Дьокуускай куораттааҕы уокурук Тулагы-Киллэм нэһилиэгэр үс мэндиэмэннээх таас оскуола дьиэтэ 2009 сыллаахха, оскуола 100 сыллаах үбүлүөйүн көрсө үлэҕэ киирбитэ. Тулагы орто агро-хайысхалаах оскуолата балаҕан ыйын 22 күнүгэр төрүттэммитэ 107 сылын туолар. Бу оскуоланы 1909 сыллаахха оччотооҕу Саха уобалаһын губернатора Иван Крафт астарбыт. Оскуола Ленин уордьаннаах, САССР үтүөлээх учуутала Пантелеймон Иннокентьевич Кочнев аатын сүгэр. Быйылгы үөрэх дьылыгар 554 оҕо үөрэнэр, онтон оскуола боруогун 82 кырачаан үөрэнээччи аан бастаан атыллаата. 

 

Ил Түмэн депутата Николай Румянцев общественнай көмөлөһөөччүтэ Григорий Егоров, Дьокуускай куорат Дууматын депутата Сергей Черных оскуола үлэһиттэрин, үөрэнээччилэри Билии күнүнэн уонна саҥа үөрэх дьыла саҕаламмытынан эҕэрдэлээн баран, саҥа массыына күлүүһүн оскуола дириэктэригэр Изабелла Ивановаҕа үөрүүлээх быһыыга-майгыга туттардылар. Кырдьык, ураты долгутуулаах түгэн буолла. Оҕолор, үлэһиттэр, төрөппүттэр ытыстарын көхтөөх тыаһынан, истиҥ мичээрдэринэн махталларын биллэрдилэр.  

 

«Бүгүн улахан бэлэҕи тутан бары учууталлар, төрөппүттэр уонна оҕолор үөрүүбүт муҥура суох. Ил Түмэн депутата Николай Иннокентьевич Румянцев дьиҥнээх норуот итэҕэллээҕэ буолар. Кини биһиги оскуолабытыгар куруук сүбэ-ама, күүс-көмө, өйөбүл буолар. Убаастабыллаах Николай Иннокентьевичка уонна Сергей Викторовичка өссө төгүл дириҥ махталбытын тиэрдэбит. Эргэ массыынабыт аҥаардас өрөмүөнүгэр былырыын 300 тыһ. солк. ыыппыппыт, олус эрэйдэммиппит. Билигин саҥа көлөбүт үлэбитигэр-хамнаспытыгар күүстээх өйөбүл буолуоҕа. Биһиэхэ бэлэх оҥорбут үтүө дьоммут эрэллэрин түһэн бириэхпит суоҕа», - диэн оскуола дириэктэрэ Изабелла Иванова үөрүүтүн үллэһиннэ. 

 

«Тулагы оскуолатыгар элбэх көлүөнэ дьон үөрэнэн дойдуларын, өрөспүүбүлүкэлэрин сайдыытыгар бэйэлэрин кылааттарын киллэрсибиттэрэ. Биһиги оскуолабыт үйэ историялаах үтүө үгэстэрин  кэспэппит. «Хас биирдии киһи олоҕо - оскуола историята» диэн девиһинэн салайтаран үлэлиибит-хамсыыбыт, үөрэнэбит.  Үөрэнээччилэр уонна учууталлар аан дойду, Россия, өрөспүүбүлүкэ таһымнаах күрэхтэргэ, конференцияларга ситиһиилээхтик кытталлар. Агро-хайысхалаах оскуола буоларбыт быһыытынан, тыа хаһаайыстыбатынан күүскэ ылсан дьарыктанабыт. Оҕолор сайыҥҥы өттүгэр окко, оҕуруот үлэтигэр сылдьаллар. Быйыл уопсайа 20 тыһыынча сибэккини үүннэрдибит. Ол сибэккилэрбит билигин Дьокуускай куораты тупсара, киэркэтэ тураллар. Атырдьах ыйын 16 күнүгэр Өлүөнэтээҕи үөрэхтээһин форумун чэрчитинэн ыытыллыбыт «Открытая школа – горизонты Якутии» быыстапкаҕа биһиги оскуолабыт көхтөөх кыттыыны ылла. Быыстапкаҕа куруолуктары, ньирэйдэри, козалары, кууруссалары илдьибиппит, оҕо-аймах сөҕө-махтайа, астына көрдө», - диэн оскуола дириэктэрэ кылгастык кэпсээтэ.

 

Саҥа үөрэх дьыла хас биирдиигитигэр саҥа саҕахтары арыйдын, кыайыылары уонна ситиһиилэри аҕаллын!