Бу күн Ньурбатааҕы улуустар икки ардыларынааҕы кырдьаҕастар уонна инбэлииттэр интэринээт-дьиэлэригэр Ньурба улууһун чулуу кыыһа, политическай деятель Варвара Андреевна Петрова үтүө аатын иҥэрдилэр.  Быйыл норуот хаһаайыстыбатын үтүөлээх үлэһитэ, 1995-2002 сылларга Ньурба улууһун баһылыга, Саха сирин Үрдүкү Сэбиэтин ыҥырыыларын, Ил Түмэн бастакы ыҥырыытын депутата Варвара Андреевна Петрова төрөөбүтэ 80 сыла буолла. «Варвара Андреевна Петрова өрөспүүбүлүкэҕэ киэҥник биллэр салайааччы, дириҥник сүгүрүйэр киһим этэ. Кини Ньурба улууһун эрэ буолбакка, бүтүн өрөспүүбүлүкэ социальнай-экономическай сайдыытыгар сүҥкэн кылааты киллэрсибитэ. Накыыннааҕы кэмбинээти тэрийиигэ аан бастакынан тыл көтөхпүт киһинэн эмиэ кини буолар. Кырдьаҕастар уонна инбэлииттэр интэринээт-дьиэлэригэр Варвара Андреевна Петрова үтүө аата иҥэриллибититтэн олус үөрдүм», - диир Ил Түмэн депутата Марфа Филиппова. Кини интэринээт-дьиэ 20 сыллаах үбүлүөйүнэн уонна Варвара Андреевна Петрова аата иҥэриллиитинэн олохтоохтору, сиэр-туом кыттыылаахтарын эҕэрдэлээтэ.

 

Ньурба куоратыгар баар улуустар икки ардыларынааҕы кырдьаҕастар уонна инбэлииттэр интэринээт-дьиэлэрэ 1996 сыллаахха СӨ Бырабыыталыстыбатын 1995 сыл сэтинньи 20 күнүнээҕи 504 №-дээх уурааҕынан тэриллибитэ. Бастаан утаа бу интэринээт улуус таһымнааҕа, оттон икки сыллааҕыта, оптимизация чэрчитинэн, улуустар икки ардыларынааҕы интэринээт буолбута. Онон билигин манна Бүлүү бөлөх түөрт улууһун кырдьаҕас уонна инбэлиит дьоно олороллор. Тэрилтэ салайааччытынан Валентина Никифоровна Котоконова интэринээт бастаан аһыллыбыт күнүттэн үтүө суобастаахтык үлэлии-хамсыы сылдьар. Дириэктэри солбуйааччынан социальнай харысхал эйгэтигэр улахан уопуттаах уонна эппиэтинэстээх киһи Маргарита  Ивановна  Николаева үлэлиир.

 

«Кэллэктиипкэ үтүө санаалаах, олус аламаҕай майгылаах дьон үлэлииллэр. Кинилэр олохторугар араас кыһалҕаны көрсөн интэринээккэ кэлбит дьоҥҥо ураты истиҥник, болҕомтолоохтук сыһыаннаһаллар. Ол курдук, быйыл кыһын интэринээт дьиэтин, олоҕун-дьаһаҕын билсэ, биир дойдулаахтарбын, үөһээ бүлүүлэри, көрсө бара сылдьыбытым. Онно кырдьаҕастар уонна инбэлииттэр аныгылыы оҥоһуулаах, толору хааччыллыылаах, сырдык уонна сылаас дьиэҕэ олороллорун көрөн астыммытым», - диэн кэпсиир Марфа Филиппова.

 

Интэринээт олохтоохторун сайыҥҥы өттүгэр сайылыкка көһөрүү туһунан кэпсэтии бара турар эбит. «Биһиги ити этиини болҕомтоҕо ылыахпыт уонна тус бэйэм эмиэ көмө оҥоруом диэн эрэннэрэбин», - диир норуот депутата.

 

«Билигин интэринээккэ 23 биир дойдулаахтарым олороллор. Кинилэр, биллэн туран, төрөөбүт түөлбэлэрин, дьоннорун-сэргэлэрин ахталлар. Ол иһин, дойдуларыттан сибиэһэй солуну истэ олордуннар диэн, Үөһээ Бүлүү улуустааҕы хаһыатыгар уонна Саха сирин парламенын үлэтин-хамнаһын сырдатар «Ил Түмэн» хаһыакка суруйтарбытым», - диэтэ Марфа Семеновна.

 

«Кэллэктиип хас биирдии үлэһитигэр барҕа махталбын биллэрэбин. Кинилэр үтүө санааларыгар, истиҥ сыһыаннарыгар угуттанан кырдьаҕастар уонна инбэлииттэр өссө да уһуннук, этэҥҥэ олоруохтара диэн эрэнэбин», - диир  Марфа Филиппова.

 

Ити курдук, Ил Түмэн депутата Марфа Филиппова интэринээт-дьиэ төрүттэммитэ 20 сылын бэлиэтиир тэрээһин истиҥ иһирэх тыынынан ааспытын бэлиэтээтэ.

 

«Ил Түмэн» хаһыат корреспондена Мария ПАВЛОВА