Ил Түмэн спикерэ Виталий Басыгысов аһаҕас эфир кэмигэр кэпсэтиитэ сүрүннээн республика сокуону оҥорор уонна ылынар уорганын үлэтин, инники былааннарын, итиэннэ 2025 сылга диэри Уһук Илин уокурук уонна Байкал регионун социальнай-экономическай сайдыытын тус тосхоло Саха сиригэр дьайыытын тула буолла. Чуолаан, бу тосхол сүрүн хайысхаларын – транспорт магистралларын аныгы кэм ирдэбилигэр сөп түбэһиннэрэн, тупсаран оҥоруу, массыына суолларын тутуу уонна реконструкциялааһын, хотугу муоранан суол, аэродромнар тустарынан этилиннэ.

 

Итини тэҥэ, Ил Түмэн спикерэ биэриини ыытааччылар Уһук Илин уокурук уонна Байкал регионун сайдыытын тосхолугар дьон олохсуйа хааларын ситиһиигэ, үлэлииргэ-үөрэнэргэ табыгастаах усулуобуйаны тэрийиигэ биир сүрүн болҕомто ууруллубутун бэлиэтээн туран, манна туох кыһалҕалаах өрүттэр баалларын туһунан, атын регионнары кытта тэҥнээтэххэ, Саха сирин олохтоохторо хайдах усулуобуйаҕа олороллорун, республика сайдыытыгар, дьон-сэргэ олоҕо тупсарыгар эбии ханнык салааны сайыннаран үлэлэтиэххэ сөбүн туһунан уонна да атын ыйытыыларыгар хоруйдаата.

 

Виталий Басыгысов радионан истээччилэр эфиргэ быһа тахсан төрүт, кыра ахсааннаах хотугу норуоттар интэриэстэрэ бу тосхолго тоҕо киллэриллибэтэҕин туһунан, улахан хампаанньалар кэлиилэригэр сир-уот алдьатыыта күүһүрүөх курдугун, онно салалта өттүттэн туох көмүскэнэр дьаһаллары ылынар санаалааҕын туһунан ыйытыыларыгар тутатына хоруйдаан истэ.

 

Дьокуускай куорат олохтоохторо Ил Түмэн спикеригэр олорор дьиэ сыаната, ипотека бырыһыана аһара үрдүгүн онно сокуон өттүнэн туох көрүллэрин, республика киин куоратын сайдыытыгар туох миэрэлэр ылынылалларын туһунан уонна да атын боппуростары биэрбиттэригэр тустаах хоруйдары ыллылар.