Ил Түмэн вице-спикерэ Александр Жирков республика парламеныгар кэлэр сыллааҕы бюджет барылын дьүүллэһии кэмигэр Саха Республикатын правительствотын болҕомтотун аҕыйах ахсааннаах оҕолоох оскуолалар дьылҕаларыгар туһаайда.
 
Вице-спикер Саха сиригэр педагогическай үлэһиттэр орто хамнастара республика экономикатын орто хамнаһыгар тэҥнэспитин үчүгэй түмүк быһыытынан бэлиэтээтэ.
 
Ол эрэн, үөрэх үлэһиттэрин ортотугар хамнас араастаһыыта олус улахан буолла. Ордук биир үлэҕэ үлэлии сылдьар, ол гынан баран, улахан эбэтэр кыра оскуолаларга үлэлиир педагогтар ортолоругар. Аҕыйах ахсааннаах оҕолоох оскуолаҕа үлэлиир учуутал элбэх оҕолоох оскуолаҕа үлэлиир коллегатынааҕар үс төгүлгэ тиийэ аҕыйах хамнаһы ылар. Ити туһунан Александр Жирков атырдьах ыйынааҕы (2012 с.) республика учууталларын сүбэ мунньаҕар эмиэ этэн турар.
 
Вице-спикер республикаҕа баар 57 аҕыйах ахсааннаах оҕолоох (малочисленные) дэнэр оскуолалары хамнас ааҕыытыгар үрдэтиллибит кээмэйинэн туһанар кыра кээмэйдээх (малокомплектные) оскуолалары кытта тэҥниири туруорсар. Салгыы республика «малочисленнай» диэн ааттан аккаастанан, кыра оскуолалар үлэһиттэрин олоччу хамнас үрдэтиллибит таһымыгар көһөрүөхтээх.
 
Ил Түмэҥҥэ этиитигэр Александр Жирков аҕыйах оҕолоох оскуолалар дьылҕаларын республика президенэ кэлэр 2013 сылы «Тыа сирин сылынан» биллэрбитин кытта бииргэ ситимнээн көрөргө ыҥырда. «Президент Е.А. Борисов тыа сиригэр олох эйгэтэ саҥа таһымҕа тахсарын ирдиир. Бу кэмҥэ биһиги тыа сирин 57 кыра бөһүөлэктэрин дьылҕатын салгыҥҥа ыйыа суохтаахпыт. Онтон кинилэр дьылҕалара сүнньүнэн биһиги – Ил Түмэн, правительство бу кыра оскуолалар дьылҕаларын, манна үлэлиир дьон хамнастарын хайдах быһаарарбытыттан тутулуктаах», – диэтэ Александр Жирков.
 
Кини боппуруоһу уталыппакка, республика кэлэр 2013 сыллаах бюджетын ылыныыга туох эрэ түмүктээх этиини оҥороругар правительствоттан көрдөстө.
 
Ил Түмэн пресс-сулууспата