Киин уонна илин эҥэр улуустар агроосокуолаларын семинар-сүбэ мунньаҕар Саха Республикатын тыатын хаһаайыстыбатын уонна продовольственнай политикаҕа миниистирин бастакы солбуйааччыта Николай Попов, үөрэҕирии миниистирин солбуйааччыта Евдокия Никифорова, үөрэҕирии управлениятын начальнига Гаврил Тимофеев, агрооскуолалар салайааччылара кытыннылар. Тэрээһиҥҥэ кытта кэлбит дьону Уус-Алдан улууһун II Лөгөй нэһилиэгин баһылыга Иннокентий Троев, Тулуна орто оскуолатын үөрэнээччилэрэ эҕэрдэлээтилэр.

 

Ил Түмэн вице-спикерэ, Саха сирин агропрофилированнай оскуолаларын холбоһугун президенэ Александр Жирков тыл этэригэр агрооскуолалар статустара үрдүүрүгэр тустаах үлэ үтүө түмүгү көрдөрбүтүн, агрооскуолалар холбоһуктарыгар киириэн баҕалаах элбээбитин бэлиэтээн туран, сокуон, быраап өттүгэр үлэлиир наадатын, үбүлээһин уонна техниканан хааччыйыы агрооскуолаларга быһа тиийэр механизмын тобулуу уонна ол ылбыт техникаларыгар агрооскуолалар бэйэлэрэ хаһаайын буолаллара наадатын эттэ. Кини агрооскуолары бүтэрбит оҕолор чопчу тыа хаһаайыстыбатыгар сыһыаннаах идэни баһылыыр үрдүк, биитэр орто анал үөрэхтэн атын үөрэҕи-идэни талллахтарына, тыа сирин олоҕун-дьаһаҕын билбиттэрэ, сир үлэтигэр, сүөһүнү иитии үлэтигэр оҕо эрдэхтэриттэн үөрэммиттэрэ төрөөбүт дойдуларын, үлэһит дьонун-сэргэтин, кинилэр кыһалҕаларын өйдүүр киэҥ билиилээх туһа дьон буола улаатталларыгар улахан суолтатын бэлиэтээтэ.    

 

Семинар-сүбэ мунньах кэмигэр Чурапчы, Уус-Алдан, Мэҥэ Хаҥалас улууһун оскуолаларын салайааччылара тыл эттилэр, үлэлэригэр баар ситиһиилэрин-кыһалҕаларын туһунан кэпсээтилэр, санаа атастастылар. Буоларын курдук агрооскуолалар үксүлэрэ сир үлэтинэн, сүөһү иитиитинэн дьарыктаналлар, сайынын сайылык-лааҕыр тэрийэн оҕолору хамнастаан үлэлэтэллэр. Бу кэпсэтии кэмигэр биир улахан кыһалҕанан ГСМ уонна сайлыктаан олорор кэмҥэ ЧОП боппуруостара буолла. Улахан сэҥээриини учууталлар уонна үлэһиттэр хамнастарын улаатыыта ылла. Итини тэҥэ, техниканы оскуолаларынан хааччыйыы боппуруоһа буолла – сыл аайы инники сылдьар оскуолалар ылаллара, биитэр уочаратынан биэрии. Тыл этээччилэргэ уонна тыа хаһаайыстыбатын министиэристибэтигэр туһаайан агорооскуолалары үбүлээһини уонна техниканан хааччыйыыны аныгы кэм ирдэбилигэр хайдах сөп түбэһиннэрэр үлэни ыытар туһунан элбэх ыйытык киирдэ. Ыйытыктарга тыа хаһаайыстыбатын миниистирин бастакы солбуйааччы Николай Попов хардарда.  

 

Александр Жирков мунньаҕы түмүктүүрүгэр Николай Поповка тыа оскуолаларыгар чугас санаалааҕын, ол үтүө санаата бу хайысхаҕа ыытыллар үлэни чэпчэтэрин иһин махтанна. Агрооскуолалар салайааччыларын кыһамньыларын, үлэ араас көрүҥнэрин баһылыырга дьулуурдарын бэлиэтээн туран, кинилэр производственнай көрдөрүүлэри сырсыбакка, оҕолор бастатан туран сиргэ үлэлииргэ, сүөһүнү иитиигэ үөрэннэллэригэр күүс-көмө буолуохтаахтарын эттэ. «Оттон республика өттүттэн көмө салгыы баар буолуо», диэтэ уонна баар агрооскуолалар базаларын бөҕөргөтүүгэ, агрооскуолаларга киирэр харчыны-үбү бэйэлэрэ тыыралларыгар дьаһаныллыахтааҕын санатта. Итиэннэ агрооскуолалар салгыы сайдалларын, бөҕөргүүллэрин ситиһэр туһуттан, республика президенигэр туруорсарга чопчу, чуолкай этиилэр баар буолуохтаахтарын бэлиэтээтэ. Ол инниттэн бары тустаах тэрилтэлэр, ол иһигэр үөрэх министиэристибэтэ, бэйэлэрин этиилэрин киллэрэллэрин наадатын эттэ.  

 

Күн иккис аҥарыгар Ил Түмэн вице-спикерэ Александр Жирков Уус Алдан II Лөгөй, Лөгөй, Курбуһах нэһилиэктэригэр сылдьан олохтоох нэһилиэнньэни, бааһынай хаһаайыстыба салайааччыларын кытта көрсөн кыстык боппуруостарын дьүүллэстэ.

 

Александр Николаевич былырыын оттооһун саҕана республика президенэ от үлэтин билсэн баран баар сүөһүнү кыстыкка киллэрэн сылы таһаарарга ыҥырыы таһаарбытын, республика салалтатын өттүттэн от бэлэмнииргэ, оту хаһааныыга тустаах үлэ барбытын бэлиэтээн баран, Лөгөй нэһилиэгэ кыстыгы хайдах туораан эрэрин, олохтоох салалта өттүттэн туох наада баарын, биирдиилээн хаһаайыстыбалар, нэһилиэк, улуус көрдөрүүтэ хайдаҕын, сыл тахсарга эбии туох наадатын туоһуласта. Лөгөй баһылыга Наталья Егорова этэринэн бэйэлэрин оттообут отторо бүтэн, сүөһү ырыганныыр түбэлтэлэрэ баарын бэлиэтээтэ. Хаҥаластан, Ньурбаттан, Бүлүүттэн от ыларга дуогабар түһэрсибиттэр. Кэлбит отторо сороҕо куһаҕан хаачыстыбалаах буолан биэрбит. Онно эбии республика президенин ыйааҕынан быһыллыбыт от сыаната икки бүк улаатан тахсыбыт. Холобур, Ньурба улууһуттан атыыласпыт кэбиһиилээх оту рулоннааһын, ходуһаттан тиэйии, тиийиэхтээх сиригэр тиэрдии ороскуота эбиллэн биир тонна от сыаната 4 тыһыынча солкуобайтан 8-10 тыһынча солкуобайга тиийбит. Маны тэҥэ, олохтоохтор аһыҥа эмэ, сүөһү эмэ суоҕун, уу ыстарар техника наадатын, сүөһү иитиэн баҕалаахтар баалларын үрдүнэн сир суоҕун, ууга барбыт сирдэргэ нолуок төлөнө турарын онно туох да толуйар миэрэ суоҕун эттилэр уонна инники сир реформатыгар туох уларыйыылар баар буолалларын-суохтарын, оттооһун кэмигэр чэпчэки сыаналаах сэлээркэ баар буолуо дуо диэн ыйыттылар.

 

Ыйытыктарга тыа хаһаайыстыбатын миниистирин бастакы солбуйааччыта Николай Попов, Уус-Алдан улууһун баһылыгын маҥнайгы солбуйааччыта Алексей Федотов, улуустааҕы тыа хаһаайыстыбатын управлениятын начальнига Николай Сивцев хоруйдаатылар.

 

Александр Жирков бу иннинэ түөрт нэһилиэккэ сылдьыбытын уонна бу ыйытыктар, сүрүннээн, информацияны тиэрдии бытаарыытын бэлиэтэ буоларын этэн туран, баар сүөһү барыта кыстыгы этэҥҥэ туоруохтааҕын, оту атыылааччы уонна оту атыылаһааччы сыһыаннаһыыларын сүрүннүүр тустаах механизм тобуллуохтааҕын бэлиэтээтэ.