Балаҕан ыйын 17-20 күннэригэр Кыргызстаҥҥа Саха сирин чулуу государственнай деятелэ, отутус сыллардаахха Киргизиятааҕы БКП (б) ОК бастакы секретара уонна БКП (б) КК бастакы секретара М.К.Аммосов төрөөбүтэ 115 сааһыгар анаан, Саха Республикатын күннэрэ ыытыллыахтаахтара.
 
Бу тэрээһиҥҥэ Саха Республикатын президенэ Егор Борисов баһылыктаах официальнай делегация кыттыахтааҕа. ¥бүлүөйдээх тэрээһиннэр чэрчилэринэн Кыргызстаҥҥа Максим Кирович Аммосов пааматынньыга туруохтаах.
 
Ол эрээри, Кыргызстан общественнай-политическай олоҕор тахсыбыт уустук быһыы-майгы түмүгэр Саха Республикатын президенэ баһылыктаах официальнай делегация барыыта тохтотуллубута. Урут Россиятааҕы информагентстволар матырыйаалларыгар олоҕуран биллэриллибитин курдук, атырдьах ыйыгар Кыргызстан парламенын салайар коалицията үрэллэн, бырабыыталыстыба бүтүннүү отставкаҕа барбыта. Балаҕан ыйын саҕатыгар парламент саҥа коалицията тэриллэн, Кыргызстан саҥа бырабыыталыстыбатын уонна премьер-миниистирин бигэргэппитэ.
 
Онтон алтынньы 3 күнүгэр оппозиция күүстэрэ ¥рүҥ дьиэни ыла сатаабыттарын Кыргызстан ис дьыалаҕа министиэристибэтин үлэһиттэрэ тохтоппуттарын, ону тэрийээччинэн «Ата-Журт» парламеннааҕы фракция салайааччыта Садыр Жапаров буоларын туһунан иһитиннэрии тарҕанна.
 
Ити курдук, Саха сирин делегацията Кыргызстаҥҥа барар болдьоҕо билигин да биллибэт.
 
Баар быһыыны-майгыны комментарийдыырыгар Ил Түмэн вице-спикерэ Александр Жирков: «Кыргызстаҥҥа М.К.Аммосов аатын үйэтитиигэ аналлаах тэрээһиннэр Максим Кирович төрөөбүт күнүн көрсө ыытыллыахтара, онуоха республика салалтатын уонна общественноһын делегацията барыаҕа. Ол туһунан кэпсэтиилэр тохтооботтор», - диэн бэлиэтээтэ.
 
Балаҕан ыйын 28 күнүгэр, Республика государственноһын күнүгэр, Александр Жирков уонна М.К.Аммосов кыыһа Лена Максимовна Аммосова кыттыылаах делегация Нам улууһугар Хатырык нэһилиэгэр тахса сырытта. М.К.Аммосов төрөөбүт сириттэн – Аччыгый арыыттан ийэ буору ылыы сиэрэ-туома оҥоһулунна. Ийэ буор Кыргызстан киин куоратыгар Бишкеккэ М.К.Аммосов пааматынньыгар ууруллуоҕа.
 
Ил Түмэн пресс-сулууспата