Ил Түмэн вице-спикерэ Александр Жирков тохсунньу 9 күнүгэр Уус Алдаҥҥа Тиит Арыы олохтоохторун уонна оскуола педагогическай коллективын кытта көрсүстэ.
 
Биллэрин курдук, тохсунньу 7 күнүгэр Тиит Арыы сэлиэнньэтигэр биир этээстээх 1966 сыллаахха тутуллубут оскуола дьиэтэ уонна спортзала уокка былдьанна. Бу оскуола 39 үөрэнээччилээх, 15 педагогтаах, 9 үлэһиттээх. Уоттан ким да эмсэҕэлээбэтэ. 
 
Ил Түмэн вице-спикерэ Александр Жирков нэһилиэнньэни уонна педагогическай коллективы кытта көрсүһүүтэ «Айылгы» культура киинигэр буолла. Кэпсэтии оҕолор үөрэнэр усулуобуйаларын салгыы хааччыйыыга ылыллар миэрэлэр тула барда.  
Республика иһитиннэрэр-көрдөрөр ситимнэригэр, ол иһигэр официальнай ситимнэргэ эмиэ, Тиит Арыы оҕолоро улуус атын оскуолаларынан тарҕанан үөрэниэхтэрэ диэн матырыйааллар тахсыталаабыттарын туһунан ыйытыыга Александр Жирков: «Тиит Арыы оҕолоро ханна да көһүөхтэрэ суоҕа. Кинилэр уруккуларын курдук И.С.Колодезников аатын сүгэр Тиит Арыы оскуолатыгар үөрэниэхтэрэ. Бу боппуруос республика правительствотын кытта кэпсэтиллэн, быһаарыллан турар. Туох да онно суох сурахтары тохтотуохха наада», диэтэ.
 
Тиит Арыы оҕолоро төрөөбүт сэлиэнньэлэригэр үөрэммиттэрин курдук үөрэниэхтэрэ. Манна даҕатан эттэххэ, эргэ оскуола оннугар Тиит Арыыга саҥа оскуола дьиэтин тутар туһунан өссө 2011 сыллаахха быһаарыллыбыта. Билигин олохтоохтор умайбыт оскуола оннун ыраастыыр, саҥа оскуола тутуутугар бэлэмнэнии үлэҕэ сылдьаллар.   
 
«Оҕолор үөрэхтэрин этэҥҥэ салгыылларын, оскуола үлэтин тэтимин ыһыктыбакка үлэлиирин инниттэн бары тустаах дьаһаллар ылыллыахтара, оргтехниканан, инвентарынан уонна да атын үөрэххэ наадалаах матырыйаалларынан хааччыллыахтара, онно Саха Республикатын Үөрэҕириитин министиэристибэтэ, улуус администрацията, спонсордар ылсан үлэлии сылдьаллар», - диэн Александр Жирков эттэ. Манна эбэн эттэххэ, Ил Түмэн депутаттара бу күннэргэ олохтоох библиотекаҕа анаан, көмө бастакы хардыытын быһыытынан, балайда элбэх кинигэни хомуйдулар.
 
Көрсүһүү кэмигэр Александр Жирков улуустааҕы олох-дьаһах коммунальнай хаһаайыстыба (салайааччы Афанасий Готовцев) аварийнай биригээдэтин үлэтин бэлиэтээтэ. Ил Түмэн вице-спикерэ кинилэр түргэн уонна сатабыллаах үлэлэрин түмүгэр уокка былдьаммыт оскуолаттан чугас турар культура киинин, оҕо саадын уонна да атын объектары тохсунньу тымныытыгар тоҥор кутталтан быыһаабыттарын тоһоҕолоон эттэ.
 
Бу көрсүһүүгэ Уус Алдан улууһун баһылыга Валериан Троев, капитальнай тутуу уонна архитектура управлениятын начальнига Михаил Бурцев, улуус үөрэҕириигэ управлениятын начальнигын солбуйааччыта Андрей Пухов, «Сахам сирэ XXI үйэҕэ» республикатааҕы хамсааһын бэрэстэбиитэлэ Розалия Евсеева кытыннылар.
 
Ил Тумэн Пресс-сулууспата