Көрсүһүүнү саҕалыырыгар Ил Түмэн вице-спикерэ, Александр Жирков үгэс буолбут сиэринэн үөрэҕирии, ыччат эйгэтигэр республика салалтатын, Ил Түмэн үлэтин туһунан билсиһиннэрдэ. Хас биирдиилэриттэн ким ханнык идэни талбытын, ханнык үөрэх тэрилтэтигэр киириэн баҕарарын сиһилии туоһуласта, тустаахсүбэ-ама биэрдэ. Гимназияны бүтэрээччилэр үксэ техническэй хабааннаах идэни талбыттарын уонна ХИФУ-га ордук туттарсар былааннахтарын бэлиэтээтэ. Хас да оҕо киин куоракка уонна Дьокуускайга, иккилии үрдүк үөрэх тэрилтэлэригэр туттарсар баҕалаахтарын биллэрдилэр.

 

Манна даҕатан эттэххэ, Александр Жирков бу гимназияны олохтоспут бочуоттаах попечителынан буолар. Гимназия инновационнай үөрэх тэрилтэтин быһыытынан үлэлээбитэ 15 сыла буолла. Бу кэм иһигэр үөрэх хаачыстыбата икки төгүл үрдээтэ.

 

Гимназияны бүтэрээччилэр бары киин уонна өрөспүүбүлүкэ үрдүкү үөрэх кыһаларыгар киирэн үөрэхтэрин салгыыллар. Кинилэр үксүлэрэ техническэй идэлэри талан үөрэнэргэ дьулуһаллара өрөспүүбүлүкэбит аныгы кэм ирдэбиллэригэр эппиэттиир буола сайдарыгар кэрэхсэбиллээх. Александр Николаевич бу гимназия выпускниктарын кытта уон биирис көрсүһүүтэ.

 

Бу тэрээһиҥҥэ Саха Республикатын профессиональнай үөрэҕириигэ, кадрдары бэлэмнээһиҥҥэ уонна ааттаран туруорууга миниистири I-кы солбуйааччы Степан Москвитин, М.К.Аммосов аатынан ХИФУ I-кы проректора Василий Васильев, ХИФУ Киин приемнай комиссиятын эппиэттиир секретэрэ Елизавета Ильина кытыннылар уонна дойду киин кораттарын үрдүкү үөрэх тэрилтэлэригэр, М.К.Аммосов аатынан Хотугу-Илиҥҥи федеральнай университеккэ киирии бэрээдэгин туһунан, устудьуоннар олорор уопсай дьиэлэрин усулуобуйаларын туһунан сиһилии кэпсэтилэр. Мүрүтээҕи уолаттар гимназияларын 11 кылааһын салайааччыта Матрена Иванова уонна оҕолор ыйытыыларыгар тустаах хоруйдары биэрдилэр.

 

Көсүһүүнү түмүктүүрүгэр Александр Жирков оҕолор сөбүлээбит идэлэрин сөптөөхтүк талан, үрдүк үөрэх кыһатын ситиһиилээхтик бүтэрэн төрөппүттэригэр, дьонноругар-дойдуларыгар туһалаах, үрдүк таһымнаах специалистар, үлэһиттэр, салайааччылар буола үүнэллэригэр баҕарда.