Ыам ыйын 20 кунугэр Саха Республикатын Государственнай Мунньаҕын (Ил Түмэн) анал хамыыһыйата халаан уутуттан эмсэҕэлээбит республика нэһилиэктэригэр суһал көмөну оҥорууга туһуламмыт иккис мунньаҕын ыытта. 
 
Мунньахха депутаттар Дмитрий Горохов, Семен Олесов, Николай Костромин, Вячеслав Куличкин, СР тыа хаһаайыстыбатын министрин солбуйааччыта Николай Афанасьев, тустаах министерстволар эппиэттээх улэһиттэрэ, Уус-Алдан биир дойдулаахтарын түмсүүтэ кыттыыны ыллылар.
 
Хамыыһыйа үлэтин салайар Ил Түмэн вице-спикерэ Александр Жирков ыам ыйын 17 кунугэр ыытыллыбыт маҥнайгы мунньах кэнниттэн үлэ хаамыытын билиһиннэрдэ. 
 
Ааспыт мунньахха этиллибитин курдук, СР Үөрэҕин министерствотын кытта сөбүлэһии түмүгүнэн Уус-Алдан улууһун үс оскуолатыттан 50 оҕо Дьокуускай куоракка «Сосновай бор» профилакторийга олорон үөрэнэ, экзаменнарыгар бэлэмнэнэ кэлэллэрэ быһаарыллыбыт. Ону тэҥэ, тыа хаһаайыстыбатын министерствота сүөһүлэрэ ууга былдьаммыт хаһаайыстыбаларга көмөнү оҥорууну ураты хонтуруолга ылан, СР Правительствотын анал дьаһалын барылын бэлэмниир. «Дойдум миэнэ Уус-Алдан» түмсүү гуманитарнай көмө хомуйуутун саҕалаабыт.
 
Халаан уутуттан эмсэҕэлээбит нэһилиэктэргэ гуманитарнай көмөну оноруу, суолу-ииһи, социальнай инфраструктураны өрөмүөннүүр үлэни тэрийии — тыын боппуруоһунан буолар. Кини депутаттар гуманитарнай көмөну хомуйан саҕалаабыттарын, билигин бары тэрилтэлэр, биирдиилээн дьон биир санаанан салайтаран ууга барбыттарга көмөлөһөллөрүгэр ыҥырда.
 
«Уус-Алданна дьон-сэргэ халаан уута быстах кэмҥэ кэллэ, сотору ааһар ини дии санаан, малларын, таҥастарын дьиэлэригэр хаалларан турар бэйэлэринэн тахсан барбыттар. Онон хоромньу кээмэйэ улахан, дьон туох баар баайдарын-дуолларын, малларын-саптарын ууга былдьаппыттар. Таҥас-сап, ордук утуйар таҥас комплега тиийбэт. Билиҥҥи туругунан, Уус-Алдаҥҥа 320 комплегы ыыттыбыт. Уопсайа бу улууска 1300 тахса киһи эмсэҕэлээбит, онон дьон-сэргэ биһиги көмөбүтүн кэтэһэр», - диэн Александр Жирков иһитиннэрдэ.
 
Иккис тыын боппуруоһунан өрөмүөннүүр, чөлүгэр түһэрии үлэтин ыытыы буолар. Үгүс нэһилиэктэргэ уот остуолбалара сууллан, суол-иис алдьанан, улахан хоромньу тахсыбыт. Александр Жирков суол аһылынна даҕаны, тутуу матырыйаалынан хааччыйыыны тутатына саҕалыырга эттэ. Ону тэҥэ, Ил Түмэн анал хамыыһыйата ыччат министерствота уонна үөрэх тэрилтэлэрэ эмсэҕэлээбит нэһилиэктэргэ тутар этэрээттэри ыыталларын туруорсар.  
 
Нэһилиэктэргэ хоромньу кээмэйин быһаарар докумуоннарга улахан бутуур тахсар, докумуоннары сыыһа толоруу баар, - диэн Александр Жирков бэлиэтээтэ. Онон күн-сарсын хамыыһыйа чилиэннэрэ миэстэтигэр тиийэн дьон-сэргэ ортотугар өйдөтөр-быһаарар үлэни ыытыахтара. Ону тэҥэ мунньах түмүгүнэн хамыыһыйа солбуйааччы бэрэссэдээтэлинэн Уус-Алдантан төруттээх Айхал Габышев,  «Союз строителей Якутии» НП директорын бастакы солбуйааччыта талылынна.
 
Дмитрий Осипов, «Ил Тумэн» хаhыат