Депутат Соболоох, Орто Дойду, Индигир нэһилиэктэригэр, оройуон киинигэр Хонууга сырытта, маны тэҥэ оройуон учууталларын мунньахтарыгар кыттыыны ылла.

 

«Билэргит курдук, быйыл сайын ордук тыа хаһаайыстыбатыгар уустук балаһыанньа үөскээтэ. Киин оройуоннар курааннаан, мобильнай биригээдэлэр тэриллэн, от үүммүт атын улуустарыгар тиийэн оттоотулар, манна элбэх үп-харчы, техника бэрилиннэ. Холобур Кэбээйи улууһугар тиийэн оттоотулар. Төһө да оттооһун уустугурбутун иһин сүөһү төбөтүн ахсаанын оннунан хаалларыы билигин республика үрдүнэн сүрүн соругунан турар. Сүөһүнү иитиигэ Саха Республикатын президенин Егор Борисов анал уурааҕа тахсан, төбө ахсаанын үбүлээһин улаатыаҕа. РФ тыатын хаһаайыстыбатын миниистирэ кэлэн барда, баар балаһыанньаны миэстэтигэр көрдө-биллэ. Онон федеральнай киинтэн көмө оҥоһуллуо. Маны сэргэ сылгыга, таба иитиитигэр ураты болҕомто ууруллуо. Ити курдук, тыа хаһаайыстыбата болҕомто киинигэр турар», - диэн кэпсээтэ «Индигир уоттара» хаһыакка Сергей Сюльскай.

 

Маны таһынан депутат, республикаҕа сайын ыытыллыбыт улахан тэрээһиннэргэ бэйэтин кыттыытын туһунан кэпсээтэ. Ол курдук, «Россия – спортивнай держава» Бүтүн Россиятааҕы форум, «Азия оҕолоро» V спортивнай оонньуулар олус тэрээһиннээхтик буолан ааспыттарын бэлиэтээтэ.

 

«Оонньууларга 28 дойду кытынна, 3 тыһыынча кэриэтэ киһи. Саха Республиката бастаабыта барыбыт сүргэбитин көтөхтө. Элбэх бөдөҥ саҥа объектар туһаҕа киирдилэр. Ол иһигэр «Триумф» спортивнай киин, «Чолбон» бассейн, «Дохсун» сабыылаах футбольнай манеж, «Модун» саха национальнай спортивнай көрүҥнэрин киинэ уо.д.а. Норуоттар икки ардыларынааҕы таһымнаах саҥа аэровокзал ити оонньуулары көрсө аһылынна. Бу барыта республика кэскилэ – оҕолор, ыччат чөл олохтоох, доруобай буоларыгар сүдү суолталаах тутуулар. Кэлэр оонньуу түөрт сылынан Дьокуускайга ыытыллыаҕа», - диэтэ депутат.

 

Кини кэпсээбитинэн, Ил Түмэн сааскы сессиятыгар биэс пленарнай мунньахха 252 нормативнай-правовой аакталар ылыллыбыттар, олортон 79-һа сокуон. 7 конституционнай сокуон ылылынна, 5 парламентскай истиилэр, 6 «правительство чааһа», 17 «төгүрүк остуол» буолан аастылар. Саха Республикатын президенин аатыгар уларытыы киэҥ дьүүлгэ турда.

 

Сергей Сюльскай кэпсээбитинэн, социальнай эйгэҕэ, оҕо аймах, дьиэ кэргэн, ыччат, физкультура, спорт дьыалаларыгар сыһыаннаах 9 сокуон ылылынна, олор олоҕу чэпчэтиигэ туһуланаллар.

 

«Бу үлэ барыта республика дьонун-сэргэтин туһугар ыытыллар. Биир дойдулаахтарым үлэни өрө тутан, олоҕу-дьаһаҕы айа-тута олороллоро астыннарар. Хас биирдиигитигэр ситиһиилээх үлэни, кытаанах доруобуйаны, дьиэ-кэргэҥҥэ туруктаах буолууну баҕарабын», - лиэе түмүктээтэ депутат.