Бу тэрээһин кыттыылаахтара Александр Жирков 2010 сыллаахха СР национальнай оскуолаларын института ыыппыт бүтүн республикатааҕы научнай-практическай семинарыгар кыттыбытын, онно оскуолаҕа киириэн иннинээҕи саастаах оҕолор тэрилтэлэрин үлэһиттэрин санааларын истэн-үөрэтэн баран олоҥхо персонажтарынан куукула таҥастарын уонна оҕолорго аналлаах театральнай көстүүмнэр моделларын оҥорууга республикатааҕы куонкуруһу тэрийэргэ этии киллэрбитин, оҕону төрүт култуураҕа иитиигэ улахан суолталаах бырайыак көҕүлээччитинэн буолбутун бэлиэтээтилэр. Бастакы республикатааҕы куоҥкурус 2011 сыл бүтэһигэр түмүктэммитэ, куукула таҥаһын оҥорууга, оҕо таҥаһын тигиигэ кыайыылаахтар ааттара ааттаммыттара.

«Олоҥхо:куукула таҥаһа» каталогка, киирии тылыгар, бырайыак ааптара, Олоҥхо уон сылын бэлэмнээн уонна тэрийэн ыытыыга Саха Республикатын Национальнай Тэрийэр Кэмитиэт бэрэссэдээтэлэ Александр Жирков олоҥхону, олоҥхолуур үгэһи, олоҥхо эйгэтин утумнааччынан – оҕо буоларын тоһоҕолоон бэлиэтээн туран: «Кыра оҕо эрдэҕиттэн олоҥхоҕо сыстыбатах, олоҥхону истибэтэх-билбэтэх киһи сааһыран баран олоҥхо эйгэлэнэрэ уустук. Онон олоҥхону харыстыырга кыһаныы, бастатан туран, олоҥхону оҕоҕо иҥэрэ, оҕону олоҥхоҕо уһуйа сатааһыны тутуһуохтаах. Итинник үлэ биһиги республикабыт үөрэҕин тэрилтэлэригэр, оҕо садтарыгар бастаан биирдиилээн бэртээхэй уһуйааччылар, үөрэтээччилэр, учууталлар, иитээччилэр көҕүлээһиннэринэн саҕаламмыта. Билигин бу эйгэ улам улаатан иһэр», диэн суруйар.

Каталог сүрэхтэниитин үөрүүлээх түгэнин киэргэппит Хатас 70№-дээх «Кэрэчээнэ» оҕо саадын иитиллээччилэрэ олоҥхо персонажтарын таҥастарын таҥнан киирэн, олоҥхоттон быһа тардан ыллаан-туойан, үҥкүүлээн көрдөрүүлэрэ учуонайдар, исписсийэлиистэр сэҥээриилэрин-сөҕүүлэрин ылыаҕын ылла.

Тэрээһиҥҥэ Российскай Федерация үөрэҕириигэ министиэристибэтин отделын салайааччытын солбуйааччыта Оксана Скоролупова, Саха Республикатын үөрэҕириигэ миниистирин солбуйааччы Евдокия Никифорова, М.К.Аммосов аатынан ХИФУ РФ Хотугу уонна Илиҥҥи норуоттар тылга уонна култуураҕа институтун кафедратын сэбиэдиссэйэ, СР Олоҥхо уон сылын бэлэмнээн уонна тэрийэн ыытыыга НТК чилиэнэ, музыка уонна фольклор музейын дириэктэрэ Аиза Решетникова, СР национальнай оскуолаларын институтун дириэктэрэ Светлана Семенова, «Бичик» кинигэ кыһатын  кылаабынай редактора Валерий Луковцев, «Олоҥхо: куукула таҥаһа» каталог научнай салайааччыта Нина Филиппова уонна улуустааҕы үөрэх салалтатын инспекторадара, республикатааҕы куонкурус кыттааччылара, оҕо иитэччилэрэ кытыннылар, тыл эттилэр, санааларын үллэһиннилэр.

Ил Түмэн Пресс-сулууспата.