Депутаттар үп министрэ Валерий Жондоров уонна Ааҕар-суоттуур палата бэрэссэдээтэлин эбээһинэһин толорооччу Ирина Басова дакылааттарын, итиэннэ Ил Түмэн бюджеккэ, үпкэ, түһээн уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлин солбуйааччы Ольга Федорова этиитин иһиттилэр.

 

Бюджет дохуоттаах өттө 7,49 миллиард солкуобайынан улаатан, 123,6 миллиард солкуобайга тиийдэ. Ордук элбэх үп нолуок дохуотун быһыытынан (3,8 миллиард солкуобай) уонна ирдэбилэ суох киирэр үп быһыытынан (3,3 миллиард солкуобай) эбиллэр.

 

Республика бюджетын ороскуоттаах өттө 7,86 миллиард солкуобайынан улаатан, 134,58 миллиард солкуобай буолла. 2012 сылга эбии киирбит үп бюджет үлэһиттэрин хамнастарын фондатын улаатыннарыыга (1,56 миллиард солкуобай), сүөһү аһылыгын бэлэмнээһиҥҥэ (350 мөлүйүөн солкуобай), халаан содулун суох оҥорууга (713 мөлүйүөн солкуобай) онтон да атын хайысхаларга ыытыллар.  

 

Саха сирин 2012 сыллааҕы государственнай бюджетын дефицитэ 369 мөлүйүөн солкуобайынан улаатта уонна 10,96 миллиард солкуобай буолла. Республика государственнай иэһин уопсай кэриҥэ 21,5 миллиард солкуобай буолла.

 

Ааҕар-суоттуур палата бэрэссэдээтэлин эбээһинэһин толорооччу Ирина Басова этэринэн, Саха сирин 2012 сыллааҕы государственнай бюджетын туһунан сокуоҥҥа киллэриллэр көннөрүүлэр бюджет сокуонун ирдэбилигэр эппиэттииллэр.

 

Саха сирин народнай депутаттара Виктор Губарев, Георгий Артемьев, Владимир Федоров, Александр Гаврильев, Ньургун Тимофеев, Андрей Кривошапкин, Зоя Корнилова государствотааҕы тус тосхоллорго сыһыаннаах, биирдиилээн дьонтон киирэр нолуоктарга, хотугу аҕыйах ахсааннаах норуоттар бэрэстэбиитэллэрин өйүүргэ сыһыаннаах ыйытыктарга үп миниистирин эппиэттэтилэр.

 

Ил Түмэн бюджеккэ, үпкэ, түһээн уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлин солбуйааччы Ольга Федорова дакылаатыгар парламентарийдар бюджеккэ 3 миллиард солкуобайдаах 75 көннөрүүлэри киллэрбиттэриттэн депутаттартан уонна бырабыыталыстыба чилиэннэриттэн турар сөбүлэһиилээх хамыыһыйа баара-суоҕа 18 көннөрүүнү ылыммытын бэлиэтээтэ.

 

Депутат этэринэн, 2012 сыл төрдүс кварталыгар сорох республикатааҕы туһааннаах тосхоллор (республикатааҕы бюджет барыта ол тосхоллорго олоҕурар) үбүлээһиннэрэ 20-тэн 45%-ҥа диэри буолбут. Бу государственнай тылларга, быраабы кэһиини сэрэтиигэ, таһаҕаһы тиэрдиини өйөөһүҥҥэ, кадрдары сайыннарыыга, гражданскай көмүскэлгэ сыһыаннаах.

 

«Сорох тосхоллорго үбүлээһин кээмэйэ улаатыыта көдьүүс улаатыытыгар дьайбата кутталлаах соҕус суол. Холобур, газтааһыҥҥа үбүлээһин 30%, урбааҥҥа 9% улааппыт буоллаҕына, бу көдьүүстэээх буолууга хайдах да дьайбат», - диир Ольга Федорова.

 

Дьүүллэһии түмүгэр депутаттар сокуон барылын бүтэһиктээх ааҕыыга ылыннылар. Эмиэ бүтэһик ааҕыыга Саха Республикатын булгуччулаах медицинскэй страховкалааһын Территориятааҕы фондатын бюджетыгар көннөрүүлэр ылыннылар.