Ил Түмэн XV пленарнай  мунньаҕар парламентарийдар салгыы СР Ааҕар-суоттуур палататын 2014 сыллааҕы үлэтин отчуотун дьүүллэстилэр.
 
Ааҕар-суоттуур палата председателэ Егор Марков иһитиннэрбитинэн, республика үрдүнэн уопсайынан  3 526,6 мөл. солкуобайдаах бюджет үбэ хайдах туһаныллыбыта бэрэбиэркэлэммит. Бэрэбиэркэ түмүгүнэн 1 084,2 мөл. солкуобайдаах үбү туһаныыга кэһиилэр бааллара, үп-харчы көдьүүһэ суох туттуллубута быһаарыллыбыт. Холобура, сири нүөлсүтүүгэ госбюджеттан көрүллүбүт үбү чопчу 3 объекка (Өлүөнэ өрүс -- Туора Күөл уу турбатын өрөмүөннээһин, Уус-Алдаҥҥа Хачыдыма – Дүпсүн ууну тиэрдэр объегы тутуу уонна Үөһээ Бүлүүгэ Ороһутааҕы 6 №-дээх шлюз-регуляторы чөлүгэр түһэрии) хайдах туһаммыттарын бэрэбиэркэлээһин түмүгэр үп көдьүүһэ суох туттуллубута бэлиэтэнэр. Хачыдыма – Дүпсүн ууну тиэрдэр объект өр сыллар усталарыгар тутулла сатыыр эрээри, сирэ ууга баран хаалан, тутуллар кыаҕыттан тахсыбыт. Кулун тутар 5 күнүгэр Ил Түмэн тыа хаһаайыстыбатыгар уонна аграрнай политикаҕа  сис кэмитиэтигэр Палата отчуотун истии кэмигэр депутаттар тутуллар кыаҕыттан тахсыбыт маннык тутууларга сыл ахсын бюджеттан үбү туһата суох  кутуу табыллыбатын, үп ханна барара биллибэтин, маны кытаанах эппиэккэ тардар наадатын ыйбыттара. Оттон Тыа хаһаайыстыбатын уонна ас-үөл политикатыгар министр Александр Артемьев Хачыдыма – Дүпсүн ууну тиэрдэр объегын боппуруоһун депутаттар тус хонтуруолларыгар ылалларыгар эппитэ.
 
Бюджет үбэ тус сыалынан туһаныллыбатах суумата  10,2 мөл солкуобайга тэҥ. Ити туһунан суругу Палата СР Ис дьыалаҕа министерствотын экономическай куттал суох буолуутун управлениетыгар ыыппыт.
 
Егор Марков иһитиннэриитин дьүүллэһиигэ депутаттар Евгения Михайлова, Василий Власов, Юрий Григорьев, Владимир Федоров уо.д.а. кытыннылар. Палата ыыппыт ити бэрэбиэркэтин түмүгэр быраабы харыстыыр уорганнар дуоһунастаах дьону эппиэккэ тардан испэттэрэ норуот депутаттарын улахан болҕомтотун тарта. Ол курдук депутаттар 2014 сылга үбү көдьүүстээхтик туһаныыны Палата хонтуруоллааһын түмүктэриттэн  астымматахтарын биллэрдилэр. Владимир Федоров отчуокка үрдүк трибунаттан тоҕо биир да дуоһунастаах киһи аата ааттамматаҕын туһунан ыйыталаста. Онуоха Егор Марков хас биирдии бэрэбиэркэлэммит түгэҥҥэ Палата бэйэтин сайтыгар дуоһунастаах дьон аатын ыйарын, бэрэбиэркэ түмүгүнэн үс киһи буруйга, 9 киһи дисциплинарнай эппиэтинэскэ тарлыллыбытын, бэрэбиэркэ түмүктэрэ быраабы харыстыыр уорганнарга тиксэриллэрин, эппиэккэ тардыынан Ис дьыала уорганнара дьарыктаналларын туһунан хоруйдаата. Оттон республика прокуратуратыттан Егор Неустроев этэринэн, прокуратура дьыаланы Силиэстийэлиир кэмитиэккэ ыытарын, кэмитиэт буруйу оҥоруу састаабыттан көрөн, Ис дьыала көрүүтүгэр ыытылларын туһунан иһитиннэрдэ.
 
Леонид Владимиров ааспыт сылларга тэҥнээтэххэ, Ааҕар-суоттуур палата хонтуруоллуур буолуоҕуттан ыла бюджет үбүн көдьүүһэ суох туһаныы кыччаан иһэрэ көстөрүн, онон палата үлэтэ балачча көдьүүстээх буолбутун бэлиэтээтэ.  Василий Власов уонна Виктор Федоров СРАаҕар-суоттуур палататын туһунан республика сокуонугар палата бюджет үбүн туһаныыны бэрэбиэркэлиир боломуочуйатын кэҥэтэн, эппиэккэ тардыы өттүгэр күүскэ үлэлиирин хааччыйар эбии пууну киллэрии наадатын эттилэр. 
 
Ити курдук норуот депутаттара бюджет үбэ ханна, хайдах уонна төһө көдьүүстээхтик туһаныллара дьэҥкэтик көстүбэтэ, балаһыанньа көнөн быстыбата дьону долгутарын быһыытынан итиэннэ  билигин бюджет эйгэтигэр уустук кэмнэр туралларынан үбү-харчыны көдьүүһэ суох туһаныы түбэлтэлэригэр дуоһунастаах дьону кытаанах эппиэккэ тардан иһэр наадатын ыйан туран, отчуоту ылыннылар.
 
Ил Түмэн пресс-сулууспата