Правительствоҕа субэ мунньах буолла
Бишкек. М.К. Аммосов төрөөбүтэ 115 сыла туолуутун тэрийэр республикатааҕы комиссия солбуйар председателэ, Ил Түмэн вице-спикерэ Александр Жирков көрдөһүүтүнэн Кыргызстан Республикатын Правительствотын Председателин солбуйааччы Гульнара Уметовна Асымбекова Кыргызстаҥҥа М.К. Аммосовка аналлаах тэрээһиннэргэ сүбэ мунньах оҥордо. Мунньахха Кыргызстан Республикатын Президенин уонна Правительствотын администрациятын уонна туһааннаах министерстволар эппиэттээх үлэһиттэрэ кытыннылар. Мунньах кыттыылаахтарыгар Ил Тумэн вице-спикерэ М.К. Аммосов төрөөбүтэ 115 сыла туолуутун көрсүһүүгэ Саха Республикатыгар уонна Москва куоракка ыытыллар дьаһаллар тустарынан кэпсээтэ. Ити кэнниттэн Александр Жирков Кыргызстаҥҥа М.К. Аммосов аатын үйэтитиигэ Саха Республикатын этиилэрин иһитиннэрдэ.
Салгыы М.К. Аммосов төрөөбүтэ 115 сыла туолуутун Кыргызстан Республикатыгар бэлиэтээһин туһунан сүбэлэһии буолла. Кыргызстан Республикатын вице-премьерэ М.К. Аммосовка аналлаах тэрээһиннэри салайар Правительственнай комиссия тэрийэргэ сорудах биэрдэ. Сүбэ мунньах быһаарбытынан Кыргызстан киин куоратыгар Бишкеккэ М.К. Аммосов төрөөбүтэ 115 сылыгар аналлаах тэрээһиннэр бу дьыл балаҕан ыйын 17-19 күннэригэр ыытыллыахтара. Бишкеккэ Саха сириттэн 50-ча киһилээх официальнай уонна культурнай делегация барыаҕа. Делегация Кыргызстан Правительствотыгар уонна Парламеныгар официальнай көрсүһүүлэргэ кыттыаҕа, 1938 с. репрессияҕа түбэспит сүүһүнэн дьону ытан өлөрөн баран барыларын биир ииҥнэ бырахпыт сирдэригэр оҥоһуллубут мемориалга– Ата-Бэйиткэ венок ууруоҕа (бу сир 1991 сыллаахха булуллубута. Дьону ытыалаан баран кирпииччэ оҥорор завод оһоҕо турбут хаспаҕар бырахпыттара. Бу дьон ортолоругар оччотооҕу Киргизскэй ССР салайааччылара, М.К. Аммосов соратниктара бааллара. Бу сымыйанан буруйданан ытыллыбыт дьон ортотуттан Чингиз Айтматов бэйэтин сураҕа суох сүппүт аҕатын – Торокул Айтматовы булбута), Бишкек куоракка М.К. Аммосов бюст-памятнигын аһыллыытыгар сылдьыаҕа. Бишкеккэ Саха Республикатын норуот маастардарын оҥоһуктарын быыстапката, Кыргызстан уонна Саха сирин артыыстарын холбоһуктаах концера, уо.д.а. тэрээһиннэр буолуохтара. Кыргызстаҥҥа Саха Республикатын делегациятын Республика Президенэ Е.А. Борисов салайан барара күүтүллэр.
Жогорку Кенешкэ – Кыргызстан парламеныгар
Кыргызстан Республикатын Жогорку Кенеһин - Парламенын Председателин бастакы солбуйааччы Торобай Зулпукаров Саха Республикатын Судаарыстыбаннай Мунньаҕын (Ил Түмэнин) Бэрэссэдээтэлин солбуйааччы Александр Жирковтуун көрүстэ.
Торобай Зулпукаров Кыргызстан Россияны уонна кини регионнарын кытта хардарыта сыһыаҥҥа ураты болҕомтону уурарын туһунан эттэ. Кини Кыргызстан уонна Саха сирин икки ардыларыгар урут уруккуттан олохсуйбут бэйэ – бэйэни өйдөһүү, доҕордуу сыһыан салгыы бөҕөргүүрүгэр баҕалаахтарын бэлиэтээтэ.
Александр Жирков Торобай Зулпукаровка Саха Сирин туһунан, экономика, культура, олохтоох омуктар олохторун туһунан, Республика салалтатын үлэтин туһунан сиһилии кэпсээтэ. Түмүгэр Кыргызстан Парламенын Бишкек куоракка балаҕан ыйын 17-19 күннэригэр буолар М.К.Аммосов төрөөбүтэ 115 сылыгар анаммыт тэрээһиннэргэ кытталларыгар ыҥырда.
Торобай Зулпукаров Кыргызстан уонна Саха сирин ааттаах-суоллаах, бөдөҥ политическай деятелин М.К.Аммосовы Кыргызстанҥа үгүс киһи билэрин, ытыктыырын туһунан эттэ. Кыргызстан Парламенын Председателин бастакы солбуйааччы Кыргызстаҥҥа буолуохтаах М.К.Аммосовка аналлаах тэрээһиннэргэ Кыргызстан депутаттара көхтөөхтүк кыттыахтара диэтэ.
Итини таһынан Кыргызстан уонна Саха сирин парламеннарын вице-спикердэрэ бу икки өрөспүүбүлүкэлэр парламеннарын хардарыта сыһыаннарын, култууралара алтыһыытын кэҥэтэри уонна дириҥэтэри көҕүлүүр туһунан кэпсэттилэр.
Кыргызстан экс-президенэ М.К. Аммосов аатын үйэтитиини өйүүрүн туһунан эттэ
Кыргыстан экс-президенэ Роза Исааковна Отунбаева Кыргызстан Республикатыгар М.К. Аммосов аатын үйэтитиигэ Саха Республикатын өттүттэн тэрээһиннэри өйүүрүн туһунан иһитиннэрдэ. «Максим Аммосов Кыргызстаҥҥа үлэлээбит кэмигэр олохтоох дьону, кыргызстары саҥа үөскээбит союзнай республиканы салайыыга таһаарарга дьулуспута, репрессия кэмигэр национальнай интеллигенцияны көмүскэһэ сатаабыта. Кыргызстан союзнай республиката сайдарыгар кыһаллан үлэлээбитэ. Максим Аммосов аата Кыргызстан республикатын историятыгар сөптөөх сыанабылын ылыахтаах», – диэтэ Роза Отунбаева. Бу туһунан этиини кини Бишкеккэ М.К. Аммосов аатын үйэтитэр туһугар үлэни иилии-саҕалыы сылдьар М.К. Аммосов төрөөбүтэ 115 сыла туолуутун тэрийэр республикатааҕы комиссия председателин солбуйааччы Александр Жиркову кытта көрсүһүүгэ эттэ. Кыргызстан Президенин уонна Правительствотын резиденциятыгар буолбут бу көрсүһүүгэ кыргыз норуотун биллиилээх общественнай деятелэ, Чингиз Айтматов чугас үөлээннээҕэ, Кыргызстан Республикатын Геройа Бексултан Жакиев кыттыыны ылла. Александр Жирков көрдөһүүтүнэн Бексултан Жакиев Кыргызстан киин куоратыгар Бишкеккэ М.К. Аммосовка памятник-бюст туруоруллуутун көҕүлүүр бөлөҕү салайар.
Көрсүһүү түмүгэр Кыргызстан экс-президенэ бу дьыл балаҕан ыйын ортотугар М.К. Аммосов төрөөбүтэ 115 сылын туолуутугар аналлаах Бишкек куоракка ыытыллыахтаах тэрээһиннэргэ кыттар баҕалааҕын биллэрдэ.
Опубликовано: 6 августа, 2012 - 14:51
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!