Саха Республикатын народнай депутата, наукаҕа, үөрэххэ, культураҕа уонна сонуну киэҥник тарҕатар ситимнэргэ Ил Түмэн сис кэмитиэтин бэрэссэдээтэлэ Елена Голомарева тохсунньу 25 күнүгэр Эбээн Бытантай, Анаабыр уонна Булуҥ улуустарын баһылыктарын кытта көрүстэ.
 
Елена Голомарева «улуустар, нэһилиэктэр баһылыктара, биһиги бары даҕаны биир  сүрүн сорукпутунан дьоммут олохторун-дьаһахтарын тупсарар туһуттан үлэлээһин буолар», диэн бэлиэтээн туран, Саха Республикатын Президенин Ил Түмэҥҥэ 2013 сыллааҕы Илдьитин туһунан, Ил Түмэн биэс сыллааҕы үлэтин, бэйэтин депутат быһытынан улэтин туһунан кылгастык иһитиннэрдэ уонна бу көрсүһүүгэ кэлбит баһылыктар үлэлэригэр туох уустуктар, туох кыһалҕа баарын, дьон тугу туруорсарын туоһуласта уонна ону быһыырсарга көмөлөһүөх буолла.
 
Ол курдук, соторутааҕыта Өлөөн улууһугар сылдьан улуус салалтатын, нэһилиэнньэни кытта көрсүбүтүн, барыта сэттэ мунньаҕы ыыппытын кэпсээтэ. Биэс сыл В.В.Путин, Д.А.Медведев общественнай приемнайдарын салайан кэлбитин, наукаҕа, үөрэххэ, культураҕа уонна сонуну киэҥник тарҕатар ситимнэргэ Ил Түмэн сис кэмитиэтин бэрэссэдээтэлин буоларын быһыытынан ол хайысхаларынан элбэх үлэ ыытыллыбытын, үгүс дьон кыһалҕатын быһаарсарга көх-нэм буолбутун этэн туран, өссө да ситэриллибэтэх баарын бэлиэтээтэ.
 
Көрсүһүү кэмигэр Елена Голомарева улуус баһылыктарын боппуруостарыгар эппиэттээтэ. Ол боппуруостар сүнньүнэн үбүлээһин, Саха Республикатын Президенин Ил Түмэҥҥэ 2013 сыллааҕы Илдьитин хотугу сир дьонугар сыһыаннаах, чуолаан табаны иитиини чааһынай илиигэ биэрии, дьиэ-уот коммунальнай хаһаайыстыба өҥөлөрүн оҥоруутун туһунан буоллулар. Ону тэҥэ, үөрэҕирии, эдэр ыалга дьиэ тутуутун, саха боруода ынаҕын боппуруостара туруорулуннулар.
 
Ил Түмэн Пресс-сулууспата