Бүгүн, балаҕан ыйын 1 күнүгэр, Ил Түмэн депутата Марфа Филиппова М.А. Алексеев аатынан Үөһээ Бүлүүтээҕи республикатааҕы гимназияҕа Билии күнүгэр аналлаах үөрүүлээх линейкаҕа кытынна. Линейка кэнниттэн Марфа Семеновна 9 «в» кылааска ыытыллыбыт аһаҕас уруокка сырытта.

 

«1966 сыллаахха ССРС народнай учуутала, Ленин уордьанын кавалера, Өксөкүлээх Өлөксөй аатынан бириэмийэ лауреата Михаил Алексеев быһаччы кыһамньытынан Үөһээ Бүлүүгэ аан бастаан физико-математическай кылаас аһыллыбыта. Ол кэмтэн ыла номнуо үйэ аҥаара ааста. Бүгүн гимназияҕа ыытыллыбыт үөрүүлээх түгэҥҥэ ыраахтан-чугастан выпускниктар мустубуттар. Ол курдук, 1970 сыллаахха физиканы, математиканы дириҥэтэн үөрэтэр кылаастары бүтэрбиттэр үөрэммит оскуолаларыгар Билии күнүгэр ыалдьыттыы кэлбиттэрэ олус долгутуулаах буолла. 9 «в» кылааска аһаҕас уруокка сылдьан Саха сирин парламенын үлэтин-хамнаһын туһунан сырдаттым, бэйэм оскуолаҕа үөрэммит сылларбын ахтан-санаан аһардым. Үөрэнээччилэр уруокка олус көхтөөхтүк кытыннылар», - диир норуот депутата Марфа Филиппова.

 

Салгыы сарсыарда 11 чаастан норуот депутата үөрэммит кыһатыгар, Үөһээ Бүлүүтээҕи 2 №-дээх орто оскуолаҕа ыалдьыттаата. Быйыл оскуола боруогун 14 кырачаан үөрэнээччи аан бастаан атыллаабыт. «Мин Үөһээ Бүлүүтээҕи 2 №-дээх орто оскуоланы 1982 сыллаахха бүтэрбитим. Бииргэ үөрэммит доҕотторум бука бары үөрэхтээх, үлэлээх-хамнастаах, дьоһун-мааны ыал ийэтэ-аҕата буолан олороллоруттан үөрэбин уонна киэн туттабын. Хас биирдии киһи олоххо ситиһиитэ, табыллыыта билии ылбыт, үөрэммит кыһатыттан – оскуолаттан саҕаланар. Быйыл Үөһээ Бүлүүтээҕи 2 №-дээх орто оскуолаҕа саҥа киирбит оҕолор маҥнайгы учууталларынан киэҥ билиилээх-көрүүлээх, уопуттаах учуутал Галина Степановна Сортолова буолла. Оҕолор Галина Степановнаҕа үөрэнэр туһуттан улахан куонкуруһу ааспыттар. Онон билиҥҥи кэмҥэ Учуутал оруола олус күүстээх эбит диэн санааҕа кэллим. Саҥа үөрэх дьылыгар үөрэммит оскуолабар 6 эдэр учуутал үлэлии кэллэ.  Кинилэр Галина Степановна айымньылаах үлэтин-хамнаһын үтүө холобур оҥостон бастыҥ учуутал буолуохтара диэн эрэнэбин», - диэн кэпсээтэ Марфа Семеновна.

 

Ити курдук, Ил Түмэн депутата Марфа Филиппова икки оскуолаҕа сылдьан, үөрэнээччилэргэ ханна да тиийдэллэр төрөөбүт дойдуларын, дьоннорун-сэргэлэрин, үөрэммит оскуолаларын умнубаттарыгар, өрүү инники күөҥҥэ сылдьыахтарыгар, үөрэххэ, билиигэ-көрүүгэ дьулуурдаах буолуохтарыгар баҕа санаатын тириэртэ.

 

«Күндүтүк саныыр Учууталларбын, билии эйгэтигэр үлэлиир бары дьону, үөрэнээччилэри саҥа үөрэх дьыла саҕаламмытынан итиитик-истиҥник эҕэрдэлиибин! Оскуолаҕа аан бастаан үктэммит кырачааннарбыт үөрэх киэҥ аартыгын устун эрэллээхтик уонна дьоһуннаахтык хардыылаан истиннэр!11 кылааһы бүтэрээччилэр аны саас олох киэҥ аартыгар үктэниэхтэрэ. Кинилэргэ биир кэлим эксээмэни ситиһиилээхтик туттаран, талбыт үөрэхтэригэр киирэллэригэр баҕарабын. Саҥа үөрэх дьыла үрдүк ситиһиилэринэн, көдьүүстээх үлэнэн толору буолуоҕар эрэнэбин», - диэн Ил Түмэн депутата Марфа Филиппова Саха сирин бары олохтоохторугар эҕэрдэтин эттэ.

 

Үөһээ бүлүүлэр быйыл Саха сиригэр физмат оскуолалар хамсааһыннарын саҕалаабыт тэрийээччи, саха омук сайдыылаах, үрдүк техническэй билиилээх буолуутугар туохха да тэҥнэммэт сүдү кылааттаах, аан дойдуга тиийэ биллэр учуонайдары иитэн-үөрэтэн таһаарбыт Улуу Учуутал Михаил Андреевич Алексеев төрөөбүтэ 100 сылын үрдүк таһымҥа бэлиэтиэхтэрэ.

 

«Ил Түмэн» хаһыат корреспондена Мария Павлова