Республика Ил Түмэнэ бэйэтин 38-с сессиятыгар «Россия национальнай стратегиятын концепциятын» дьүүллэһии болдьоҕун уһатар туһунан РФ Президенэ В.В. Путиҥҥа этии оҥордо. Уураах Ил Түмэн вице-спикерэ Александр Жирков салайааччылаах үлэлиир бөлөх этиитинэн ылылынна.
 
Биллэрин курдук, бу дьыл балаҕан ыйын 27 күнүгэр «Россия национальнай стратегиятын концепцията» диэн ааттаах докумуон барыла Москваҕа биһирэнэн, Россия үрдүнэн дьүүллэһиигэ тахсыбыта. Болдьох быһыытынан, бу барыл хайы-үйэ ахсынньы 1 күнүгэр РФ Президенигэр бигэргэтиигэ киириэхтээх.
 
Республика нэһилиэнньэтин, общественнай тэрилтэлэр этиилэрин түмэргэ Ил Түмэн председателин дьаһалынан Александр Жирков салайааччылаах бөлөх тэриллибитэ. Бу бөлөххө Ил Түмэн депутаттара Александр Гаврильев, Елена Голомарева, Егор Жирков, Зоя Корнилова уонна Ольга Макиенко киирбиттэрэ.
 
Ил Түмэн РФ Президенин аатыгар ылыммыт уурааҕар Россия Федерациятыгар гражданскай общество бөҕөргөөһүнүн, омуктар икки ардыларыгар эйэлээх сыһыан салгыы олохсуйуутун сүрүннүүр, дойдуга куттала суох олоҕу уонна Россияны Аан дойдуга ылыныы таһымын тупсарарга анаммыт докумуон оҥоһуллара сөптөөҕүн бэлиэтээтэ.
 
Ол гынан баран, Ил Түмэн бэлиэтээбитинэн, Саха сиригэр «Национальнай стратегия концепциятын» дьүүллэһиигэ бу докумуон балайда элбэх өрүтэ нэһилиэнньэ ортотугар биир тэҥэ суох өйдөбүлү үөскэтэрэ билиннэ. Александр Жирков эппитин курдук, «этническая общность», «национальность», «российская нация», «коренные народы Российской Федерации» диэн курдук сүрүн өйдөбүллэри быһаарыы ситэ өйдөммөт гына оҥоһуллубут. Россияҕа олорор омуктар икки ардыларыгар сыһыан туһунан эмиэ аһары хаҕыстык суруллубут. Ону таһынан Ил Түмэн депутаттара Стратегия сорох балаһыанньалара РФ Конституциятын утарсар хабааннаах оҥоһуллубуттарын бэлиэтээтилэр.
 
Ил Түмэн уурааҕын бэлэмнээбит үлэлиир бөлөх салайааччыта Александр Жирков Стратегияны дьүүллэһиигэ Дойду үрдүнэн олус кылгас болдьох бэриллибитин ыйда. «Национальнай стратегия концепцията – Российскай Федерация курдук элбэх омук түмсэн олорор государствотыгар кини олоҕун, омуктар икки ардыларыгар сыһыаны, РФ састаабыгар баар национальнай республикалар дьылҕаларын өр сылларга быһаарар улахан суолталаах докумуон. Онон бу докумуону ордук национальнай республикаларга иҥэн-тоҥон дьүүллэһэллэрэ өйдөнөр, сөптөөх. Бу дьүүллэһии биһиэхэ саҕаланна эрэ, ол дьүүл бастакы түмүктэрэ наһаа үчүгэйэ суохтар. Докумуон салгыы, өссө дириҥэтэн үөрэтиллиэх, ырытыллыах тустаах», – диэтэ Ил Түмэн вице-спикерэ.
 
Ил Түмэн пресс-сулууспата