Дьыл оҕуһун бүтэһик киирсиитин буугуначчы тыынан чысхааннаах тымныы үгэннээн турар кэмнэригэр – олунньу ый бүтүүтэ народнай депутат Елена Голомарева уокуругун биир оройуонугар – Эбээн Бытантай улууһугар кэлэн барда. Кини бу иннинэ Анаабырга, онтон Өлөөҥҥө сылдьан быыбардааччыларын кытта көрсөн кэлбитэ. Онтон Баатаҕайынан -Сайдыыннан, салгыы вездеходунан Булуҥ улууһун Таймылыырыгар тиийэр былааннаах. Олус уустук суоллаах иистээх, Муустаах Байҕалы эҥэрдэһэ сытар хас эмэ сүүһүнэн км тайаан сытар уокуругу барытын кэрийиэм диэтэххэ дьахтар киһиэхэ сылаалаах айан.

 

Кэлбит күнүгэр тута Дьарҕаалаахха, сарсыныгар Кустуурга, нөҥүө күнүгэр Баатаҕай-Алыытыгар сылдьан нэһилиэнньэни кытта көрүстэ, үлэтин-хамнаһын отчуоттаата.

 

Елена Христофоровна бастаан депутат буолан баран уокуругун улуустарын программаларын ылан билсэн көрөн баран бу барылга биир да улахан тутуулар, бырайыактар киирбэккэ сылдьыбыттарын, маны туоратар сыалтан уокуругун түөрт улууһун биирдэ да хараҕын далыттан түһэрбэккэ саамай уустук боппуруостарын быһаарсыыга болҕомтотун ууран үлэлээн кэлбитин кэпсээтэ. Ол курдук, хоту сытар уһук улуустар саамай улахан кыһалҕалара – ититэр ситимҥэ холбонуу, оскуола, балыыһа, спортсаалалар о.д.а. социальнай эбийиэктэр эргэрбиттэрэ, кыра авиация көтүүтүн кыһалҕалара, учуутал, оҕо саадын үлэһитин хамнаһа үрдээһинигэр, аҕыйах ахсааннаах оҕолордоох оскуолалар тыа сиригэр сабыллыбакка, күөмчүлэммэккэ үлэлээн кэлэллэригэр олук ууран бу боппуруостары хамсатыыга, инвестпрограммаҕа киллэриигэ үлэлэспитин кэпсээтэ. Холобур, буурҕалаах Булуҥ улууһугар оттор мастара суох буолан дьон оҕолуун-уруулуун биэрэккэ киирэн уу аҕалар мастарын боҕуорунан тарыйан ылан оттунан ууну манаан олороллорун көрөн сүрэхпэр олус чугастык аймана ылыммытым. Уонна бу дьон бу саамай улахан кыһалҕата – ититэр ситимҥэ холбонуу буоларын илэ көрөн өйдөөбүтүм. Бу билигин баран эһиил тутуллуохтаах хочуолунай боппуруоһугар үлэлэһиэм диэн кэпсээтэ.  

 

Кини бу көрсүһүүлэргэ «Мин Сахам сирэ ХХI үйэҕэ» хамсааһын салайааччыта И.С.Емельяновы илдьэ кэлбитэ кэпсэтии хардарыта көдьүүстээхтик барарыгар олук уурда.

 

Депутат бу 5 сыл устата суол-иис уустугун аахсыбакка, быыбардааччыларын кытта тиһигин быспакка сылга иккилиитэ-үстүүтэ хайаан да сылдьан, биир да көрдөһүүнү, дьон суругун эппиэтэ суох хаалларбакка, үксүгар боппуруостары тутатына быһаарсан кэлбитин мустубут дьон бэлиэтээн туран махталларын тиэртилэр.

 

Ол курдук, ГП «Саха ынаҕын» эдэр салайааччыта П.П.Горохов олус уустук сылларга депутат өйөбүлүн, көмөтүн куруук билэ олорбут буолан бу тэрилтэ этэҥҥэ өрүттэн эрэрин, табаһыттар кыһалҕаларын, хамнастарын үрдээһинин боппуруостарын депутат куруук болҕомтоҕо тута сылдьыбытыгар махтанан этиннилэр. Учуутал Н.С Софронова, быраас А.П.Дмитриева, библиотекарь М.И.Саргина о.д.а. устудьуон оҕолорун боппуруостарыгар киниэхэ тахсан баар кыһалҕаларын быһаартарбыттарын, биирдэ да аккаастаан көрбөккө дьоҥҥо кабинета куруук аһаҕас, телефона мэлдьи эппиэттиирин, боппуруоһу тутатына быһаарсарын бэлиэтээн туран махталларын тиэртилэр. Дьарҕаалаах нэһилиэгиттэн урукку баһылык А.Н.Стручков, оскуола директора С.М.Иванов хас эмит сыл туруорсубут спортсаалалара биир сайын устата тутуллан үлэҕэ киириитигэр Е.Х.Голомарева уонна И.С.Емельянов улахан оруоллаахтарын уонна учууталларга өйөбүлүн бэлиэтээн коллектив аатыттан Махтал суруктары туттардылар. Бу нэһилиэк «Тугутчаан» оҕо саадын сэбиэдиссэйэ В.А.Перевалова иитээччилэр ааттарыттан урукку өттүгэр кинилэр хамнастара олус кыратын, энтузиаст дьон баар буоланнар кинилэр идэлэригэр бэриниилээхтик үлэлии олорбуттарын, билигин хамнас үрдээн дьон санаата биллэрдик көтөҕүллүбүтүн бэлиэтээн туран махталын тиэртэ. Кустуур нэһилиэгин кырдьаҕас олохтооҕо А.Г.Аммосова истэр тухары кыһалҕалаах дьоҥҥо көмөлөһөр сураххын истэбин онон кэлэр быыбарга эйиигин өйүүбүн диэн этиннэ. Кустуурдар 6 сыл устата тутуллан биэрбэккэ соһуллубут сырдык киэҥ 80 миэстэлээх саҥа типовой оскуола үлэҕэ киириитигэр депутат көмөтө улаханын бэлиэтээн туран, тутуу хаачыстыбата куһаҕаныттан тымныытынан капитальнай өрөмүөн ыыттарарга көмөлөһөрүгэр көрдөстүлэр. Баатаҕай-Алыытынааҕы «Хаарчаана» оҕо саадын сэбиэдиссэйэ Л.И.Стручкова сыллата оҕо төрөөһүнэ үрдүү турарынан уонна оҕо саадтара олус эргэрбиттэринэн саҥа оҕо саадын тутуутун боппуруоһун көтөхтө уонна коллектив аатыттан киниэхэ махтанан туран иккис срокка турарыгар көрдөстө. Маннык махтал тыллары Киин балыыһа үлэһиттэрэ, улуустааҕы ДЭС, «Сахателеком», «Авиапорты Севера», Саккырыырдааҕы орто оскуола учууталлара этиннилэр уонна уопутурбут, дьон үрдүк итэҕэлин ылбыт депутакка Е.Х.Голомареваҕа кэлэр быыбарга туран салгыы үлэлииригэр көрдөстүлэр. Кинилэр дойду Президенэ Владимир Путин общественнай приемнайын салайааччыта, народнай фронт координатора, сис комитет бэрэссэдээтэлэ быһыытынан олус түбүктээх үлэҕэ да сылдьан уустук суоллаах-иистээх уокуругун быыбардааччыларын кытта сибээһин хаһан да быспакка кэлэ турар буолар дьон кыһалҕатыгар чугаһын уонна эппит тылын хайаан да толорторор үтүө өрүттээҕин бэлиэтээн этиннилэр.

 

Маны таһынан народнай депутат улуус киинигэр Киин хочуол саахалын түмүгэр тэриллибит ыксаллаах быһыы-майгы мунньаҕар  ГУП ОДЬКХ салалтатын уонна улуус салайааччыларын, депутаттарын мунньаҕар сылдьан саахалы туоратыыга ханнык кыаллыбатах боппуруостар баалларын иһиттэ, дьүүллэһиигэ кытынна. Кини тоҥмут дьиэлэр олохтоохторун приемнаан, санааларын истэн тутатына министерстволарга тахсан быһаарыста. Ол курдук, саахал кэмигэр дьиэлэр, объектар тоҥуулара -50 тымныыга хочуол тохтобулун түмүгэр  тахсыбыт ороскуотун уйунуу мөккүөрүгэр быһаччы кыттыһан, балаһыанньаны миэстэтигэр быһаарсан икки өттүттэн өйдөһүү, сөбүлэһии тахсарын ситистэ, дьону уоскутта.

 

Депутаты кытта сылдьыспыт И.С.Емельянов «Үтүө дьыала» хайысхатынан барбыт тутуулары көрөн, ханна туох итэҕэс баарын үөрэтэн, сүбэлээн, дьону кытта атах тэпсэн олорон кэпсэттэ. Кини Кустуур нэһилиэгэр культурнай-спортивнай Киин, Дьарҕаалаах спортсаалатыгар пристрой  тутуллара наадатын уонна бу тутуулары өйүүргэ бэлэмин этиммитэ дьон санаатын көтөхтө. Бу хамсааһын ыраах сытар умнууга хаалбыт кытыы нэһилиэктэргэ олох кыымын саҕарын, инникигэ эрэли үөскэтэрин уонна халлааны манаан олорбокко дьон-норуот бэйэтэ турунан чопчу сыал-сорук туруорунан сайдыы суолун тутуһалларыгар улахан оруоллааҕын олох көрдөрдө.