Александр Жирков бу тэрээһин кыттааччыларыгар: олоҥхону үөрэтээччилэргэ-чинчийээччилэргэ, тарҕатааччыларга, олоҥхоҕо уһуйааччыларга туһаайан тыл этэригэр республика салалтата государство өттүттэн оҕоҕо олоҥхону иҥэриигэ дьаныардаах үлэни ыытыахтааҕын бэлиэтээн туран, «ол үлэ биир үтүө көрдөрүүтүнэн бу «Олоҥхо дойдутун оҕото» республикатааҕы фестиваль буолар», диэтэ.

 

Кини быйыл сайын ыытыллыахтаах Олоҥхо Ыһыаҕар оҕолорго анаан үс бастыҥ олоҥхоһут уонна үс бастыҥ оһуохайдьыт күрэстэрэ үһүс төгүлүн тэриллиэҕэ, диэтэ. Александр Жирков Хотугу Илиҥҥи федеральнай университет ректорыгар Евгения Михайловаҕа оскуола оҕолоругар тэриллэр оһуокай уонна олоҥхо күрэһин кыайыылаахтарыгар Парижка барарга путевканан наҕарадалааһыҥҥа көмөтүн иһин махталын тириэртэ.

 

Александр Николаевич итини кэккэ олоҥхо персонажтарын таҥастарыгар-саптарыгар республикатааҕы күрэх ыытыллыбытын, ол түмүгүнэн быыстапка тэриллибитин, каталог оҥоһуллан тахсыбытын ахтан туран, олоҥхоҕо оҕону кыра эрдэҕиттэн чугаһатар, уһуйар араас өрүттээх үлэни ситимин быспакка ыытарга ыҥырда.  

 

Ил Түмэн вице-спикерэ Саха Республикатын үөрэҕириигэ, култуураҕа уонна духуобунаска министиэристибэлэрин өттүлэриттэн олоҥхону оҕоҕо өссө ордук чугаһатар үлэлэрин күүһүрдүөхтээхтэрин бэлиэтээтэ. Итини тэҥэ, тустаах тэрилтэлэр, олоҥхоҕо уһуйааччылар бу үлэни өссө хайдах сайыннарар туһунан санааларын үллэстэллэригэр, этиилэрин киллэрэллэригэр этэн туран: «Итини сыыска-буорга түһэрбэккэ, өйөбүл-көмө оҥоруох тустаахпыт, олоҥхо эйгэтэ сайдарын, кэҥиирин туһугар күүспүтүн түмэн кэнэҕэскибитин түстээн үлэлиэхтээхпит. Олоҥхо тылыгар уһуйуллубут оҕо бэйэтин санаатын толлубакка этэр, кыаҕын сатаан көрдөрөр-туһанар киһи буола улаатыахтаах», диэтэ Александр Николаевич.

 

Республикатааҕы фестиваль арыллыытыгар М.К.Аммосов аатынан ХИФУ культурологияҕа кафедратын доцена, педагогическай наука кандидата, Галина Попова-Саная, республикатааҕы Олоҥхо киинин салайааччыта, филологическай наука кандидата Агафья Захарова, А.Е.Кулаковскай аатынан Норуоттар доҕордоһууларын дириэктэрэ Яна Игнатьева эҕэрдэ тылы эттилэр.

 

«Олоҥхо дойдутун оҕото» республикатааҕы фестиваль үс күн устата ыытыллар, ол кэмигэр дьүүллүүр сүбэ бастыҥ олоҥхоһуттары быһаарыа, «Олоҥхо оҕо хараҕынан» диэн оҕолор уус-уран оҥоһуктарын, уруһуйдарын быыстапката, «төгүрүк остуол» үлэлиэ.