Бу күн бастатан туран «норуот күүһэ – көмүөл күүһэ» диэн санаанан салайтаран тутуу идеятын көтөхпүт, үлэни-хамнаһы тэрийэн баҕа санаа олоххо киирэрин ситиспит дьон үтүмэн үлэлэригэр ананна. Балаҕан тутуутугар нэһилиэк оҕотуттан кырдьаҕаһыгар тиийэ олус элбэх киһи кыттыыны ылбыт.

 

Сиэдэрэй таҥастаах далбар хотуттар киирэр аартыгы сэлэлии туран, сахалыы сиэринэн кэлбит ыалдьыттары кымыстаах чороонунан, арыылаах алаадьынан айах туттулар. Ытык ыалдьыттарынан буоллулар Саха Республикатын народнай депутаттара - Ил Түмэн вице-спикерэ Александр Жирков, Хонтуруоллуур кэмитиэт бэрэссэдээтэлэ Семен Олесов, «Стерх» регионнааҕы страховой хампаанньа генеральнай директора Семен Березин, Уус-Алдан улууһун баһылыга Валериан Троев уонна да атыттар. Депутаттар саха балаҕана чээлэй күөххэ сууланан үгүс сыллар тухары дьону-сэргэни түмэ турдун диэн тутуу тула хатыҥ, талах мастары олортулар.

 

Салгыы ытыктабыллаах ыалдьыттар тутуу аһыллар бэлиэтин – аалай лиэнтэни кырыйыы сиэрин-туомун толорон, норуот тутуута бүгүҥҥүттэн ыла тигинэччи үлэлиир-хамсыыр суолун астылар. Дьоро күҥҥэ мустубут дьон хобо чуораан тыаһынан, арчылаах алгыс тылынан доҕуһуоллатан бука бары саҥа тутуу боруогун атыллаан киирдилэр. Алгыс этилиннэ.

 

Ил Түмэн вице-спикера Александр Жирков бу тэрээһин үрдүк таһымҥа ыытылла турарын, дьон санаата олус кэлэн, общественность бэйэтин баҕатын, күүһүн ууран үлэ кылгас кэм иһигэр түмүктэммитин, Мүрү нэһилиэгин дьаһалтата сөптөөх үлэни көҕүлээбитин, өйөөбүтүн урут бастаан бэлиэтээтэ.

 

«Бу балаҕан биһиги ыччаппыт, дьоммут-сэргэбит культурнай сайдыыта, билиитэ-көрүүтэ өссө кэҥииригэр, өрүү үүнэ, хаҥыы турарыгар тирэх буоларыгар, үтүө тыынынан илгийэригэр, көмүлүөк оһоҕун сылааһа хаһан да сөҕүрүйбэтигэр баҕарабын», - диэтэ депутат итиэннэ СР культураҕа уонна духуобунай сайдыыга министерствота саҥа аппаратураны бэлэх биэрэрин туһунан дьон-сэргэ ортотугар иһитиннэрдэ. Ил Түмэн бочуотунай грамотатын уонна кыһыл көмүс чаһытын чааһынай предприниматель П.М. Слепцов, Мүрү нэһилиэгин кылаабынай специалиһа А.И. Гуляев туттулар.

 

Депутат, "Стерх" страховой хампаанньа генеральнай директора Семен Березин: "Єбүгэбит суолун салгыыр сүдү тутуу оҕону, ыччаты өрүү тарда турдун. Инники өттүгэр эһиги улуускутугар былыргы Дьокуускай курдук комплекс тутуллар буоллаҕына уонна бу саха балаҕанын тутуутун биһиги араҥаччылыырга куруук бэлэммит", – диэн, дьон үөрүүтүн үксэттэ.

 

Улуус баһылыга Валериан Троев саха балаҕанын тутуута Уус-Алдан олохтоохторо түмсүүлээхтэрин көрдөрбүтүн бэлиэтээн туран, улууска духуобунас сайдыытыгар, норуот төрүт тыынын көлүөнэттэн көлүөнэҕэ иҥэриигэ өссө салгыы үлэ-хамнас ыытыллан, быйыл Олоҥхо дьиэтэ ситэриллэн үлэҕэ киирэрэ былааннанарын туһунан эттэ. Мүрү нэһилиэгин социальнай-экономическай сайдыытыгар кылаатын иһин анал бэлиэни чааһынай предпринимателлэр А.Д. Готовцев, П.М. Слепцов, Мүрү нэһилиэгин эр дьонун Сэбиэтин чилиэнэ Е.П. Бурнашев ыллылар. Мүрү нэһилиэгин баһылыгын бочуотунай грамотатынан Г.Г. Черноградскай, чааһынай предприниматель Н.П. Копырин наҕараадаланнылар. Махтал суруктарынан Г.Г. Бурнашев, А.А. Заболоцкай, Ф.К. Колодезников бэлиэтэннилэр.

 

Ыам ыйыттан саҕаламмыт тутууга маһын булууга, матырыйаалынан хааччыйыыга күүс-көмө буолбут, таһыытыгар үлэлэспит уонна бытовой техниканан көмөлөспүт дьоҥҥо Мүрү нэһилиэгин баһылыгын солбуйааччы Л.С. Павлова махтал суруктары туттарда. Балаҕан тутуутугар өссө биир сүрүн күүс – тэрилтэлэр, түөлбэлэр олохтоохторо буоллулар. Оттон балаҕан идеятын көтөхпүт, бу санааны кынаттаан таһаарбыт "Алаас Хотуна" дьахталлар түмсүүлэрин (салайааччы Е.М. Бочкарева) чилиэнэ, "Уус-Алдан" ТХПК оҥорон таһаарар отделын салайааччыта Валентина Шадринаҕа балаҕан хаһаайкатын аата сүктэрилиннэ. Валентина Николаевна: "Тоҕус ыйы быһа иитиэхтээбит санаабын олоххо киллэрэргэ биһиги эр дьоммут, чахчы да эрэнэр эркиннэрбит диэн санааны бигэргэтэн, түргэнник үлэни ыытан бу тутуу олоххо киирдэ. Аны мантан ыла балаҕан тус сыалын-соругун сүгэн үлэ-хамнас саҕаланарыгар, эһиги үрдүк итэҕэлгитин чиэстээхтик толорор туһугар үлэлэһиэхпит", – диэн бар дьонун ортотугар долгуйан туран эттэ, эрэннэрдэ.