Бу күннэргэ улуустааҕы «Таатта» хаһыат бастакы нүөмэрэ бэчээттэммитэ 80 сыллаах үбүлүөйэ киэҥник бэлиэтэннэ. Үөрүүлээх тэрээһиннэргэ Саха Өрөспүүбүлүкэтин Ил Түмэнин депутаттара Михаил Гуляев, Павел Пинигин кытыннылар.

Норуот депуттарын таһынан, Таатта улуустааҕы хаһыатын үбүлүөйдээх тэрээһинигэр СӨ инновацияҕа, сыыппаранан сайдыыга, инфокоммуникационнай технологияларга министрин солбуйааччы Чокуур Гаврильев, улуустар хаһыаттарын делегациялара, СӨ Суруналыыстарын сойууһун бэрэссэдээтэлэ Галина Бочкарева салалтатынан өрөспүүбүлүкэ биллэр-көстөр суруналыыстара, уо.д.а. кэлэн ыалдьыттаан бардылар.

Ыалдьыттары Таатта — Чурапчы кыраныыссатыгар улуус баһылыга Михаил Соров, «Таатта» хаһыат редактор-директора Анна Посельская, Тыараһа нэһилиэгин олохтоохторо сахалыы сиэринэн-туомунан, үөрэ-көтө көрүстүлэр.

Нэһилиэк баһылыга Святослав Сунхалыров кэлбит ыалдьыттары Таатта ытык сиригэр үктэммиттэринэн эҕэрдэлээтэ, улуус баһылыга Михаил Соров эҕэрдэ тылын тириэртэ, сахалыы тойук дьиэрэйдэ.

Тэрээһин кыттыылаахтара Былатыан Ойуунускай оҕо сылдьан куйуурдаабыт Халымнаайы күөлүгэр сырыттылар, «Оҕо куйуурдуу турара» пааматынньык таһыгар Ил Түмэн депутата Павел Пинигин, СӨ Суруналыыстарын сойууһун бэрэссэдээтэлэ Галина Бочкарева эҕэрдэ тылларын иһиттилэр. Чөркөөх орто оскуолатын 6 кылааһын үөрэнээччитэ, Чөркөөх народнай театрын кыракый артыыһа Сеня Неустроев куйуурун ойбоҥҥо уган эрийэ туран, Ойуунускай «Оҕо куйуурдуу турара» айымньытыттан быһа тардан толордо.

Ытык-Күөлгэ хаһыат үбүлүөйүнэн сибээстээн кэлбит ыалдьыттар улуус киинигэр баар айар тыл аҕалара П.А.Ойуунускай, А.Е.Кулаковскай-Өксөкүлээх Өлөксөй уонна үс реалист-суруйааччы пааматынньыктарыгар сылдьан, сибэкки ууран, сүгүрүйэн аастылар.

П.А.Ойуунускай пааматынньыгар ыалдьыттары Таатта нэһилиэгин баһылыга Егор Павлов, министри солбуйааччы Чокуур Гаврильев, Ил Түмэн депутата Михаил Гуляев эҕэрдэлээтилэр.

Өксөкүлээх Өлөксөй скверигэр ыалдьыттары А.Е.Мординов аатынан Тааттатааҕы лицей үөрэнээччилэрэ айхаллыы көрүстүлэр. Сахалыы сиэдэрэй таҥастаах-саптаах уолаттар Өксөкүлээх «Былыргылыы алгыс» хоһоонун ааҕан доргуттулар, оттон 11-с кылаас үөрэнээччитэ Нарыйа Саввина тойук туойан, халадаай былааччыйалаах нарын-намчы кыргыттар хомус тардан күндүлээтилэр.

Үс реалист-суруйааччы Өксөкүлээх Өлөксөй, Алампа уонна Н.Д.Неустроев пааматынньыктарыгар И.П.Жегусов аатынан Тааттатааҕы гимназия оҕолоро үөрэ-көтө көрүстүлэр.

Күн иккис аҥаарыгар улуус баһылыга Михаил Соров кылгастык улуус олоҕун-дьаһаҕын, үлэтин-хамнаһын билиһиннэрдэ. Ол кэнниттэн ыалдьыттар «Таатта сайдар эйгэтэ» улуустааҕы культурнай-үөрэтэр кластер ис хоһоонун билистилэр. Бу кластер 12 бырайыактаах, общество ханнык сокуоннарынан сайдан иһэрий, салгыы хайдах сайдабыт уонна ханна тиийэбит диэн өйдөбүллэринэн салайтаран ол бырайыактары олоххо киллэриигэ үлэ барар эбит.

Улуустааҕы кыраайы үөрэтэр музей үлэтин кытта билсии кэнниттэн «Таатта» хаһыат 80 сыллаах үөрүүлээх үбүлүөйүн тэрээһинэ П.А.Ойуунускай аатынан Тааттатааҕы народнай театр дьиэтигэр салҕанна. Манна үбүлүөйгэ кэлбит ыалдьыттар болҕомтолорун хаһыат, редакция үлэтин-хамнаһын, историятын билиһиннэрэр араас ис хоһоонноох быыстапкалар тартылар.

Ол курдук хаһыат 2004-2009 сс. редактор-директора Анастасия Морхоева олоҕун, айар үлэтин кэпсиир баай ис хоһоонноох быыстапка, РФ Суруналыыстарын сойууһун чилиэнэ Прокопий Андросов-Дьөҥкү Сээн редакция, хаһыат историятын кэрэһэлээн кэпсиир үгүс ахсааннаах планшеттара, «Таатта» хаһыат редакцията бэчээттээн таһаарбыт, киин библиотека туруорбут кинигэлэрин быыстапката, хаһыат общественнай корреспондена Михаил Винокуров дьикти таастарын, силистэрин, оскуолалар, нэһилиэктэр таһаарар хаһыаттарын быыстапкалара уо.д.а. сылдьыбыт эрэ киһи сэҥээриитин ыллылар.

Онон мустубут дьон үөрүүлээх тэрээһиҥҥэ киириэхтэрин инниттэн үбүлүөйдээх хаһыат үлэтин-хамнаһын туһунан балачча сиһилии билиини-көрүүнү ылан киирдилэр.

Тэрээһин үөрүүлээх чааһа СӨ культураҕа үтүөлээх үлэһитэ Валентин Козлов салайааччылаах «Доҕордоһуу» оҕо ансаамбылын үҥкүүтүнэн саҕаланна. Онтон «Таатта» хаһыат редактор-директора Анна Посельская хаһыат 80 сыллаах үбүлүөйүгэр анаммыт үөрүүлээх тэрээһин саҕаламмытынан эҕэрдэ тылын тириэртэ уонна кылгастык хаһыат 80 сыллаах айанын суолун билиһиннэрдэ.

Хаһыат үбүлүөйүнэн бастакынан эҕэрдэ тылы улуус баһылыга Михаил Соров эттэ. Кини редакция төһө да уустук кэмҥэ, кыараҕас дьиэҕэ-уокка олордор, таһаарыылаахтык үлэлиирин, хаһыат коллектив сыралаах үлэтин күүһүнэн, общественнай корреспонденнарга тирэҕирэн тахсарын бэлиэтээтэ, наҕараадалары туттартаата.

Улуус депутаттарын Сэбиэтин бэрэссэдээтэлэ Валентин Охотин, Таатта нэһилиэгин баһылыга Егор Павлов эмиэ наҕараадалары туттардылар.

СӨ Ил Түмэнин ыччат дьыалаларыгар, физкультураҕа уонна спортка сис кэмитиэтин бэрэссэдээтэлэ Михаил Гуляев хаһыат улуус сайдыытыгар сүҥкэн оруолу ыларын бэлиэтээн туран, редакция үлэһиттэрин парламент кэмитиэттэрин Бочуоттаах грамоталарынан наҕараадалаата.

Дьоро киэһэҕэ суруналыыстар, редакция үлэһиттэрэ, общественнай корреспонденнар СӨ инновацияҕа, сыыппаранан сайдыыга, инфокоммуникационнай технологияларга министиэристибэтин, СӨ Ыччат дьыалаларыгар министиэристибэтин, РФ уонна СӨ Суруналыыстарын сойуустарын наҕараадаларын туттулар.

Өрөспүүбүлүкэтээҕи редакциялар салайааччылара, бэрэстэбиитэллэрэ биир идэлээхтэрин эҕэрдэлииллэригэр кыттыһан, «Ил Түмэн» хаһыат редактора Наталья Попова эҕэрдэ суругу туттарда.

Бу эҕэрдэлэр быыстарыгар Индия Кангра куоратын Дарамсала түөлбэтиттэн Сара колледжка үөрэнэ сылдьар хаһыат 1993-1996 сылларга редактора Ольга Корякина-Умсуура, Владивосток куораттан Уһук Илиҥҥи федеральнай уокурукка СӨ бастайааннай бэрэстэбиитэлэ Георгий Никонов, Новосибирскай куораттан хаһыат эрэллээх партнера «Промхим» ХЭО салайааччыта Олег Бемов видеоэҕэрдэлэрэ көһүннэ.

Үөрүүлээх тэрээһини улуус биллэр-көстөр ырыаһыттара Анна Варламова, Андриан Павлов, Анна Горохова, Лия Лукина, «Айыллаана» вокальнай ансаамбыл, Бүлүү улууһун «Олох суола» хаһыатын редактор-директора Василий Мандаров ылбаҕай ырыаларынан эҕэрдэлээтилэр. Тэрээһин П.А.Ойуунускай «Таатта үрэх үрдүгэр» ырыатынан түмүктэннэ. Ырыаны «Дьүрүскэн» дуэт ырыаһыттара Михаил Варламов, Николай Онуфриев таһаарбыттарын мустубут дьон биир тыынынан ыллаан ньиргиттилэр. Ити курдук «Таатта» хаһыат бастакы нүөмэрэ бэчээттэммитэ 80 сыллаах үбүлүөйэ өрөгөй үөрүү ортотугар өрө күүрүүлээхтик ааста.

«Таатта» хаһыат матырыйаалынан