Саха Республикатын народнай депутата, Государственнай Мунньах (Ил Түмэн) вице-спикерэ Александр Жирков Мүрү нэһилиэгин күннэригэр тахса сылдьан быыс булан 1-кы Хоро нэһилиэгэр орто оскуолаҕа, оҕо саадыгар, дьаһалтаҕа көрсүһүүлэри ыытта.
 
Чараҥ оскуолатын директора Прасковья Гуляева үлэтин-хамнаһын билиһиннэрэн туран, 1931 сыллаахха тутуллубут оскуола улахан өрөмүөҥҥэ наадыйарын туһунан боппуруоһу туруоруста.
 
Ити кэнниттэн депутат 50 миэстэлээх оҕо саадыгар сырытта. Детсад сэбиэдиссэйэ А.М.Бурцева объектарын биирдии-биирдии сиһилии көрдөрдө. Түгэнинэн туһанан Александр Жирков тэрилтэ коллективыгар 300 тыһыынча суумалаах оҕо площадкатын сертификатын үөрүүлээх быһыыга-майгыга туттарда. Ил Түмэн вице-спикерэ үөрэх, оҕо тэрилтэлэрин объектара төһө да эргэлэрин үрдүнэн салайааччылар санааларын түһэрбэккэ, тупсаҕайдык тутан-хабан сүрдээх таһаарыылаахтык үлэлии олороллорун хайҕаата.
 
Түмүккэ Александр Жирков нэһилиэк дьаһалтатын эдэр баһылыга И.Г.Бурцевы кытта көрсөн кэпсэттэ. Кылгас кэм иһигэр киһи сэргии көрөр үлэтэ-хамнаһа ыытыллыбытын бэлиэтээтэ. Ол курдук, өр сылларга быраҕыллан турбут бааһыналары, сайылыгы сөргүтүүгэ, дьон-сэргэ дохуоттаах, үлэлээх буолууларыгар биллэр-көстөр үлэ барбыта биһирэннэ. Түмүгэр Александр Николаевич 1-кы Хоро нэһилиэгин салалтатыгар үлэлэригэр, олохторугар үрдүк ситиһиилэри баҕарда.