Бэс ыйын 30 күнүгэр Ньурба улууһун Үөдэйигэр Саха Өрөспүүбүлүкэтин уонна Абый, Горнай, Муома, Ньурба улуустарын  Бочуоттаах гражданина  Варвара Петроваҕа аналлаах сквер-уһаайба үөрүүлээх арыллыыта буолла. Үөрүүлээх тэрээһиҥҥэ Саха Өрөспүүбүлүкэтин Ил Түмэнин Бэрэссэдээтэлэ А.Н. Жирков, Ил Түмэн депутаттара В.М. Прокопьев, А.А. Григорьева,  В.А. Петрова бииргэ төрөөбүт быраата, алмаас бырамыысыланнаһын бэтэрээнэ С.А. Петров, Ньурба улууһун баһылыгын э.т. И.П. Никифоров, улуус Сэбиэтин бэрэссэдээтэлэ С.И. Евсеев, Ньурба куорат баһылыга А.М. Иннокентьев А.М. уо.д.а. кыттыыны ыллылар.

Ыраахтан-чугастан мустубут дьон В.А.Петрова аатынан оскуола-садыгар, Үөдэй нэһилиэгэ 350 үбүлүөйдээх сылыгар аналлаах ыһыах аһыллыытыгар, Хаҥалас нэһилиэгэр В.А. Петрова аатынан түмэлгэ сырыттылар.

 

Үөдэй нэһилиэгэр айан суолун таһыгар  Варвара Андреевнаҕа аналлаах  сквер-уһаайба аһыллыытыгар сарсыардаттан үгүс киһи муһунна. Нэһилиэк олохтоохторо биир дойдулаахтара судаарыстыбаннай, уопсастыбаннай деятель, Үөдэй нэһилиэгин статуһа төннөрүн  ситиспит  Варвара Андреевнаҕа махтаналларын, сүгүрүйэллэрин биллэрдилэр. Сквер-уһаайа  аһыллыыта биир умнуллубат историческай  күнүнэн буолла. Анаабыт курдук  чаҕылхай куйаас күн буолла.

 

Саха Өрөспүүбүлүкэтин  Ил Түмэнин Бэрэссэдээтэлэ А.Н. Жирков, Ньурба улууһун баһылыгын э.т. И.П. Никифоров, Үөдэй нэһилиэгин баһылыга Л.Н. Гаврильев, Варвара Андреевна  быраата, алмаас бырамыысылыннаһын бэтэрээнэ С.А. Петров кылбаа маҥан лиэнтэни быстылар, сибэкки дьөрбөтүн пааматынньыкка уурдулар.

 

Ил Түмэн спикерэ Александр Жирков Ил Түмэн Бэрэссэдээтэлин Махтал суругун үлэ бэтэрээнэ С.С. Корниловка, Ил Түмэн Бочуотунай грамотатын Үөдэй нэһилиэгин баһылыга Л.Н. Гаврильевка үөрүүлээх быһыыга-майгыга туттарда.

 

«Үөдэй нэһилиэгэ» МТ  аатыттан  үйэлээх сквер-уһаайба тутан олоххо киллэрбит «Региональнай сайдыы»  ХЭО генеральнай бэдэрээччитэ А.А. Васильевка, Ньурбатааҕы «Кооператор» маҕаһыын салайааччыта В.Е. Ивановаҕа, Үөдэйтэн сквер тутуутугар үлэлэспит В.Н. Григорьевка, А.А. Ивановка, А.А. Николаевка бочуотунай грамоталары туттардылар. Тэрээһин оһуокайынан түмүктэннэ.

 

Салгыы ыалдьыттар Үөдэй оскуолатыгар сырыттылар. Бу үөрэх кыһатын аан бастаан 1922 сыллаахха  20-чэлээх уол Николай Васильевич Егоров Үөһээ Бүлүүттэн кэлэн арыйар. Александр Жирков оскуолаҕа муҥутаан төһө оҕо үөрэммитин ыйыппытыгар,  оскуола-сад директора Т.И. Васильева 60-чаҕа тиийэ оҕо үөрэнэрин, 2002 с. диэри 9 кылаастаах оскуола буола сылдьыбытын эттэ. 2004 сыллаахха үөрэнэр оҕо ахсаана аҕыйаан, статустара уларыйан, оскуола-саад  буолбут. Билиҥҥи туругунан оҕо саадыгар 12, оскуола 10-ча оҕо үөрэнэр. Былаан быһыытынан оҕо саада тутуллуохтааҕын үп-харчы  тиийбэккэ, саад тутуута 2018 сылга көспүтүн эттилэр. Александр Николаевич улууска хас оскуола тутуллуохтааҕын туоһуласта.

 

Үөдэй нэһилиэгин үбүлүөйдээх ыһыаҕын аһыллыытыгар Таркаайы нэһилиэгин бочуоттаах олохтооҕо А.М. Иннокентьева алгыс  сиэрин-туомун оҥордо.

 

Ил Түмэн Бэрэссэдээтэлэ Александр Жирков: «Үөдэй сиригэр тутуллубут ыһыахтыыр сир, Варвара Андреевна Петрова аатынан сквер-уһаайба дьиҥ сахалыы ылбаҕай тыыннаах гына тутуллубуттар. Итиннэ эһиги хас биирдиигит илиигит сылааһа иҥмитэ көстөр. Кэнэҕэс сквер-уһаайба  Ньурба улууһун баһылыктара, ытык дьоно, ытык-мааны ыалдьыттары көрсүһэр киин сирдэринэн буолуон сөп эбит», - диэн эппитэ оруннаахтык иһилиннэ.

 

Ил Түмэн үөрэххэ, наукаҕа, култуураҕа, иһитиннэрэр-биллэрэр маассабай средстволарга, уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Антонина Григорьева кэмитиэт аатыттан  Бочуотунай грамоталары  Н.И. Аммосоваҕа, А.П. Гаврильеваҕа, М.С. Степановаҕа туттарда. Итиэннэ араас кэмнэргэ САССР Үрдүкү Сэбиэтигэр Үөдэй нэһилиэгиттэн депутаттарынан Мотрена Андреева, Варвара Петрова үтүө суобастаахтык үлэлээн ааспыттарын аҕынна.

 

Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев А.С. Григорьевка, А.И. Григорьеваҕа, Л.К. Андрееваҕа бочуотунай грамоталары туттарта уонна Үөдэй нэһилиэгин баһылыга Л.Н. Гаврильевка кэккэ сылларга ыкса сибээстээхтик үлэлээн кэлбиттэригэр махтанарын биллэрдэ.

 

Улуустааҕы социальнай харалта управлениетын салайааччыта А.М. Уларова ааспыт сылга В.А. Петрова төрөөбүтэ 80 сылын бэлиэтиир тэрээһиннэргэ улуустааҕы социальнай судаарыстыбаннай тэрилтэлэр ааттарыттан Үөдэй нэһилиэгиттэн элбэх оҕолоох дьиэ кэргэннэргэ В.А.Петрова аатынан бириэмийэни Үөдэйтэн элбэх оҕолоох Мария Трофимовна, Алексей Васильевич Ивановтар дьиэ кэргэннэригэ туттарда.

 

Кэлбит ыалдьыттар салгыы Хаҥаластааҕы В.А. Петрова аатынан кыраайы үөрэтэр түмэл үлэтин кытта билистилэр. Түмэли төрдүс сылын З.В. Анисимова салайан үлэлэтэр. Түмэл  кыраайы үөрэтии, Сата уустарын үлэлэрин таһынан, биллиилээх уопсастыбаннай, судаарыстыбаннай деятель, СӨ Бочуоттаах олохтооҕо, түөрт улуус бочуоттаах гражданина В.А. Петроваҕа 600-тэн тахса экспонат харалла сытарын кэпсээтэ. Хаҥалас  нэһилиэгэ  Сата уустарынан биллэрин, 2016 с. «Сата уустарын ньымаларынан тимири уһаарыыга холонон көрүү»  тимир ууһа А.В. Афанасьев бырайыак суруйан,  өрөспүүбүлүкэттэн, улуустан грант ылан, тимир уһаарыытынан дьарыгырбытын билиһиннэрдэ. Бу сылга  Ариан Васильевич  көҕүлээһининэн Уус кыһата, балаҕан тутуутун саҕалаабыттарын, аны  күһүн ыытыллыахтаах өрөспүүбүлүкэтээҕи саха быһаҕын күрэҕэ ыытылларыгар үлэҕэ киллэриэхтээхтэрин эттэ.

 

Спикер Александр Жирковка Ньурба куоратыгар Сергей Васильев-Борогонскай аатынан сынньалаҥ пааркатыгар  аны күһүн куорат үбүлүөйдээх 20 сылын туолуутугар паарканы уларытан оҥорууга бырайыактарын «Ньурба куорат» дьаһалтатын баһылыга А.М. Иннокентьев, СЭГХ салайааччыта М.С. Семенов, салгыы Ст. Васильев  уулуссатыгар турар Степан Васильев пааматынньыгар оҥоһуллуохтаах сквери көрдөрдүлэр, үлэ хаамыытын билсиһиннэрдилэр.

 

Ньурба.