһын туһунан федеральнай сокуоҥҥа илии баттаабыта.

 

40 №-дээх федеральнай сокуоҥҥа олоҕуран, итиннэ туһуламмыт Российскай Федерация субъектарын сокуоннара бу сыл от ыйын 1 күнүгэр диэри ылыллыахтаахтар. Тустаах докумуоҥҥа өрөспүүбүлүкэ баһылыгын талар быыбарга гражданнар быыбардыыр бырааптара, быыбары анааһын бэрээдэгэ, быыбар хамыыһыйаларын боломуочуйалара уонна ситимэ (система), туруорунар кандидакка ирдэбиллэр, быыбар иннинээҕи аҕытаассыйаны ыытыы бэрээдэгэ, быыбары үбүлээһин ирдэбиллэрэ, куоластааһын уонна быыбар түмүгүн таһаарыы бэрээдэктэрэ ыйылла сылдьаллар.

 

Тустаах федеральнай сокуоҥҥа саҥа сүүрээннэр баалларын туһунан урукку да өттүгэр суруйан турабыт. Ол курдук, субъект баһылыгар дуоһунаһыгар кандидат муниципальнай тэриллиилэр бэрэстэбиитэллээх уорганнарын депутаттарын эбэтэр муниципальнай быыбардарга талыллыбыт улуус баһылыктарын 5-тэн 10-ҥа диэри бырыһыан илии баттааһыннарын хомуйуохтаахтар.

 

Маны таһынан кандидаттар Российскай Федерация субъектарын муниципальнай оройуоннарын уонна куораттарын уокуруктарын бэрэстэбиитэллээх уорганнарын депутаттарын эбэтэр муниципальнай быыбардарга талыллыбыт улуус баһылыктарын өйөөбүттэр бырыһыаннара 5-тэн 10 бырыһыаҥҥа диэри тиийиэхтээх. Кандидат ыйыллыбыт сирэйдэр Российскай Федерация субъектарын муниципальнай оройуоннарын уонна куораттарын уокуруктарын ыйыллыбыт сирэйдэрин түөрт гыммыттан үстэригэр өйөнүөхтээх.

 

Ити саҥа сүүрээннэр өрөспүүбүлүкэ сокуонун барылыгар эмиэ ыйылыннылар. Ол курдук, тустаах докумуоҥҥа үөһээ ыйыллыбыт кээмэй 5 бырыһыанынан быһылынна. «Түөрт гыммыттан үстэригэр» диэн оннунан хаалла. Аны ити илии баттаһыннар нотариуһунан бигэргэниэхтээхтэр. Кандидат өйүүр лиис формата докумуоҥҥа ыйыллыбыт. Бары илии баттааһыннар Киин быыбардыыр хамыыһыйа бэрэбиэркэтин ааһаллар. Аны ити илии баттааһыннар нотариуһунан бигэргэниэхтээхтэр. Кандидат өйүүр лиис формата докумуоҥҥа ыйыллыбыт. Бары илии баттааһыннар Киин быыбардыыр хамыыһыйа бэрэбиэркэтин ааһаллар. Сыыһанан ааҕыллар илии баттааһыннар төрүттэрэ, биричиинэлэрэ тустаах сокуон барылыгар бэлиэтэммит. Илии баттааһын сыыһанан ааҕылыннаҕына, саҥа лиискэ хос илии баттааһын көҥүллэнэр. Онон кандидаты өйүүр илии баттааһыны хомуйуу төһөнөн түргэнник ыытыллар да, оччонон барыстаах дии саныыбын.

 

Маны таһынан депутаттар уонна муниципальнай тэриллии баһылыктара биир кандидаты өйөөн илии баттыахтаахтар. Биһиги өрөспүүбүлүкэбитигэр үөһээ ыйыллыбыт сирэйдэр ахсааннара 5497-ҕэ тэҥнэһэр. Онон өрөспүүбүлүкэ баһылыгар кандидат барыта 275 илии баттааһыны хомуйуохтаах. Маны таһынан 27 улууһу хабыахтаахтар.

 

Биллэрин курдук, «Сиэрдээх Россия» партия фракцията тустаах сокуоҥҥа бэйэлэрин көннөрүүлэрин киллэрбиттэрэ. Бу тула депутаттар дьүүллэстилэр. Ол курдук, сиэрдээхтэр биир сүрүн туруорсууларынан демократическай обществоҕа олорорбутунан, кандидакка бэйэни туруорунуу нуормата киириэхтээх диэн көннөрүү киллэрбиттэрин депутаттар өйөөбөтүлэр. Элбэх үптээх-харчылаах араас дьон аҕа баһылыгынан кандидакка туруохтарын сөп. Урукку быыбардарга үгүс регионнар итини эттэринэн-хааннарынан билэн-көрөн тураллар.

 

Онон өрөспүүбүлүкэ олохтоохторо кэлэр өрөспүүбүлүкэ аҕа баһылыгын саҥа сокуонунан талыахтара