Кулун тутар 4 күнүгэр Ил Тумэн бастайааннай хамыыһыйаларын салайааччылара, депутааттар Александр Уаров уонна Дмитрий Наумов Бүлүү улууһун Илбэҥэ нэһилиэгин уонна Бүлүү куоратын олохтоохторун кытта көрүстүлэр. Илбэҥэҕэ, таһынааҕы сытар Лөкөчөөн нэһилиэгиттэн тиийэ кэлэн, барыта 70-ча киһи, нэһилиэк баһылыга, олохтоох депутаттар, тэрилтэ салайааччылара уонна общественнай тэрилтэлэр кыттыылаах ирэ-хоро, киэҥ кэпсэтии таҕыста. Мунньахха олохтоохтор баһаарга сэрэтэр үлэлэри ыытыы, баһаарынай этэрээттэри миэстэтигэр тэрийии,  киин ититиигэ олорор дьиэлэри холбооһун, уот ситимин тупсарыы, ГСМ сыанатын үрдээһинэ, тыа хаһаайыстыбатыгар кэлэр үбүлээһиннэргэ, оҕо саадын тутуутун, оскуола капитальнай өрөмүөнэ, сааскы булка мараторийы олохтуурга, туйахтаах кыыллары бултааһын болдьоҕун кылгатары, хотон тутуутугар кыттыгас үбүлээһини уо.д.а туруорустулар.

 

Бу күн киэһэ 6 чаастан Бүлүү куоракка улуус салалтата, чуолаан баһылык Сергей Винокуров, улуус мунньаҕын бэрэссэдээтэлэ Гаврил Корякин, тэрилтэлэр салайааччылара, улуус мунньаҕын уонна нэһилиэктэр депуттааттара, общественнай тэрилтэлэр кыттыылаах көрсүһүү буолла. Бу мунньахха барыта 60 тахса киһи кыттыыны ылла. Ол курдук улуус олохтоохторун ордук долгутар боппуруостарын туруордулар: сир сокуонугар уларытыылар, ЯТЭК тэрилтэтин үлэтэ – хамнаһа, уматык сыаната, Эдьигээн суолун тутуу, сүөһү-сылгы ахсааныгар тахсар араастаһыы, ыраас иһэр уунан хааччыйыы, улууһу газ ситиминэн толору хабыы, Бүлүү куоракка балыыһа тутуута, II Күүлэт, Сыдыбыл оскуолаларын капитальнай өрөмүөнэ уо.д.а.

 

Бүлүүлэр Александр Уаровы улахан уопуттаах, улууска элбэхтик көмөлөспүт депутат быһыытынан билинэллэрин уонна өссө да кэлэр быыбарга депутат буоларыгар баҕа санааларын тиэртилэр. Дмитрий Наумов республика тыатын хаһаайыстыбата сайдарыгар элбэх сыратын биэрбит, саҥа сүүрээннэр олоххо киирэллэригэр элбэхтик үлэлэспит салайааччы, тыа дьонугар чахчы чугас депутат быһыытынан улуус дьоно билэллэр. Ол да курдук Дмитрий Федосеевич Бүлүү улууһугар быйыл үһүс сырыытын дьону кытта көрүстэ. Норуот депутаттара кэлэн көрсүбүттэригэр мунньах кыттыылаахтара махтаннылар.

 

Кулун тутар 5 күнүгэр норуо депутаттара Үэһээ Бүлүү улууһугар үлэлээтилэр. Бастаан Харбалаах нэһилиэгэр активы кытта көрсөн нэһилиэк олоҕун-дьаһаҕын билистилэр. Исидор Барахов аатынан музейга сырыттылар, нэһилиэк инники сайдыытыгар сүбэ – ама биэрдилэр. Күнүс 14.00 чааска Кэнтик нэһилиэнньэтин кытта көрүстүлэр. Кыттыыга 35 киһи сырытта. Депутаттары кытта улуус мунньаҕын бэрэссэдээтэлэ Петр Сыбахов сылдьыста. Бу көрсүүһүгэ тыа хаһаайыстыбатынан дьарыктанар дьоҕус тэрилтэлэргэ страховой взнос  улаатыытын, капкаанынан бултааһыны хааччахтааһын, Лена өрүһүн туоруур муоста тутуутун, үөрэх сокуонугар киирэр уларытыылар, үүккэ субсидия улаатыытын уо.д.а. тула элбэх интэриэһинэй аһаҕас кэпсэтии буолла. Нэһилиэнньэ элбэх мунаарар боппуруоһугар сөптөөх эппиэттэри истэн, кэпсэтиһэн баран, кэлбит депутаттарга махтаннылар уонна баҕа санааларын Александр Уаровка өссө да депутат буоларыгар биллэрдилэр. Оскуола коллектива кэлбит ыалдьыттары саҥа оскуола дьиэтигэр уонна музейга экскурсияҕа сырытыннарда.

 

Киэһэ 17.00 чаастан Үэһээ Бүлүүгэ норуот депутаттара Александр Уаров, Дмитрий Наумов, Александр Миронов нэһилиэнньэни кытта көрүстүлэр. Манна барыта 90 тахса киһи кытынна. Уокурук депутата Александр Миронов отчуотун иһиттилэр. Депутаттар элбэх боппуруоска эппиэтээтилэр, санаа атастастылар. Ордук сытыытык республика бас билиитигэр баар баайга-дуолга сыһыаннаһыы, конституцияҕа уларытыылар киириилэрэ, суверенитет боппуруостарыгар, аҕыйах ахсааннаах оскуолалар дьылҕаларын тула кэпсэтии барда. Депуттар киэҥ ис-хоһоонноох хоруйдары биэрдилэр. Ону таһынан нэһилиэнньэ сүрүн туруорсар боппуруостарынан манныгы бэлиэтиэххэ сөп: нэһилиэнньэ уокка төлөбүрэ кэккэ сытар Ньурба нэһилиэктэрин кытта араастаһыыта, өрүс уҥуордааҕы нэһилиэктэри газтааһыны түргэтэтии, гимназия 80 миэстэлээх интернатын, улуус иһинээҕи суоллары тутуу, үс уонна элбэх оҕолоох ыалларга дьиэ тутталларыгар саҥа сиргэ квартальнай тутуулары сайыннарыыга инфраструктуратын оҥорооһун уо.д.а.

 

Олохтоохтор  маннык көрсүһүүлэртэн астыналларын биллэрдилэр. Элбэх мунаарар боппуруостарыгар туһааннаах эппиэттэри ыллылар. Талбыт депутаттара Александр Миронов үлэтин биһирээтилэр уонна салгыы уокуруктан депутатка турарыгар санааларын биллэрдилэр. Мунньах 4 чаас устата барда.

 

Салгыы депутаттар атын састаабынан кулун тутар 16 – 18 күннэригэр Ньурба улууһугар үлэлээтилэр: бөлөх салайааччыта Александр Уаров, норуот депутаттара Антонина Григорьева, Семен Березин. Ол курдук Күндээдэ, Өҥөлдьө, Чукаар олохтоохторун кытта, Ньурбаҕа оройуон салалтата, улуус мунньаҕын бэрэссэдээтэлэ, нэһилиэк баһылыктара, тэрилтэлэр салайааччылара, депутаттар, общественнай тэрилтэлэр кыттыылаах Ил Тумэҥҥэ, бастайаанай кэмитиэттэргэ туох үлэ барбытын сиһилии билиһиннэрдилэр. Холобур, Александр Сергеевич Ил Тумэн РФ Государственнай Дума, Федерация Сэбиэтин кытта үлэлэри киэҥник араҥалаан сырдатта, үпкэ, бюджекка сыһыаннаах сокуоннар хаамыыларын, олоххо киириилэрин быһаарда, бюджекка туттуллар методикалар уларыйыыларын, ол курдук республика бюджета тус сыаллаах программаларга олоҕуран оҥоһулларын кэпсээтэ.

 

 

Антонина Григорьева үлэлиир сис кэмитиэтэ (үэрэх, култуура, наука уонна сонуннары маассабайдык тарҕатар сириэстибэлэр боппуруостарыгар) иитээччи, учуутал хамнастара үрдүүрүгэр күүскэ үлэлэспиттэрин, Ньурба улууһугар социальнай объектар республика инвестиционнай программатыгар киирэллэригэр туруорсубутун иһитиннэрдэ.

 

Семен Березин доруобуйа харыстабылыгар  уонна социальнай көмүскэлгэ сис кэмитиэт үлэтин билиһиннэрдэ. Тыа сирдэригэр чуолаан киирбит боппуруостар: Күндээдэ, Чукаар оскуолаларын, детсадтары тутуу, тыа сирдэригэр киин ититиигэ олорор дьиэлэри холбонуу, саҥа котельнайдары тутуу, үрдүк күүрүүлээх уот тутуутун түргэтэтии, муниципальнай суоллары тутуу, элбэх оҕолоох ыалга көмөлөр, арыгылааһын, үлэтэ суох буолуу боппуруостара уо.д.а.

 

Депутаттар нэһилиэк олохтоохторун кытта атах тэпсэн олорон санаа атастаһан, ирэ-хоро кэпсэтэн элбэх боппуруоска эппиэттээтилэр, практическай сүбэ-ама биэрдилэр. Нэһилиэк дьоно  көрсүһүүлэргэ бу кэлбит депутаттар үлэлэрин сэргииллэрин уонна салгыы депутат буолалларыгар кэс тылларын эттилэр. Барыта 160-ча киһи кытынна.

 

 

 

Ньурбаҕа буолбут мунньахха 100–кэ киһи кыттыыны ылла, кэпсэтии бэрт сэргэхтик барда. Дьон – сэргэ мунньахха активнайдык, бэйэлэрин санааларын аһаҕастык этиллэр – тыыннылар. Доруобуйа харыстабылын боппуруостарын, ол курдук Ньурбаҕа психоневрологическай отделение дьиэтин тутуу, сүрэх, тымыр уонна хаан баттааһынын ыарыыларыттан эмтэнэн тахсар ыарыһахтарга Антоновка участковай балыаһатыгар реабилитациялыыр балыаһаны арыйыы, лейкоз ыарыылаахтары эминэн хааччыйыы, сааххалланар туруктаах дьиэлэртэн көһөрүү, култуура туһунан сокуону ылыныыны түргэтэтии, таас детсад тутуута, социальнай көмүскэл боппуруостара уо.д.а.

 

Кулун тутар 18 күнүгэр норуот депутаттара Сунтаарга үлэлээтилэр.