Ил Түмэн бюджеккэ, үпкэ, түһээн уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлэ Александр Уаров, Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Афанасий Софронеев саха боруода ынаҕын үөскэтиигэ-иитиигэ үбүлээһин көрүллэригэр туруорсубут боппуруостарыгар РФ тыатын хаһаайыстыбатын министиэристибэтитэн хоруйдаах сурук кэллэ.
 
Александр Уаров саха боруода ынаҕын туһунан сокуон Ил Түмэн иккис ыҥырыытын депутаттара ылыммыттарын этэн туран, ол үп-харчы тиийбэтинэн бу күҥҥэ диэри ситэ үлэлэммэтэҕин бэлиэтиир.
 
Биллэрин курдук, ааспыт сыл бүтэһигэр Москваҕа Саха сирин күннэрин чэрчитинэн ыытыллар тэрээһиннэр кэмнэригэр Ил Түмэн депутаттара Госдумаҕа өрөспүүбүлүкэ социальнай-экономическай сайдыытын боппуруостарыгар тахсыылаахтык үлэлээбиттэрэ. Онно Александр Уаров уонна Афанасий Софронеев саха боруода ынаҕын иитэр ферма тутуутун үбүлээһинин боппуруоһугар иҥэн-тоҥон үлэлээбиттэрэ, Госдума аграрнай кэмитиэтин бэрэссэдээтэлигэр Николай Панковка бу боппуруоһу туруорсубуттара, коллегалара сөбүлэһэн бэйэтин өттүттэн көмө буоларга эрэннэрбитэ.  
 
Бу күннэргэ Александр Уаров уонна Афанасий Софронеев ааттарыгар РФ тыатын хаһаайыстыбатын министиэристибэтин миниистирин солбуйааччы Александр Черногоровтан хоруй сурук кэллэ. Ол сурукка кинилэр Госдумаҕа туруорсубут саха боруода ынаҕын иитэр ферма тутуутун үбүлээһинин боппуруоһун Россия тыатын хаһаайыстыбатын министиэристибэтигэр көрбүттэрин, Саха Республикатын агропромышленнай тиһигин салалтата саха боруода ынаҕын харыстааһыҥҥа уонна үөскэтиигэ-иитиигэ анаан регионнааҕы тосхолу (программаны) оҥорон, РФ тыа хаһаайыстыбатын министиэристибэтигэр баар болдьохторун тутуһан федеральнай бюджеттан үбүлээһиҥҥэ кыттарга ыыталларыгар этиллибит.
 
Манна даҕатан, Александр Уаров «саха боруода ынаҕын туһунан программа ылылыннаҕына, ону үбүлүүр харчы баар буолуоҕа», диэн бэлиэтиир.  
 
Ил Түмэн Пресс-сулууспата