Үйэлэр кирбиилэрин килбиэннээх кыыһын Люлия Николаевнаны, өрөспүүбүлүкэ, оройуон салалтата, сэбиэскэй-партийнай үлэ бэтэрээннэрэ, үөлээннээхтэрэ, биир дойдулаахтара эҕэрдэлээтилэр. Чиэстээһиҥҥэ Люлия Николаевна Григорьева олоҕун аргыһа Василий Игнатьев, уола Сергей Григорьев кытыннылар.  

 

Оройуон салалтатын, дьонун-сэргэтин аатыттан Николай Старостин: «Өр сылларга тыа хаһаайыстыбата уонна оройуон сайдыытыгар улахан кылааты киллэрбит, өрөспүүбүлүкэҕэ Верховнай Сэбиэт салайааччытынан үлэлээбит ытыктыыр аҕа табаарыспыт, сүбэһиппит Люлия Николаевнаны, кырдьык даҕаны, дьахтар салайааччы быһыытынан биир тарбахха баттанар, киэн туттар киһибит буолар диэн бэлиэтиэх тустаахпыт. Ханнык баҕарар киһиэхэ ылыннарыылаах тылынан-өһүнэн, сүбэтинэн өрүү өйөбүл-тирэх буолар. Тус бэйэм ону иҥэринэ сылдьабын. Эдэрдии эрчимнээхтик үөрдэ-көтүтэ, үлэлии-хамсыы сылдьаргар баҕа санаабытын тиэрдэбит», ‒ диэн туран оройуон баһылыгын грамотатын үөрүүлээх быһыыга-майгыга туттарда.

 

«Бэҕэһээ өрөспүүбүлүкэ салалтатын улахан саалатыгар Ил Дархан Егор Борисов, Ил Түмэн бэрэссэдээтэлэ Александр Жирков өрө көтөҕүллэн туран Люлия Николаевнабытын эҕэрдэлээтилэр», ‒ диэн Ил Түмэн дьиэ кэргэҥҥэ, оҕоҕо, ыччакка, физическэй култуураҕа уонна спорка сис кэмитиэтин бэрэссэдээтэлэ Юрий Баишев этиитигэр бэлиэтээн ааста. «Истэн олорон мэҥэ-хаҥаластар киэн туттуубут өссө дириҥээтэ, олус үөрдүбүт. Ил Дархан Люлия Николаевна үлэлиир кэмнэригэр тыа хаһаайыстыбатын салаатыгар үрдүк ситиһиилэр бааллара, онуоха кини тус бэйэтинэн үлэлэспитин тоһоҕолоон бэлиэтээтэ. Оҕолорунан киэн туттарбытын биллэрэбит, ийэлэрин суолун салгыахтара диэн эрэнэбит», ‒ диэтэ. Салгыы өрөспүүбүлүкэтээҕи коммунистическай партия салаатын салайааччы Виктор Губарев, оройуон дьокутааттарын Сэбиэтин бэрэссэдээтэлэ Андрей Находкин, улуустааҕы бэтэрээннэр сэбиэттэрин бэрэссэдээтэлэ Маргарита Максимова, улуустааҕы «Ытык Сүбэ» салайааччыта Василий Эверстов, тэрилтэлэр салайааччыларыттан Валерий Исаков о.д.а. сылаас, истиҥ эҕэрдэ тылларын анаатылар. 

 

Билигин да эдэрдии эрчимнээхтик үлэлии-хамсыы сылдьар үбүлүөйдээх Люлия Николаевна үтүө алгыс тылларын тэҥэ «Майа сэлиэнньэтин Бочуоттаах гражданина» ааты сүгэр чиэстэннэ. Биир дойдулаахтарыттан хаптаҕайдартан уһаайба, нэһилиэк баһылыктарыттан убаһа бириэмийэлэри тутта. Хаптаҕай нэһилиэгин баһылыга Екатерина Гаврильева саҥа кыбаарталга Люлия Николаевна Григорьева аата иҥэриллибитин иһитиннэрдэ. 

 

Үөрүүлээх тэрээһин улууспут талааннаахтарын эҕэрдэ нүөмэрдэринэн киэргэтилиннэ. Улуустааҕы киин библиотека кэлэктиибэ «Модун санаа, үтүө майгы, сыралаах үлэ ‒ үрдүк ситиһии» диэн үлэтин-хамнаһын билиһиннэрэр кинигэ, улуустааҕы кыраайы үөрэтэр музей кэлэктиибэ Люлия Николаевна музей пуондатыгар бэлэхтээбит хаартыскаларын, наҕараадаларын быыстапкатын туруордулар.   

Бу күн Люлия Николаевна Аллараа Бэстээххэ «Олоҥхо дьиэтэ» норуот айымньытын киинигэр уопсастыбаннай үлэҕэ көхтөөх дьахталлары кытта көрүстэ.