Саха Өрөспүүбүлүкэтин бар дьонун дьокутаата Антонина Григорьева 2017 сыл бэс ыйын 30 - от ыйын 1 күннэригэр Ньурба улууһун быйаҥнаах буордаах Бордоҥ сиригэр Россияҕа Тулалыыр эйгэни харыстыыр, Саха Өрөспүүбүлүкэтигэр ыччат, Бордоҥ нэһилиэгэр тыа хаһаайыстыбатын, «Степан Васильев аатынан»  сопхуос  тэриллибитэ 50 сылларыгар аналлаах үрүҥ илгэни үксэтэр удьуор үлэһит дьонун уруйдуур сопхуос биэс отделениетын,  биэс нэһилиэк «Сомоҕо ыһыаҕар» кыттыыны ылла.

Ыһыах түhүлгэтигэр ыаллыы сытар Чуукаар, Өҥөлдьө, Малдьаҕар, Мэҥэдьэк нэһилиэктэриттэн, ыраах-чугас сирдэртэн ытык мааны ыалдьыттар тоҕуоруһа муһуннулар.

 

Ыһыах уратытынан оһуохай күрэҕин арыллыыта «Айар киин» норуот айымньытын дьиэтин тэлгэһэтигэр быйыл саҥа тутуллубут «Оһуокай кырдалыттан» саҕаламмыта буолла. Ыытыллыбыт сиэр-туом кэннэ саҥа сиргэ оһуохай оройуттан тутулунна, мас тардыһыытын, фольклор күрэхтэрэ ыытылыннылар. Киэһэ өттүгэр биэс нэһилиэк талба талааннаахтарын кыттыгас кэнсиэрэ толору көрөөччүлэринэн, ыһыах ыалдьыттарынан туолла.

Бордоҥнор «Муостаах» диэн сиргэ 90-с сыллартан  ыһыах ыһаллар, бу кэрэ сири сөпкө тайанан бастакы тутууларын ыыппыт киһинэн, быйыл 80 сааһын туолбут Маалыкай ытык кырдьаҕаһа Нестер Климович Антонов буолар.

 

Ыһыах арыллыытын сиэрэ-туома от ыйын 1 күнүгэр күн оройо үүнүүтэ саҕаланна, ыһыаҕы үөрүүлээхтик арыйыы үс түһүмэҕинэн ыытылынна. Ыалдьыттар, биэс нэһилиэк баһылыктарын, сопхуос бэтэрээннэрин парадтара; арчы, алгыс сиэрдэрэ-туомнара, «Сайылыкка көһүү» театрализованнай дьүһүйүү; кымыс иһиитин сиэрэ-туома, ыһыах «Ытык Дуоҕатын» анньыы ыһыах кыттыылаахтарын болҕомтотун тарта. Ол кэнниттэн Степан Васильев аатынан сопхуоска өр кэмҥэ үлэлээбит бэтэрээннэри, үлэ дьонун чиэстээһин, наҕараадалааһын ыытылынна. Саха Өрөспүүбүлүкэтин Ил Түмэнини бэрэссэдээтэлин махтал суругунан өр сылларга ыанньыксытынан үлэлээбит Елена Егоровна Егорова, 90-нун ааспыт Афанасий Васильевич Кириллин «Саха Өрөспүүбүлүкэтин Ытык кырдьаҕаһа» бэлиэнэн наҕараадаланнылар. Сопхуос сайдыытыгар эҥкилэ суох үтүө суобастаахтык үлэлээбит Малдьаҕар нэһилиэгин сылгыһыта Александр Николаевич Самсонов, Маалыкайтан Иван Николаевич Спиридонов «Саха Өрөспүүбүлүкэтин Бочуоттаах бэтэрээнэ»;  Яковлев Трофим Никифорович «Саха Өрөспүүбүлүкэтин тыатын хаһаайыстыбатын бэтэрээнэ» ааты ыллылар.

 

«Улууспут хоһуун үлэһит дьоно өрөспүүбүлүкэбит сайдыытыгар анаабыт олохторо, үтүө холобурдара, муударай уопуттара төрөөбүт Ньурбабыт олоҕун таһыма, культурата, экономиката салгыы сайдарыгар кэлэр көлүөнэлэргэ холобур буола туруоҕа диэн эрэнэбит.

 

Үрүҥ тунах ыһыах кэлбитинэн дойдум дьонун иһирэхтик, истиҥник ис сүрэхпиттэн эҕэрдэлиибин! Өҥ дьыл үүнэн олох тупсар кэскиллэннин, өй-санаа сырдык тыына саргынан туоллун! Самаан сайын салаллыбыт үөрүүтүн бука бары бииргэ сомоҕолоһон, дойдубут сайдар кэскиллээх саҕахтарын салайар, арыйар күүстэ-уохта иҥэринэн, тупсар эрэ туһугар туруулаһа туруоххайыҥ, күндү биир дойдулаахтарым!

 

Саамал кымыс утахтаах самаан сайын кэлбитинэн Уруй-Туску буолуохтун!» - диэн Антонина Григорьева бэйэтин эҕэрдэтин тиэртэ.

 

 

Мария Андросова