Бу күннэргэ Ил Түмэҥҥэ Горнай улууһун Одуну нэһилиэгин дьонун-соргутун аатыттан Ыҥырыы сурук киирдэ. Одунулар Кыайыы 70 сылын көрсө 2013 сыл тохсунньу 1 күнүттэн саҕалаан 2015 сыл ыам ыйын күнүгэр дылы «Улуу Кыайыы 70 сылыгар – 70 үтүө дьыала» акцияны ыытарга суол-сорук ылыммыттар.

 

Улуу Кыайыы күүһэ барыбытын сомоҕолуур, үрдүк ситииһиилэргэ кынаттыыр. Одунулар ыҥырыыларын ылынан, бука-бары биир киһи курдук «Улуу Кыайыы 70 сылыгар – 70 үтүө дьыала» акцияны Өрөспүүбүлүкэ бары улуустарыгар ыытыаҕыҥ!

 

 

1941-1945 сылларга Аҕа дойду улуу сэриитигэр сэбиэскэй норуот ситиспит өрөгөйдөөх Кыайыытын 70 сылын бэлиэтиирбит 27 ый хаалла. Биһиги, бэтэрээннэр, үөрэнээччилэр, эдэр ыччат, Маҕарас бөһүөлэгин бары олохтоохторо, бу умнуллубат бэлиэ күнү өрөспүүбүлүкэ хас биирдии олохтооҕо Улуу кыайыыны уһансыбыт аҕа көлүөнэбитигэр сүгүрүйэн тураммыт чиэстээхтик көрсөргө ыҥырабыт.

 

Улуу Кыайыы күнэ хас биирдии киһиэхэ инникигэ эрэл, төрөөбүт дойдуга, норуокка таптал, чугас дьоҥҥо эппиэтинэс, сайдыы, эйэлээх олох, сырдык ыра сана туолуутун бэлиэтэ буоларын умнуо суохтаахпыт. Аҕа дойду улуу сэриитин остуоруйатыгар тыһыынчанан буойун сахалар ааттара көмүс буукубаларынан суруллубуттара. Биһиги киэн туттабыт кинилэр өлбөт-сүппэт мэҥэ ааттарынан, Аан дойдуну фашизмтан быыһаабыт холобурдарынан, 70 сыл устата олохпутугар өрө тахсыылар, өһөн ылыылар, ситиһиилэр, түһүүлэр да элбэх этилэр. Ол эрэн, хаһан да суолталара сүппэт, тулхадыйбат өйдөбүллэр – инникигэ эрэл, Ийэ дойдуга таптал баар буолан, хас биирдии Улуу Кыайыы бырааһынньыгын чиэстээхтик бэлиэтиибит. Бу Улуу Кыайыыны уһансыбыт Россия уонна да атын норуоттар бары биир иллээх кэргэн буолан бэлиэтиир саамай ураты бырааһынньыкпыт. Айхаллыыбыт, чиэстиибит дьолоох олоҕу бэлэхтээбит ытыктабыллаах кырдьаҕас буойуннарбытын – бэтэрээннэрбитин. Кинилэр ситиһиилэрин салгыыр кэнчээри ыччакка, кырачаан оҕолорбутугар ураты болҕомтону ууруоҕуҥ, аҕа көлүөнэ үтүө холобуругар иитиэҕиҥ!

 

Бииги, одунулар, 2013 сыл тохсунньу 1 күнүттэн саҕалаан 2015 сыл ыам ыйын күнүгэр дылы «Улуу Кыайыы 70 сылыгар – 70 үтүө дьыала» акцияны саҕалыырбыт туһунан өрөспүүбүлүкэ олохтоохторугар, уопсастыбаннаска биллэрэбит уонна бука бары өйүүргүтүгэр ыҥырабыт. Бу акцияҕа хас биирдии биир дойдулаахпыт, уопсастыбаннай тэрилтэлэр, үлэ кэлэктииптэрэ, эдэр ыччат түмсүүлэрэ, урбаанньыктар бэйэлэрин сүбэлэрин, санааларын холбоон, Улуу Кыайыы 70 сыллаах үбүлүөйүн таһаарыылаах үлэннэн, ситиһиинэн көрсүөхтэрэ диэн эрэнэбит. Акция сыала – төрөөбүт өсөпүүбүлүкэбитигэр Улуу Кыайыы үбүлүөйүн көрсө ураты сыһыаны, үтүө санааны, болҕомтону ууруу.

 

Күндү биир дойдулаахтарбыт, Улуу Кыайыы 70 сылын хас биирдии куорат, дэриэбинэ, тэрилтэ, уулусса, дьиэ кэргэн төрөөбүт дойдубут чэчирии сайдарын туһугар 70 үтүө дьыаланан көрсүөҕүҥ. Оҥорбут үтүө дьыалабыт саха норуота чэчирии сайдарыгар, эйэлээх олоҕу түстээһиҥҥэ олук буоларыгар саарбахтаабаппыт.

 

Хомойуох иһин, күнтэн күн сэрии, тыыл бэтэрээннэрэ, сэрии огдооболоро биһиги ортобутугар аҕыйаан иһэллэр. Кинилэр биһиги болҕомтобутугар, көмөбүтүгэр наадыйаллар. Хас биирдии сэрии, тыыл бэтэрээнигэр, сэрии огдооботугар көмөлөһүөҕиҥ, махтал тылы этиэҕиҥ, кинилэргэ сүгүрүйүөҕүҥ, кыах баарынан күүс-көмө, өйөбүл буолуоҕуҥ.

 

Кыайыы – биһиги норуоппут албан аата, киэн туттуута.

 

Биһиги, кыайыыны уһансыбыт буойуннар оҕолоро, сиэннэрэ, хос сиэннэрэ, Аҕа дойдуну көмүскүүр Улуу сэриигэ олохторун толук уурбут хорсун буойуннарбыт үтүө ааттарыгар сүгүрүйүөҕүҥ, албан ааттарын үйэтитиэҕиҥ!