Норуот депутаттарын «Өлүөнэ туруу хайалара» Айыл5а Национальнай пааркатын сиригэр-уотугар тэриллибит «Уус Буотама» питомник үлэһиттэрэ көрсөн, анал хаһааҕа аҕалан киллэрбит бизоннар туруктарын көрдөрдүлэр, питомник материальнай-техническэй базатын бөҕөргөтүүгэ ыытыллар үлэлэри билиһиннэрдилэр, үгүс ыйытыыларга эппиэттээтилэр.

 

Буотама – кэрэ айылҕалаах, олохтоох эбээннэринэн үйэлэргэ харыстаммыт ыраас мэҥэ уулаах үрэх. Бу өлгөм үүнүүлээх, киэҥ мэччирэҥнээх, хойуу оттоох-мастаах, сылдьыбыты эрэ кэрэхсэтэр айылҕа туспа муннуга. Манна туристар кэлэн сынньаналларыгар сөптөөх усулуобуйа тэриллэн тутуу үлэлэрэ ыытылла тураллар. Олус тупсаҕай оҥоһуулаах саха төрүт олоҕун көрдөрөр киэҥ-куоҥ балаҕан, куйааска сөрүүкүүр ураһа, үлэһиттэр олорор, үлэлиир дьиэлэрэ, гостиница тутуллубуттар, халлаан сылыйдаҕына ситэрэр ис-тас үлэлэр хаалбыттар.

 

Билэрбит курдук, 2006 сыллаахха Саха Республикатын айылҕа харыстабылын министрествотын иһинэн биологическэй ресурсаларга Департамент улэтин хайысхатынан тас дойдулары кытта ыкса сибээһи олохтообутун түмүгэр Канада правительствота сүтэн эрэр сэдэх сүөһүнү – бизону – Евразия сиригэр-уотугар ууһатар, тарҕатар интэриэстээх буолан, Саха сиригэр бэлэхтээбитэ.

 

Тыа бизона Канада уонна Америка заповедниктарыгар эрэ баар, аан дойдутааҕы Кыһыл кинигэҕэ киирбит, сүтэн-оһон эрэр көрүҥ буолар. Бизоннары ханыы мамоннар былыр Саха сиригэр үөскүү сылдьан, климат эмискэ уларыйыытыгар, үөрдээн сылдьар буолан, былаҕайга былдьанан сүппүттэрэ. Бүгүн номоххо киирбит тоннанан ыйааһыннаах кумах куйаар киэҥ киэлитигэр көҥүл көччүйэр тыыннаах айылҕа сүдү сүөһүлэригэр ханыы тыа бизоннара Сахабыт сирин тыйыс айылҕатыгар олохсуйан, ууһаан эрэллэрэ сөхтөрөр эрэ.

 

Бизоннар Саха Республикатын государственнай экологическай программатын быһыытынан биир эрэ саастаах аҕалыллыбыттара. Биллэн турар, бастаан бу үлэни иилээн-саҕалаан үлэлэһэн аҕалтарбыт дьоҥҥо бизон көрүүтэ-истиитэ, аһа-үөлэ, мэччирэҥэ табыллыа дуо диэн уустук боппуруостар үэскээбиттэрэ, ол тула үгүс кэпсэтии барбыта. Ол эрэн бириэмэ көрдөрбүтүнэн – бизоннар турар сирдэрэ табыллан, төрүөхтэрэ үлэһиттэр былааннаабыт сылларын иннинэ ылыллан, күн бүгүн ахсааннара элбиир. Биһиги тыйыс усулуобуйалаах сирбитигэр-уоппутугар, 50 кыраадыстаах томороон тымныыбытын бу сэдэх кыыл аахсыбакка тыыннаах айылҕа кэрэһиттэрэ буолан ууһууллара кэрэхсэбиллээх эрэ. 

 

Айан түмүгүнэн норуот депутаттара Саха Республикатын айылҕа харыстабылын министрэ Владимир Григорьев үлэтин сүрүн хайысхатын быһыытынан быһаарыылаах санаанан салайтарарын, Сахабыт сирин уйан айылҕатын харыстааһыҥҥа, сэдэх көтөрүн-сүүрэрин, кыылын-харамайын ууһатыыга ыытар политиката олоххо киирэн, республикаҕа туризм күүскэ сайдар саҕахтара торумнаммыттарын бэлиэтээтилэр.