Уус-Алдан киинигэр - Мүрү нэһилиэгэр балаҕан ыйын 22 күнүгэр «Бюджет үлэһиттэрин дьиэнэн хааччыйыы» диэн федеральнай программанан былырыын сайын үлэтэ саҕаламмыт 16 квартиралаах олорор дьиэ үөрүүлээх аһыллыыта буолла.
 
Бу тэрээһиҥҥэ ыҥырыылаах ыалдьыттарынан буоллулар Ил Түмэн депутаттара Александр Жирков, Семен Олесов, Семен Березин, СР тутууга уонна архитектураҕа министерствотын тутууга уонна бырайыактааһыҥҥа департаменын салайааччы Павел Аргунов, улуус баһылыга Валериан Троев, тутууну ыыппыт "Спланс" тэрилтэ, "Бамстрой" хампаанньа салайааччылара. Кинилэр саҥа дьиэҥэ киирбиттэри, олохтоохтору бу үөрүүлээх түгэнинэн эҕэрдэлээтилэр.
 
Ил Түмэн вице-спикера Александр Жирков улууска толору хааччыллыылаах дьиэ соччо элбэҕэ суоҕун бэлиэтээтэ уонна "Спланс" ХЭТ тэрилтэ үлэһиттэрэ кыһаллан, санааларын ууран туран үлэлээбиттэрин олохтоохтор бэйэлэрэ көрөн-билэн сыаналыахтарын, бу дьиэ толору хааччыллыылаах биир бастыҥ дьиэ буолуоҕар эрэнэрин туһунан эттэ. Александр Николаевич Мүрү нэһилиэгин күнэ саха балаҕанын аһыллыытынан саҕаламмытын, бука бары көмөлөөн, үбү-харчыны мунньан, тутан үлэҕэ киллэрбиттэрин, СР Президенэ Егор Борисов көмөтүнэн балаҕан ититиитигэр "Стерх" регионнааҕы страховой хампаанньа үлэни-хамнаһы тэрийиэҕин туһунан эттэ.
 
Депутат тэрээһини үрдүктүк сыаналаата уонна саҥа квартираҕа бастакынан көһөн кэлбит Галина Петровна, Василий Петрович Матвеевтар дьиэ кэргэннэригэр телевизоры бэлэхтээтэ.
 
СР тутууга уонна архитектураҕа министерствотын тутууга уонна бырайыактааһыҥҥа департаменын салайааччы Павел Аргунов маннык үрдүк хаачыстыбалаах тутуу улуус дьонун олоҕун тупсарыыга төһүү күүс буолуоҕа диэн эттэ итиэннэ кэлиҥҥи кэмҥэ Россия, республика үрдүнэн араас хабааннаах программалар үлэлээн дьон олорор усулуобуйатын тупсарыыга улахан хардыылар оҥоһуллан эрэллэригэр тохтоото. Кини тутууга үлэлэспит "Спланс" ХЭТ директора М.В. Филипповка, "Спланс" ХЭТ прораба А.А. Даниловка, биригэдьиир С.Н. Копыриҥҥа, "Бамстрой" ХЭТ бэдэрээччит директора Б.А. Гулиевка министерство бочуотунай грамоталарын, махтал суруктарын туттарда.
 
Улуус баһылыга Валериан Троев улууска уопсай дьиэлэргэ капитальнай өрөмүөнр, Ленин аатынан уулуссаны салгыы асфаллааһын, Лонгинов аатынан уулуссаҕа көннөрүү, гравийдааһын үлэлэрэ ыытылла туралларын уонна барыахтарын тустарынан бэлиэтээн туран "Дьол уйата" диэн аттаммыт саҥа, толору хааччыллыылаах уопсай дьиэ олохтоохторугар дьолу-соргуну, доруобуйаны, таһаарыылаах үлэни-хамнаһы баҕарда.