Суорун Омоллоон аатынан Опера уонна балет театрын саалатыгар толору мустубут дьон иннигэр саха ууһа, алгысчыта Борис Федорович Неустроев-Мандар Уус «Кэскил» оҕо саадын иитиллээччилэрин, Айыы кыһата оскуола үөрэнээччилэрин уонна ХИФУ устудьуоннарын кытта Аман олугу саҕалаата. Бу дьүһүйүү кэмигэр оҕолор төрөөбүт тыл туһунан ис-истэриттэн таһааран өй-санаа, сүргэ көтөҕүллэр хоһооннору долгутуулаахтык доргуччу эттилэр-тыыннылар. Мандар Уус кинилэргэ саха былыр-былыргыттан Олоҥхо нөҥүө тутан кэлбит ийэ тылын саха чулуу уолаттара Былатыан Ойуунускай, Исиидэр Бараахап, Сэмэн Новгородов, Далан сыыска-буорга түһэрбэккэ, араас кэм-кэрдии буурҕатыгар, будулҕаныгар булкуйтарбакка, өрө тутан кэнчээри ыччаттарыгар туттарбыттарын ахтан туран, бар дьонугар барытыгар анаан алгыс тылын эттэ.       

 

Саха Республикатын салалтатын аатыттан Саха Республикатын Бырабыыталыстыбатын Бэрэссэдээтэлин солбуйааччы Феодосия Габышева эҕэрдэ тылын этэригэр төрөөбүт тыл уонна сурук-бичик Күнэ дьон-сэргэ өйөбүлүн ылыаҕын ылан, үтүө үгэскэ кубулуйбутун, бу Күҥҥэ анаан үгүс киэҥ, далааһыннах тэрээһиннэр ыытыллалларын бэлиэтээтэ. Тыл политикатыгар, үөрэҕирии эйгэтигэр тустаах федеральнай уонна республикатааҕы сокуоннар оҥоһуллан ылыныллыбыттарын, саха тыла тоҕус уон сыл устата оскуолаҕа үөрэтиллэрин туһунан эттэ. Быйылгы бэлиэ түгэннэр тустарынан этэригэр Платон Ойуунускай 120 сылын, Исидор Барахов 115 сылын, Гавриил Ксенофонтов 125 сылын бэлиэтээтэ.

 

Феодосия Габышева тыл этэригэр олоҥхону үйэтитиигэ Саха Республикатын салалтата улахан үлэни ыыппытын, Олоҥхо Уон сылын ыытыыга Национальнай кэмитиэти тэрийбитин, ЮНЕСКО 2005 сыллаахха Олоҥхону аан дойду шедеврынан, 2012 сыллаахха Өлүөнэ очуостарын Аан дойду культуратын уонна айылҕатын нэһилиэстибэтинэн билиммитин туһунан, олоҥхону үйэтитии үлэ салҕанан бара турарын бэлиэтээтэ.

 

Маны кэккэ, бырабыыталыстыба бэрэссэдээтэлин солбуйааччы тыл политикатыгар, тыл сокуоннарыгар, тыл культуратыгар аныгы кэм ирдэбилигэр эппиэттиир үлэ барарын эттэ. Онно СР Президенын иһинэн Тыл политикатын Сүбэтэ, Тыл уонна литература научнай-чинчийэр института, М.К.Аммосов аатынан Хотугу-Илиҥҥи федеральнай университет, СР Национальнай библиотеката, «Бичик» кинигэ кыһата, «Саха» Национальнай көрдөрөр-иһитиннэрэр компания, Саха суруйааччылара ыытар үлэлэригэр тохтоото. Түмүгэр, Саха Республикатын Президенэ Егор Борисов тыллары көмүскээһин стратегическэй сорук буоларын туһунан эппитин бэлиэтээтэ.

 

Бу үөрүүлээх тэрээһин кэмигэр Россия норуоттарын Ассамблеятын чилиэнэ, политическай наука доктора, профессор Раушан Канапьянова, СР «Бичик» национальнай кинигэ кыһатын дириэктэрэ Август Егоров, Айыы кыһатын учууталлара тыл эттилэр,санааларын үллэһиннилэр. Венгрияттан, Колумбияттан кэлбит ыалдьыттар уу сахалыы саҥаран, ийэ тыл туһунан санааларын атастаспыттара, саха тыла уонна культурата урут-уруккуттан омуктары кэрэхситэрин, кэскиллээҕин эппиттэрэ мустубут дьону сөхтөрдө, үөртэ.